Ishaya 46
46
Banyambi ba Bambambiloni
1Mbelu nyambi yabo unawishiwili hanci,
kami Nembo nyambi yabo unanyekamishiwi,
tunankishi twa Mbambiloni#46:1 Mbambiloni: Mbeli na Nembo bengile banyambi bamo bamu Mbambiloni. tunatwikiwi
ha batuyamana na ha bimuna.
Miziho munayeke binamangiwili ha
myongo ya batuyamana aba banakwanga.
2Tunankishi twabo kutwesha kulipulwisha tufwako,
tukukwatiwa na kutwaliwa mu wuntapwa.
Awa niwo mamaninino a banyambi ba Mbambiloni.
3Nyuvwililenu, enu bazukulya Yakobo,
nimwenu enu mashaliza a litala lya Ishalela.
Namifulankanine ku balika ku shikati mwahemuwile,
namikatwile kumifumisha mu livumo.
4Kukuma naku wukulwane wenu nikekala,
Ami niye,
hantu munatubu nzimvwi, nikamikatulanga.
Namitendele, pe nikamishimbanga,
nikamikatulanga, pe nikamipulwisha.
5Kati mukamfwekesha nayani wakulyezeka na nami,
mu kumfwanikiza nayani, ngayi twezekele hamo?
6Bantu bamo ba kushukumuna ngolinde mu zimpamba zabo,
pe ba kufwanikiza ngolinde mu bipimo.
Bakwihana mfuzi pe ukubatendelaho nyambi,
niho ba kushintama hanci na kukalemesha.
7Bakukakatula na kukashimba ku bifuzi na kukatwala,
pe ba kukayaka mu mwanya wako, kakemanangamo.
Kukatwesha kuhenya muyo kafwako.
Hinge ndi muntu ukukabilikiza,
kutwesha kukumbula kafwako,
hinge kutwesha kumupulwisha ku wukalu kafwako.
8Anukenu eshe,
pe shiyakenu mu mitima,
shihanganikenu, enu bakawubi.
9Anukenu byuma bya ku mwaka,
ndaba Ami Nyambi, kowa wamina kami,
Mwa shikuma Ami Nyambi,
kowa wakulifwanikiza na nami.
10Kumabalikilo wabyo tuhu,
nalimukanga mamaninino wabyo,
ku balika kubikati bya kushikale,
nanebye bishili kwiza kumbili.
Nikwamba nehe ngayi,
Bifungo byami bikemana,
pe nikatenda nimwabyo ebye bikungwahilisha.
11Nikehana muntu wakufweka ngonehe kayoni wamukali ku mushamuko,
ku litunga lya kwakutali nikehanako mulume ukatwesha shifungo shami.
Eshe nambakale, nikashileta ngayi shimoneke,
Eshe nafungakale, nisho nikatenda.
12Nyuvwililenu, enu babakalu mitima,
enu mwabula kutwala mitima ku bya kulunga.
13Nili na kuleta kulunga kwami hahepi,
kaliha kuli hahatali,
kupulwishiwa kwami kaliha kukehalishiwa.
Nikapulwisha Ziyoni,
nikamonesha wuwahe wami ku Ishalela.
Libuka Lya Kuyela © Bible Society of Zambia, 2020.