Kulaba 17
17
Muwana wa Aloni
1Nyambi ya Ngula wambile kuli Moshesha ngayi, 2“Tongweza bantu ba Ishalela bakupanike mishako likumi na yibili, umo waku mukakutwaminina wa mushobo na mushobo. Tikita lizina lya muntu na muntu ha muwana wendi, 3niho kami tikita lizina lya Aloni ha muwana wakwimanina mushobo wa Levi. Kuyo kukekala muwana umo wa muntu na muntu wakwimanina mukakutwaminina mushobo. 4Mukayitwale ku Ntanda ya Shikungulukilo, pe mukayiyake hambili ya Likwati lya Kulimama Likwati lya Kulimama lya wupaki oku naliwaninanga nobe. 5Niho muwana wa muntu ninahata ukatundula mabizi. Mu nzila eye nikamanisha manyengo a kubula kumana ba kulinyengela hahobe Baishalela.”
6Nohobene Moshesha wambile ku Baishalela na bakakutwaminina babo kumupanika muwana umo ku mushobo na mushobo, likumi na yibili ku nimwabo, kami muwana wa Aloni wayakiwile hamo nayo. 7Moshesha niho ayakile mishako nimwayo mu ntanda hambili ya Likwati lya Kulimama kwa Nyambi ya Ngula.
8 #
Bah 9:4. Oho kwashile, Moshesha wenginine mu ntanda, pe wamonene ngayi muwana wa Aloni ukwimanina mushobo wa Levi, unatundulu mabizi. Niwo watupwile ntemo, kami wayimine mikabo ya alimonde! 9Moshesha washimbile mishako nimwayo na kuyimonesha ku Baishalela. Bamonene eshe binatendiwi pe muntu na muntu washimbile muwana wendi. 10Nyambi ya Ngula wambile kuli Moshesha ngayi, “Bwesha muwana wa Aloni hambili ya Likwati lya Kulimama. Niwo unengi shilimukisho kuwutentekela ku shiwulula Baishalela bamafutufutu ngayi mwanga balehe manyengo wabo ndelewa bakafwa.” 11Moshesha watendele ngonehe amutongwezele Nyambi ya Ngula.
12Bantu ba Ishalela bambile kuli Moshesha ngayi, “Tukafwa! Twayongalakale, pele boni nimwetu twalobakale! 13Ndi muntu nimwendi wakwiza kwakwipi na ntanda ya Nyambi ya Ngula uku fwanina kufwa, pele boni nimwetu tuli na kufwa!”
Libuka Lya Kuyela © Bible Society of Zambia, 2020.