Ishaya 34
34
Nyambi ukashushula bamalamo bendi
1Enu matunga, henyenenu kwakwipi,
muyuvwe enu bantu ba matunga, yuvwililenu.
Ba hano hanci yuvwililenu,
na nimwabyo byekalamo na biya nimwabyo byafumangamo.
2Nyambi ya Ngula unakalihili matunga nimwawo,
kami unapilamini bakanzita babo nimwabo,
ukabalobeshe kulungu, unabafungulu ku kuzihiwa.
3Mituntu yabo yikayumbiwa,
livumba lya zinyutu zabo likafushoka kunuka,
kami mapili akatampakana na mukeza wabo.
4 #
Mat 24:29; Mako 13:25; Luka 21:26; Kuh 6:13-14. Mutena na ngonda na nyenye bikamyongotoka,
pe liyilu likavungiwa ngo libuka lyavungiwanga.
Nyenye nimwazo zikapulumukila hanci,
ngonehe apulumukanga mabizi ku mukolobozi,
ngonehe mabizi apulumukanga ku mutondo wa mukuyu.
5 #
Isha 63:1-6; Yel 49:7-22; 35:1-15. Ndaba mukwale wami unanu ku mayilu pe unakolwo,
monenu, ukushulukila ha Endoma,
na kuyata bantu baya nalobeshele.
6Mukwale wa Nyambi ya Ngula,
unalilombo mu mukeza,
unatampakana na mazi,
na mukeza wa bambelele na bampongo,
na mazi aku mashiye a bikungwe.
Ndaba Nyambi ya Ngula uli na nkombela mu Mbozila,
na kuziha bimuna bankombela mu Endoma.
7Kami zingombe za lishaka bakafwila hamo nabo,
bana ba zingombe na bankunzi babanene.
Litunga lyabo lika hwenta na mukeza,
na limvu likamenca na mazi.
8Ndaba ou niwo mutena wakubweshela,
Nyambi ya Ngula akalamwina Ziyoni.
9Mishinzi ya Endoma yikafutuka lingongwe,
na limvu likafutuka muhenga,
litunga lyendi likenga lingongwe lya kubanga.
10Lifwako kukazimiwa wushiku na mwaana,
wishe walyo ukatutumanga mwaya myaka.
Pe bihemwinino byalyo bikaloba,
kowa eze akapitemo mwaya myaka.
11Ngoboni likenga litunga lya binkwehe na bishaka,
pe mukazika makungulu na makwangala.
Nyambi ya Ngula ukatandubula lunyimbwa lwaku vulanganya bantu mu litunga liyo,
kami kukekala mishunga hakati ka babilolo.
12Kukabula wene mu litunga liyo,
kami kukabula bana ba bamyene.
13Mihongela yikamena ha zinkena zawo,
katunga minganja na mutwampuku bikamene mu bipata byawo.
Ukenga mwanya wa bamimbwe na bayimpye.
14Batuyamana ba lishaka bakaliwaninamo na mitambwe,
bampongo ba lishaka bakalihana umo na wamina.
Makungulu wushiku akeza na kuliwanina mwanya wakukatalila.
15Likungulu ukatenda lihwa lyendi kuyo na kuyumbilamo mangi,
owo akateta na kulelela bana bendi mu mumvulu wa mbando zendi,
pe makubi akaliwana umo na wamina kuyo.
16Shingenu na kulaba mu libuka lya Nyambi ya Ngula,
kowa shimo sha nebye eze shikayongale,
kami kowa shikekala ninkayasho sha kubula mulume na mukazi.
Ndaba kanwa ka Nyambi ya Ngula
nisho kanapaniki zino ndayano kami
moyo wendi wa kuyela unakunguluzo.
17Nyambi ya Ngula na ba kunu nyela,
liboko lyendi likabatapila litunga na shipimisho sha lunyimbwa.
Olyo bakakona mwaya myaka,
na bihemwinino nimwabyo nimo bikekalenga.
Libuka Lya Kuyela © Bible Society of Zambia, 2020.