Zincimpi 10
10
Zincimpi za Sholomoni
1Eze nizo Zincimpi za Sholomoni.
Mwana wangana ukuwahililisha tatiyendi,
ngoboni mwana wakubula ngana ukuletela mandiyendi lisheni.
2Wuheti wakuheta mu nzila ya kuluwa kuyavwa wufwako,
ngoboni kulunga kwalamwinanga muntu ku lufu.
3Nyambi ya Ngula kuleha wakulunga ngayi afwe ku nzala ufwako,
ngoboni bakuluwa uka bakwangisha kuwana ebye bakushinga.
4Maboko a wuvwa aletanga wuncepwe,
ngoboni maboko a kukalamana a kuhetesha.
5Mwana wangana wakungulanga mbuto shikati sha kuteza,
ngoboni mwana walangananga shikati sha kuteza waletanga lisheni.
6Mfuywezi zili ha mutwe wa kulunga,
ngoboni mukanwa ka wakuluwa mwafumanga wubi.
7Bantu bakulunga bakanukiwa kwinga ngo mfuywezi,
ngoboni lizina lya wakuluwa likaloba.
8Muntu wangana ukutambula bya kumu shiwulula,
ngoboni ou wabwayanga byowa ukaloba.
9Muntu wa kupwisha ukwenda shiwahe,
ngoboni ukutengamisha nyendelo yendi ukalimukiwa.
10Ou wanyantizanga na liho lya wubi ukuleta wukalu,
ngoboni ou wambanga bya kuyeba walilobeshanga.
11Kanwa ka wakulunga kenga kaheloke ka wumi,
ngoboni mu kanwa ka wakuluwa mwafumanga mushunga.
12Nzimbo yatumizanga mangunga,
ngoboni shishemo shafwikanga byabibi nimwabyo.
13Mukanwa ka mukaku yuvwishisha mu kuwaniwa bya ngana,
ngoboni lunyanzi balukamishanga ha mongo wa mukakubula ngana.
14Bantu bangana bakowezanga kalimukisho,
ngoboni kubwaya kwa shileya kwamu lobeshanga.
15Wuheti wa muntu wenga shipata sha munzi wendi,
ngoboni wuncepwe wa bantu wenga kuloba kwabo.
16Ncuungu ya wakulunga wenga wumi,
ngoboni ncuungu ya wakuluwa yenga ku shushuliwa.
17Bantu bayuvwililanga oho ba kubabela bakayoya,
ngoboni ba kukana ngayi banabipishi bali mu wukalu.
18Ou waholekanga nzimbo wenga mu kakwongeza,
kami mukakukwayanisha bya mahalo wenga shibulangana.
19Ndi ukwamba mazu amengi, mu mazu obe mukwikala ebye uku bipisha,
ngoboni shashiwahe kucincika hakwamba.
20Lulimi lwa wakulunga lunengi shiliva yayiwahe shikuma,
mutima wa wakuluwa wenga wowa.
21Kanwa ka wakulunga kayoyesha babengi,
ngoboni bileya bafwanga ndaba ya kubula ngana.
22Mfuywezi za Nyambi ya Ngula zikuhetesha,
pe kulinyenga mu mutima ku kuyavwa kufwako.
23Kuli shileya kutenda wubi kunengi ngonehe mafuka,
ngoboni muka ku yuvwishisha wawahililanga mu ngana.
24Ebye a kutina wakuluwa bikamwizilila,
ngoboni ebye akushinga wakulunga bikapanikiwa kukwendi.
25Oho nkuli yikupita wakuluwa ukaloba,
ngoboni wakulunga ukashuma mwaya myaka.
26Shinafweke ngonehe Vinenga yayishashu yikwinga muwewe ku mayewe na wishe ukushoshoma mu meho,
nisho kami ekala muvwa ku nobo banamutumu.
27Kuyuvwila Nyambi ya Ngula bowa ku kutalihisha wumi,
ngoboni myaka ya wakuluwa yikashepa.
28Kulumbeza kwa wakulunga, ku mamaninino kwaletanga kutangala,
ngoboni eshe a kutatilila wakuluwa shikabipa.
29Nzila ya Nyambi ya Ngula yenga shipata ku muntu wakulunga,
ngoboni yenga kuloba ku bakakutenda byabibi.
30Wakulunga afwako kukahenyeshiwa ha ndoba yendi,
ngoboni mukawubi kukazika mu litunga wufwako.
31Mukanwa ka wakulunga mwafumanga bya ngana,
ngoboni lulimi lwa mahalo lukaketuliwa.
32Bantu bakulunga bambanga bya ku fwanina,
ngoboni bakuluwa bambanga bya kubula ku fwanina.
Libuka Lya Kuyela © Bible Society of Zambia, 2020.