Ishaya 5
5
Lwimbo lwaha mfuba ya shinyanca
1 #
Mat 21:33; Mako 12:1; Luka 20:9. Haya nikwimbilila muhoni,
lwimbo lukwamba bya mfuba yendi ya shinyanca.
Muhoni wekalile na mfuba ya shinyanca,
ha shinkanda sha wilo shikuma.
2Niho aliminemo naku fumishamo mamanya,
na ku shangamo mikolobozi ya shinyanca yayiwahe shikuma.
Wazikilemo kapeshi na kukabilamo liteke lya kuzongela shinyanca.
Niho atatililile ngayi abuye mikabo yayiwahe ya shinyanca,
ngoboni kwayimine mikabo yayishashu.
3Haya enu mwazika mu Yelushalema na bantu bamu Yunda, yatenu mukatiketu ami na mfuba yami ya shinyanca. 4Shumangani kami eshe nafwanina kutenda mu mfuba yami, eshe nabula kutenda? Oho natatililile ngayi nibuye mikabo yayiwahe ya shinyanca, haya shumangani kwayimine tuhu mikabo yayishashu?
5Haya nikumitongweza ebi nikatenda ku mfuba yami ya shinyanca. Nikafumisha mishimino yaku mfuba, ngayi mwanga mikolobozi yiliwe ku tuyamana, nikashiwula kembi kayo, pe mikolobozi bakayilyatangila hanci. 6Nikayilehelela na nyawe, kowa ukayiketwila mikolobozi hinge kukalimamo. Mikona na mapukumuna a mihongela akakulilamo. Nikambila makumbi ngayi hinga akalokeshelamo mvula.
7Litala lya Ishalela niyo mfuba ya shinyanca ya Nyambi wa Makunge,
Bantu ba Yunda niyo mikolobozi akunine.
Watatililile ngayi mwikale kupwisha,
ngoboni muli kuliziha.
Watatililile ngayi mwikale kulunga,
ngoboni mu kuyuvwanika mbingo za malwa.
Wubi wa Yunda na kushushula kukeza hahendi
8Makando wenu tawee, mu kulikungwila matala na kulanda mafuba kuwezelela kunebye muli nabyo, ngayi kubule mwanya wa baminenu, mwanga enu mukekale mu litunga ninkayenu. 9Nayuvwu Nyambi wa Makunge hamba ngayi, “Mwa shikuma matala amengi akashala nahiya, mitumbwe yayinene na wuwahe yikekala nahiya ya kubula bantu bakwikalamo.” 10Mafuba amanene a shinyanca akulingana Maeka likumi, akenzalisha tuhu waine ya kushinga kulingana malita 24. Tukote likumi twa mbuto ha shikati sha kuteza, tukenzalisha tuhu kakote kamo ka mpeka.
11Makando wenu tawee, mu kupinduka lumenemene shikuma na kuya na kushinga malovu a makaya na kukolwa shikuma mwana nimwawo kutwala naku wushiku kuleha bafwako. Hantu nekala na shipefu ku mutima. 12Kubimbo byenu, kuli tumbuli twatunene na twatushe na tuncingili na tunamitolilo na waine. Ngoboni mufwako kulifulankana ebi anatende Nyambi ya Ngula, hinge ku mona milimo ya maboko endi. 13Ndaba yanebye, bantu bami mukaya mu wuntapwa, ndaba ya kubula kalimukisho. Bantwamina benu bakafwa ku nzala, pe bantu ba nahiya, bakafwa ku linyontwa. 14Kalunga ka bafu, kali na nzala yenu, kanayahamishi kanwa kako shikuma. Ngayi mwanga kamine babilolo naminkuli na bantu ba nahiya ba kutenda miyoyo ya ku wahilila.
15Bantu bakashepeshiwa, muntu nimwendi ukombatalishiwa. Na meho a bakakuliyemeza akombatalishiwa. 16Ngoboni Nyambi wa Makunge ukayemeziwa mu kupwisha, pe Nyambi wa kuyela ukulimonesha niyemwine kwinga wa kuyela mu kulunga. 17Niho bana ba bambelele bakabuyila mu mabuyishilo, bana babampongo bakabuyila mu mapembe.
18Makando wenu tawee. Mu kukoka wubi na nyimbwa za mahalo. Mu kukoka kuluwa na nyimbwa za kupohela ngonehe Shikocikala. 19Enu mwambanga ngayi, “Lehenu Nyambi anyankupe na kutenda ebye anatoyo wangu, ngayi nanetu tumoneneko. Lehenu shifungo sha Nyambi wa kuyela wa Ishalela shihenyene hahepi. Tukushinga shize ngayi mwanga tushilimuke.”
20Makando wenu tawee. Mukutoya byabibi ngayi nibyo byabiwahe na byabiwahe ngayi byabibi. Mukufutula mincimpwe kwinga mwaana na mwaana kwinga mincimpwe. Mukutenda byabilulu kwinga byabitobe na byabitobe kwinga byabilulu.
21Makando wenu tawee. Mukulimona ngayi muli na ngana mu meho wenu na kwinga walikeyelela mu bihanganiko byenu.
22Makando wenu tawee. Enu balume bangovu mu kunwa waine. Balume bakakutwesha kuyema malovu amakali. 23Bakushambisha muka mulandu ndaba ya kupanikiwa lizika kanwa, kami mufwako kuyata bantu bakubula mulandu mu kupwisha. 24Nohobene haya ngonehe mundilo wahokeshanga ntende, kami ngonehe mwila wakuyuma wakuhoka wananganga, nahiyo kami mipishi yenu yikabola na ntemo zenu zikayuminina na kupepuka ngonehe lukungu. Munakana mulao wa Nyambi wa Makunge, kami munafutamini lizu lya wa Kuyela wa Ishalela. 25Nyambi ya Ngula unapilamini shikuma bantu bendi, pe watandubulu liboko lyendi hahabo ngayi abakame. Mapili akakanka na mituntu ya bantu babo yikapyukwama mu zinzila ngo bishwashwa. Hinge noho wukali wa Nyambi ya Ngula kukafwomoka wufwako na liboko lyendi lishili kukolobela mu kushushula.
26Nyambi ya Ngula ukayaka shilimukisho ku matunga akwakutali na ku wushibila mulozi ngayi ufume ku zinkumo za hano ha kaye. Pe monenu, bakeza wanguwangu na ku nyankupa. 27Hakati kabo kowa ukayuvwa kukwanga, hinge ukapukazala. Kowa ukakunoka, hinge kulala. Mikunzi yabo kukahenkenya yifwako, kowa ukekala na ncangwa za kufwa. 28Mivwi yabo yayitwe, bipando byabo bya mikunzi bya kunana shilumweza. Mpazi za bambishi babo zikashuma ngonehe mamanya na mawili a makoloyi wabo akafukumuka ngo kakundukundu. 29Kubuluma kwabo ngonehe shimbwi, Bakubuluma ngo bana bababimbwi. Bakubuluma mu wukali na kukwata mbuyo yabo, ba kutwala kami kowa wakutwesha ku bayangula.
30Ha mutena uyo bakabuluma ha Yunda ngonehe liwate likunkwancana. Kami ndi muntu ukupenza kunelye litunga, monenu, kukamoneka tuhu mincimpwe na makando. Kami mwaana ukashipa na makumbi.
Libuka Lya Kuyela © Bible Society of Zambia, 2020.