Yakoba 3
3
Lulimi
1Bawushinda wami, hinga mwinga balongeshi babengi, hinga mwa limuka ngayi tukatambula kuyata kwa kupitakana. 2Ndaba mu byuma byabingi tukupukala nimwetu. Ndi muntu wamina wufwako kupukala ku lizu, ou mukakulembuluka, ukutwesha kami kumanga lutu nimwalwo. 3Monenu, tukuyaka lumingo mu tunwa twa bambishi, ngayi batwombatale, kami tukufutulula zinyutu zabo nimwazo. 4Monenu kami bishepe, nibyo hinge byabinene, bikupepuka na mpepo yayikali, bikufutuluka na lileenge lyalishelishe, oku akushinga mukakutwaminina. 5Nahiyo kami lulimi lwenga shimamo shashishe, lukulilundumika na byuma byabinene. Monenu, luhahi lwalushe lukubangiza lishaka lyalinenenene!
6Na lulimi lwenga mundilo, kaye ka kutengama, lulimi lwenga noho mukati ka bimamo byetu, ngayi luku bipisha lutu nimwalwo na ku bangiza nyendelo nimwayo! Nilwo lukubangiziwa ku ngehena. 7Ndaba mushobo nimwawo wa tuyamana na tuyoni na biya byalikokanga na bibumbwabumbwa bya mu liwate bikutambiwa ku bantu. 8Ngoboni lulimi kowa muntu ukutwesha kulutambisha. Nilwo lwenga shinkwange wamubi, lunenzala na wuhungu wakufwa. 9#Shit 1:26. Tukuyemeza nalwo Nyambi niye Tate na nilwo tukutukanisha bantu, aba batendiwile mu shifwekesha sha Nyambi. 10Mu kanwa kamo mu kufuma maleema na matuka. Bawushinda wami, byuma ebye kaliha biku fwanina kwinga noho. 11Kati lishima likutwesha kututwisha mema amawahe na mema amalulu mu lishima limo ndi? 12Kati bawushinda wami, mutondo wa mukuyu ukutwesha kuyima olive ndi? Hinga shinyanca shikutwesha kuyima nkuyu ndi? Hinga lishima likutwesha kututwisha mema a mushele na mema a kubombola.
13Yani mukangana na mukakanangatima hakati kenu? Shashiwahe amoneshe na nyinkalo yayiwahe milimo yendi na kulilimbwilisha kwa ngana. 14Ngoboni ndi muli na ntalu ya nkoko na nkani mu mitima yenu, hinga muliyemeza na kwongeza ku kupwisha. 15Kukeya oku kukubula ku shuluka kuyilu, ngoboni kwenga kwa litunga, kwa wuntu, kwa Shatana. 16Ndaba oku kuli ntalu na nkani, oku kuli mushunga na mulimo nimwawo wa wubi. 17Ngoboni ngana zinafumu kuyilu zenga za kuyela ha kutatika, nizo za ku mwena, za kubomba, kaliha za kalimbwilisho, za shikeketima na mbuto yayiwahe, za kubula shihota, za kubula shishweka. 18Mbuto ya kwoloka yikukubiwa mu ku mwena kukwabo ba kutenda ku mwena.
Libuka Lya Kuyela © Bible Society of Zambia, 2020.