Yoshuwa 5
5
1Oho bamyene nimwabo ba Baamoli bekalile ku mponci yaku mushinzi wa Yondana na bamyene nimwabo ba Bakenaani baha shibumbo sha Liwate lya Menditeleniya bayuvwile ngayi Nyambi ya Ngula wayumisha Yondana, hantu bantu ba Ishalela bazabukile. Bekalile na bowa pe bahopokele mu lutu na kukanka ndaba ya Baishalela.
Baishalela ba kutwaliwa ku mukanda ku Ngilingale
2Niho Nyambi ya Ngula atongwezele Yoshuwa ngayi, “Tenda zimpoko zazitwe ha mamanya pe utwale Baishalela ku mukanda.” 3Nohobene Yoshuwa watendele zimpoko pe watwalile Baishalela ku mukanda ku mbalila yatumbiwile ngayi shinkanda sha Halaloti.#5:3 Kutontolola ngayi shinkanda sha bitembe. 4Eshe nisho shuma shaleteshele Yoshuwa, kubatwala ku mukanda, ndaba balume nimwabo ba kukula bafwilile mu nzila yamu libelelengwa ha kufuma mu Engepita. 5Bantu nimwabo bafumine mu Engepita bayile ku mukanda, ngoboni kunobo bahemuwilile mu libelelengwa kowa batwalile ku mukanda. 6#Kul 14:28-35. Ndaba bantu Baishalela nimwabo bendele myaka makumi anaa mu libelelengwa, bakumine ku myaka ya kulwa, baya bafumine mu Engepita bafwile, ndaba balimbwilishile Nyambi ya Ngula. Ngonehe ahahile ngayi kukabetabila ngayi bamone wuheti na litunga likukunkula mahwe na wushi a kulupishile bankakazabo afwako. 7Ngoboni bana babo, babalume aba babulile kuya ku mukanda oho bashili kwenda mu libelelengwa, pe niwo mukoka wawupya ou Yoshuwa atwalile ku mukanda.
8Mukanda oho wamanine, mukoka nimwawo wekalile ha munkungwa hantu noho bitombo byapolele. 9Kami Nyambi ya Ngula wambile kuli Yoshuwa ngayi, “Nafumishi kukwenu lelo lihandu lya kwinga bandungo mu Engepita.” Shiya nisho shuma shikutumbiwila mwanya uya lizina lya Ngilingale,#5:9Ngilingale lizu elye mu Shihebelu likutontoloka ngayi “Kufumisha.” Ngonehe lishili kutumbiwa na kulelo.
10 #
Kut 12:1-13. Shikati shiya oho Baishalela bashili kwikala ku Ngilingale ha mbuwa ya hahepi na Yeliko, bapingile Shimbo sha Kupitilila ku mazolo ha mutema wawulikumi na anaa wa ngonda. 11Kwashileko balile byakulya bya muhalule ha shikati sha kutatika biya byalimiwa mu Kenaani, bayohele mpeka na mankende akuyoha a kubula mumena. 12#Kut 16:35.Ku nyima yanebye nimwabyo, maana kaliha bekalile nawo kami. Kufuma ku mwaka uyo, balilenga byakulya biya byalimiwilenga mu Kenaani.
Yoshuwa na mulume wekalile na mukwale
13Oho Yoshuwa ekalile hahepi na Yeliko, wayimbwile meho wendi wamonene mulume hinga emana kumbili yendi na kwata mukwale. Pe Yoshuwa wayile kukwendi na kumwipula ngayi, “Obe uli umo wakuli banzita betu ndi uli kamalamo?”
14Niho mulume akumbwile ngayi, “Byo, ami kowa oku nawili. Nezi kuno kwinga mukulwane wa banzita ba Nyambi ya Ngula.”
Yoshuwa walambile hanci mu kulemesha, pe wambile ngayi, “Nengi mukamulimo wobe hekulu. Obe ukushinga ngayi nitende bishini?”
15Pe mukulwane wa banzita wa Nyambi ya Ngula wambile ngayi, “Vwula ncangwa zobe. Aha unemana ha mwanya wa kuyela.” Pe Yoshuwa watendele ngonehe bamutongwezele.
Libuka Lya Kuyela © Bible Society of Zambia, 2020.