Kulaba 15
15
Ndayano zaha zinkombela
1Nyambi ya Ngula wambile kuli Moshesha ngayi, 2“Tongweza bantu ba Ishalela, oho mukeza mu litunga akamipanika, 3mukatupule kuli Nyambi ya Ngula nkunzi hinge shikungwe wa mbelele, hinge mbelele, hinge mpongo akaletiwe kuli Nyambi ya Ngula kwinga nkombela yakuhokesha hinge nkombela ya kubezulula lubeza, hinge ntupu ya kupana na kufunga, hinge nkombela yimo yaku bimbo byenu bya wunyambi bya kukuliziza, livumba lya neze zinkombela za byakulya lili na kuwahililisha Nyambi ya Ngula ku mutima. 4Muntu nimwendi wakukombelela nkombela ya kuhokesha ya mbelele hinge ya mpongo kuli Nyambi ya Ngula, akambike ha shimuna na shimuna ntupu ya mpeka ya kilongilamu imo ya muhunga wakuvuba na lita imo ya mazi a olive, 5hamo na lita imo ya waine kwinga ntupu, kombelelenu hamo na nkombela ya kuhokesha hinge ku nkombela ya kukombelela mwana mbelele na mwana mbelele. 6Oho shikungwe wambelele ukukombeleliwa, kombelelenu hamo na makilongilamu abili a muhunga wakuvuba na lita imo na shitika sha mazi a olive, kwinga ntupu ya mpeka, 7pe kunkombela ya bya kunwa kombelelenu lita imo ya waine. Livumba lya zinkombela eze zili na kuwahilisha Nyambi ya Ngula. 8Oho nkunzi ukukombeleliwa kuli Nyambi ya Ngula kwinga nkombela yakuhokesha, hinge nkombela ya kubezulula mbeza, hinge nkombela ya kulilumikila, 9kombelelenu hamo na ntupu ya mpeka ya makilongilamu ahatu a muhunga wakuvuba na malita abili a mazi a olive, 10hamo na malita abili a waine. Livumba lya nkombela eye lili na kuwahilisha Nyambi ya Ngula.
11“Nkombela yiyo yikakombeleliwa ya kutupuliwa hamo na nkunzi, hinge shikungwe wambelele, hinge mwana mbelele, hinge mwana mpongo. 12Oho bimuna ba kupitakana umo ba nakombeleliwi, nkombela yakukambikaho mukawezelelaho ngo ku wingi wa bimuna. 13Baishalela nimwabo ba kuhemuwilamo bakatenda eshe, oho bakakombelela nkombela ya byakulya, livumba liya likuwahilisha Nyambi ya Ngula. 14Kami ndi ku shikati shamina lipukwenda wazika mukati kenu, hinge ndi wazika shikati shashishe hinge ndi mwanya wakwikalilila, atende nkombela ya byakulya, livumba liya likuwahisha Nyambi ya Ngula niye nafwanini kukonka ndayano zimo. 15Ndayano zimo zili na kumangiwa hahenu zinengi zimo naha mapukwenda aba bazika mukati kenu ku bihemunwino byenu nimwabyo. Enu na nibo munalifweke ku meho a Nyambi ya Ngula, 16#Bal 24:22. ku longesha kumo na mulao umo bikupanikiwa kukwenu na ku mapukwenda.”
17Nyambi ya Ngula watongwezele Moshesha ngayi, 18“Tongweza bantu ba Ishalela, kulama ndayano mu litunga liya akuya mu kubapanika. 19Oho mwalyakale byakulya biya mwalima, bimo kukwabyo bitentekenu kwinga ntupu ya kuhoma kuli Nyambi ya Ngula. 20Oho mukavuba mankende, ha mankende a kutatika kuvuba ku byakulya byabipya akaletiwa kwinga nkombela ya kuhoma kuli Nyambi ya Ngula. Awa akenga akutupuliwa mu nzila yimo ngonehe nkombela mwatupulanga ha kubula mpeka. 21Ndaba eye nkombela ya kuhoma yikatupuliwa kuli Nyambi ya Ngula, yaku mankende mukavubanga ku bihemunwino byenu nimwabyo.
22“Ngoboni hamina muntu umo na mapuza, ukukwanga kulama ndayano zimo za nebye Nyambi ya Ngula apanikile Moshesha. 23Hamina nkampe kumbili likunge lya bantu likakwanga kutenda byuma nimwabyo biya atongwezele Nyambi ya Ngula muli Moshesha. 24Ndi Kubipisha kunezi ndaba ya wulube wa likunge lya bantu ba Ishalela, bakakombelela nkunzi kwinga nkombela yakuhokesha, nilyo livumba liya likawahilisha Nyambi ya Ngula hamo na ntupu ya mpeka na nkombela ya waine. Kufungilako kami, shikungwe wa mpongo kwinga ntupu ya ha wubi. 25Mukankombela ukatenda shiheka sha kwambwililisha likunge lya bantu ba Ishalela, pe bakayatila, ndaba mulandu wengile wa mapuza, pe bakombelelele ntupu ya ha wubi wabo kwinga nkombela ya byakulya kuli Nyambi ya Ngula. 26Likunge lya bantu nimwabo ba Ishalela na mapukwenda bazika mukati kabo bakenga ba kuyatiwila, ndaba bantu nimwabo banalingizi mu mulandu wa mapuza.
27 #
Bal 4:27-31. “Ndi muntu umo uku bipisha na mapuza, ukakombelela mwana mpongo wa mwaka umo wamukazi kwinga ntupu ya ha wubi. 28Mukankombela ukatenda shiheka sha kulyambwilila ku kaala, mu kuyelesha uya muntu ku wubi wendi wa mapuza, pe ukayatiwila. 29Mulao ou umo ukenga waku muntu nimwendi ou unabipishi wubi na mapuza, hinge ndi nengi Kaishalela wakuhemuwilamo hinge lipukwenda wazikamo.
30“Ngoboni uya muntu uku bipisha na ku fungasho, hinge ndi nengi ndambo hinge lipukwenda, uli na mulandu wakubipishila Nyambi ya Ngula na lihandu, pe ukenga wakuzihiwa, 31ndaba unalimbululu lizu lya Nyambi ya Ngula kami wafungasho ha kukiluka lumo lwaku ndayano zendi. Niyemwine nalileyekemo ha lufu lwendi.”
Muntu ou wakilukile Mutena Wakukatala
32Shikati shimo, oho Baishalela bashili mu libelelengwa, bawanine muntu hacaba nkuni ha Mutena Wakukatala. 33Bamutwalile kuli Moshesha na Aloni naku likunge lya bantu nimwabo baishalela, 34pe bamuyakile mu tolongo, ndaba nisho kaliha shalubulukile eshe shafwanina kutenda kukwendi. 35Niho Nyambi ya Ngula ambile kuli Moshesha ngayi, “Ou muntu uku fwanina kuzihiwa, likunge lya bantu nimwabo lya Baishalela na mamanya ha munkanda wa munkungwa.” 36Nohobene likunge lya bantu nimwabo lya Baishalela, lya mutwalile ha munkanda wa munkungwa pe bamuzihile na mamanya ngonehe Nyambi ya Ngula atongwezele Moshesha.
Ndayano za nyanya za ku bivwalo
37Nyambi ya Ngula wambile kuli Moshesha ngayi, 38#Nday 22:12. “Tongweza bantu ba Ishalela ngayi, ‘Tungilenu nyanya ha zinkomi za bivwalo byenu, pe muyake lunyimbwa lwa wuhombo ha lunyanya na lunyanya. Mukatendanga eshe ku bihemunwino byenu nimwabyo. 39Nyanya zikatendiwa kwinga byanukisho, pe shikati nimwasho eshe mukazimonanga, mukanukanga ndayano zami nimwazo na kuzombatala, niho kukamfutamina na kukonka shamutima wenu na makwilu wenu mufwako. 40Nyanya zikamyanukisha kulama ndayano zami nimwazo, pe mukenga bami kumaninina. 41Ami Nyambi ya Ngula, Nyambi yenu namifumishile ku Engepita kwinga Nyambi yenu. Ami Nyambi ya Ngula, Nyambi yenu.”
Libuka Lya Kuyela © Bible Society of Zambia, 2020.