Yoshuwa 14
14
Kutapishila litunga lili ku mponci ya Yondana
1Bino bili muno nibyo bikulubulula eshe lyatapiwile litunga lya Kenaani ku mponci ya Yondana mukati ka bantu ba Ishalela kwinga likona lyabo. Mukankombela Eliza na Yoshuwa mwana Nune na bakakutwaminina ba mapashi a mishobo ya Baishalela batapilile litunga mukati ka wingi wa bantu. 2#Kul 26:52-56; 34:13. Ngonehe Nyambi ya Ngula atongwezele Moshesha, matunga mutanu na anaa na shitika sha mishobo ya Ishalela yaku mponci ya Yondana, yatapiwile ha kutenda nyela. 3#Kul 32:33; 34:14-15; Nday 3:12-17.Moshesha wapanikile litunga lya ku mushamuko wa Yondana kwinga likona ku mishobo yamina yibili na shitika. 4Bazukulya Yoshefwa balitapile mu mishobo yibili, Manashe na Efulemu. Balevi kaliha batambwile mbalila ya litunga. Ngoboni batambwile minzi mwakwikala, yili na mwakubuyishila zingombe zabo na matanga a bambelele. 5Bantu ba Ishalela batapile litunga ngonehe Nyambi ya Ngula atongwezele Moshesha.
Hembuloni ukupanikiwa kuli Kalembu
6 #
Kul 14:30. Niho bantu ba Yunda bezile kuli Yoshuwa ku Ngilingale. Umo hakati kabo wengile Kalembu, mwana Yefuna wa Kakenezi wambile kukwendi ngayi, “Obe ulimuka ebye ambile Nyambi ya Ngula kuli Moshesha muntu wa Nyambi ku Kandeshi Mbaneya hahobe na nami. 7#Kul 13:1-30.Shikati shiyo nekalile na myaka makumi anaa oho Moshesha mukamulimo wa Nyambi antumine kufuma ku Kandeshi Mbaneya mu kuhokela elye litunga. Naletele lushango lwa kupwisha kukwendi. 8Bantu aba nayile nabo, batinishile bantu betu. Ngoboni ami nombatalile na mutima wami nimwao kuli Nyambi ya Ngula, Nyambi yami. 9#Kul 14:24. Moshesha walihahile ngayi, ‘Mwa shikuma mukatambula litunga elye mwalyatile na mawulu wenu kwinga likona lyenu’, ndaba mwombatalile Nyambi ya Ngula, Nyambi yenu na mutima nimwawo. 10Haya, mona! Nyambi ya Ngula unandama, ngayi niyoye nikumeko ngonehe a kulupishile, niyo yengakale hi myaka 45 kubalika oho Ishalela ushili kuya na kupita mu libelelengwa, haya tilamina shino nili! Ami nili na myaka 85, 11kami nishili wakushuma na kulelo ngonehe nekalile oho antuminenga Moshesha. Nishili wakushuma shikuma ku nzita, hinge ku shuma shimo shashenge. 12Hayaboni, mpane litunga lya binkanda liya ankulupishile Nyambi ya Ngula ha mutena uyo. Obe niko wekalile, pe wayuvwile eshe bakakuhokela bamina bambile bya litunga lya binkanda, ngayi kuyo kwekala malengwalengwa atumbiwile ngayi Baanakimu, mu minzi yayinene ya twimbi. Kampe Nyambi ya Ngula ukekala hamo na nami, pe nikabatandamo, ngonehe ambile Nyambi ya Ngula.”
13Yoshuwa watandalishile Kalembu mwana Yefuna pe wamupanikile lukena lwa Hembuloni kwinga likona lyendi. 14Hembuloni ushili kwinga wa bazukulya Kalembu mwana Yefuna wa Kakenezi, ndaba wombatalile Nyambi ya Ngula, Nyambi wa Ishalela. 15Oho shilolo eshe shitendiwe, lukena lwa Hembuloni lwatumbiwile ngayi lukena lwa Alimba. Alimba wapanikiwile maleema shikuma kuli Baanakimu.
Haya kwekalile ku mwena mu litunga.
Libuka Lya Kuyela © Bible Society of Zambia, 2020.