Zincimpi 17
17
1Shashiwahe kulya linkende lya kuyuminina hinga mwekala mu ku mwena,
kupitakana litala linenzala na mayambwayambwa ngoboni hinga lyenzala na mangunga.
2Ndungo uli na ngana ukenga kalela ka mwana hekulyendi uya watendanga bya lisheni,
kami ukalitapila likona na bana bahekulyendi.
3Shiliva na ngolinde bayiyungululanga na mundilo,
ngoboni Nyambi ya Ngula niye wayeleshanga mitima.
4Muntu wakuluwa wayuvwililanga ku mukamahalo,
kami muntu wa mahalo wayuvwililanga ku muntu wa kapele.
5Muntu ukuhenda ncepwe ukuhandula Shakalenga wendi,
ou uku wahilila makando a minendi ukashushuliwa.
6Bazukulu niwo munana wakakulukazi,
kami bana ba ku wahilila muli bahemizabo.
7Nyambilo yayiwahe ku fwanina ku shileya yifwako,
kami kalela ku fwanina kwamba bya mahalo wufwako.
8Lizika kanwa lyenga ngonehe limanya lya ndando yayinene ku muntu uya uli nalyo,
oku akufutukila nimwako ukatangama.
9Muntu ou ukuyatila mulandu washinga shishemo,
ngoboni uya wabokelanga shambo watapanga bahoni bendi.
10Mazu akwambila mukaku yuvwishisha enginanga mukati ka mutima wendi,
kupitakana mwanda wa zinyanzi za ku zipola wakuyeba.
11Muntu wamubi washinga tuhu bya kulifutulukila,
nohobene ntumwana wanguma ukutumiwa kwiza mu kumulwisha.
12Shashiwahe muntu kuliwana na nkaziwa wa mbeya uya banayangulu bana bendi,
kupitakana kuliwana na muntu wakuyeba uya ukutenda bya wuleya.
13Ndi muntu ukubwesha byabibi ku wuwahe,
byabibi kukafuma mu litala lyendi bifwako.
14Kushonkomona nkani kunengi ngonehe kuzikula liziba linatimbilili na mema,
shashiwahe ku mwena oho nkani shilolo zinenehe.
15Ou ukushambisha muntu wakuluwa na nowu ukunyanca muntu wakubula mulandu,
nimwabo hamo banengi bawunyengwe kuli Nyambi ya Ngula.
16Mali ali mu liboko lya muntu wakuyeba akumuyavwa nahiti,
ndi niye kaliha uli na bihanganiko bya kwikala na ngana?
17Wuhoni wenga kulihaka shikati nimwasho,
ngoboni kawushinda wahemuwila ngayi muliyavwe mu makando.
18Muntu wakubula ngana wakulupishanga tuhu na lukushi,
kami wakulupishanga kuyumba mukuli wa ndambo yendi.
19Muntu washinga kulyamba na bantu wahaka mangunga,
mukakulilundumika walishingishilanga malwa.
20Muntu wa mutima wawubi kutangama wufwako,
kami mukakwongeza waliwananga mu wukalu.
21Mwana wakuyeba waletelanga wunginga bahemi bendi,
kami tatiyendi ku wahilila wufwako.
22Mutima wa mahepo wenga wanga wawuwahe,
ngoboni moyo wakapilamina wabombweshanga bifupa.
23Muntu wakuluwa watambulanga lizika kanwa mu kulimba,
ngayi ashanwishe kuyata kwa kupwisha.
24Muntu wangana washingishishanga byuma bya ngana,
ngoboni meho a muntu wakuyeba apenzanga kwakumina hanci.
25Mwana wakuyeba waletanga wunginga kuli tatiyendi,
kami wakoleshanga mutima wa mandiyendi uya wamubelekele.
26Kaliha shashiwahe kushushula muntu wakubula mulandu,
kami sha shibi kukama babilolo ndaba ya kwoloka kwabo.
27Muntu wacincikanga hakwamba wekala na kalimukisho,
kami muntu wa mutima wakuwa mushali wenga mukaku yuvwishisha.
28Hinge wakuyeba bantu ba kutwesha kumuhanganikila ngayi muka ngana ndi ukwikala hinga a mwena,
ba kumuhanganikila ngayi muka kalimukisho ndi ukushinka kanwa kendi.
Libuka Lya Kuyela © Bible Society of Zambia, 2020.