Yoshuwa 9
9
Bakangimbiya bakwongeza Ishalela
1Oho ncango eze zayuvwanikile ku Baishalela naku bamyene nimwabo ba ku mponci ya Yondana, bantu obo baha binkanda naba bamu binyekwa naba baha bibumbo bya makobo a Liwate lya Menditelaniya kukuma naku Lembanoni, aba bengile bamyene ba Bahita na Baamoli na Bakenaani na Bapelizi na Bahivi na Bayembushi. 2Nimwabo bakanzita bezile hamo na kulwisha Yoshuwa na Baishalela.
3Ngoboni bantu ba ku Ngimbiyoni, aba bengile ba mushobo wa Bahivi, bayuvwile ebye atendele Yoshuwa ku Yeliko naku Ayi, 4pe mu kushoshoka kwabo bamwongezele. Bawahishile byakulya, pe batwikile bambongolo zabo na zimpamba na zintesho za kutopeka za waine. 5Bavwalile ncangwa za kutaboka ziya zatopekiwile na binzengele bya makwiza. Mankende aya bashimbile engile akuyuma na kufuta. 6Niho bayile kuli Yoshuwa ku munkungwa ku Ngilingale, pe bambile kukwendi naku Baishalela ngayi, “Etu tunafumu ku litunga lya kwakutali. Tukushinga ngayi tuliyuvwashane nanenu.”
7 #
Kut 23:32; 34:12; Nday 7:2. Ngoboni Baishalela bambile ku Bahivi ngayi, “Shumangani eshe tukuliyuvwashanina nanenu? Hamina kampe mwekala hahepi.”
8Bambile kuli Yoshuwa ngayi, “Tuli bakamulimo wobe.”
Yoshuwa wambile ngayi, “Kati muli bayani? Kami mwafuma kuti?”
9Bambile ngayi, “Hekulu, twafuma ku litunga lya kwakutali, ndaba tunayuvwu bya Nyambi ya Ngula, Nyambi yenu. Tunayuvwu mbuzi ya byuma nimwabyo biya atendele mu Engepita, 10#Kul 21:35. kami nanebye atendele ku bamyene babili ba Baamoli ku mushamuko wa Yondana, kuli Shihoni mwene wamu Heshimboni na kuli Ongi mwene wamu Mbashani, ou wekalilenga mu Ashitaloti. 11Bakakutwaminina na bantu nimwabo baya bekala mu litunga lyetu batutongwezele ngayi wahishenu mpamba yaha mukala wenu, muye mukashimbawile obo bantu pe mukambe nabo ngayi, ‘Hekulyetu, tuli ku nceto yobe, tuliyuvwashane nanenu.’ 12Mona mankende wetu. Oho twakatukile nawo kukwetu, ekalile akutukuma. Ngoboni tilaminenu! Haya engekale akuyuma na kufuta. 13Oho twenzalishilenga waine mu zintesho yengile yayipya, ngoboni tilaminenu! Zinataboko. Makwiza wetu na ncangwa zetu binafu ndaba tunafumu kwakutali shikuma.”
14Bantu ba Ishalela batambwile byakulya ngoboni kaliha bepwile kuli Nyambi ya Ngula. 15Niho Yoshuwa waliyuvwashanine na bantu ba ku Ngimbiyoni pe walimamine nabo, kami bakakutwamina ba baishalela babetabilishile luhaho lwa shikulupisho shabo.
16Kwapitile matena ahatu oho baliyuvwashanakale, Baishalela batoshele ngayi aba bantu mwa shikuma bekala hahepi. 17Nohobene Baishalela bafunzukile, pe mwapitile tuhu matena ahatu niho bakakumine ku zinkena oku kwekalilenga aba bantu, kwengile ku Ngimbiyoni na Kefwila na Mbeloti na Kiliyati Yeyalima. 18Ngoboni Baishalela kaliha babazihile, ndaba ya bakakutwaminina babo batendele shiheka sha luhaho lwa shikulupisho ku bantu aba mu lizina lya Nyambi ya Ngula, Nyambi wa Ishalela. Bantu nimwabo balihohomenenenga kubakakutwaminina haneshe. 19Ngoboni bakakutwaminina bakumbwile ngayi, “Tunafungu shifungo sha luhaho lwa shikulupisho shetu kukwabo mu lizina lya Nyambi ya Ngula, Nyambi wa Ishalela. Haya ku balemeka tufwako. 20Tuku fwanina kubaleha ngayi bayoye, ndaba ya shikulupisho shetu. Ndi tuku kana pe Nyambi ukatushushula.” 21Bakakutwaminina bambile ngayi, “Balehenu bayoye, ngoboni bakekalanga tuhu na kucaba nkuni na kututekwilanga mema.”
22Yoshuwa wehanine bantu ba ku Ngimbiyoni ngayi beze kukwendi, pe wepwile ngayi, “Shumangani mwatwongezelele na kututongweza ngayi mwafuma kwakutali, kati mwekala kuno? 23Ndaba mwatendele eshe, Nyambi wamikutakale. Bantu bakenga bandungo shikati nimwasho, bakacabanga nkuni na kutekula mema aku Litala lya Nyambi yami.”
24Nibo bakumbwile Yoshuwa ngayi “Hekulu, twashitendele, ndaba twalimukile ngayi mwa shikuma kwengile kupwisha ngayi Nyambi ya Ngula, Nyambi yenu, watongwezele mukamulimo wendi Moshesha kumipanika litunga nimwalyo na kuziha bantu nimwabo bazikangamo oho mwezilenga na kulikaka mu litunga. Twatendesho ndaba twamitampwile, twekalile na bowa wakutinisha wumi wetu. 25Haya tuli mu ngovu zobe. Tenda kukwetu ngo omu ukushingila kutenda.” 26Nohobene Yoshuwa watendele eshe bambile, wabalaminenga pe kaliha wetabilishile bantu ba Ishalela ngayi babazihe. 27Ngoboni Yoshuwa ha shikati shiya wabengile bandungo, ba kucaba nkuni na kutekula mema a bantu ba Ishalela na a kaala ka Nyambi ya Ngula. Naku mutena uno bali na kuzamina kutenda mulimo owe mu mwanya oku Nyambi ya Ngula anahata kwa kumulemeshelanga.
Libuka Lya Kuyela © Bible Society of Zambia, 2020.