Mukakushimikila 3
3
Shuma na shuma na shikati shasho
1Byuma nimwabyo byekala na shikati na shikati sha byuma bikutendiwa hano hanci.
2Kwekala shikati sha kuhemuwa na shikati sha kufwa,
shikati sha kukuna na shikati sha kubuya biya bya kuniwa,
3shikati sha kuziha na shikati sha kunyongomanisha,
shikati sha kunyemuna na shikati sha kuzika.
4Kwekala shikati sha kulila na shikati sha kuhepa,
shikati sha malila na shikati sha ku shinda,
5shikati sha kwikala hamo na shikati sha kubula kwikala hamo#3:5 Shikati: Hinge kuli kutontolola kwakwingi ngoboni kumina ngayi kupanzanisha mamanya lizu elye mu shihebelu likutontolola bya ku wulili.
shikati sha kulibumbatila na shikati sha kubula kulibumbatila.
6Kwekala shikati sha kushinga na shikati sha kuyongala,
shikati sha kukoweza na shikati sha ku shandola,
7shikati sha kutabola na shikati sha kutunga,
shikati sha ku mwena na shikati sha kwamba.
8Kwekala shikati sha ku haka na shikati sha kuzimba,
shikati sha nzita na shikati sha ku mwena.
9Kati muka mulimo ukawana bishini ku mulimo wendi? 10Namono miziho yiya Nyambi anapana ku bana ba bantu ngayi bayakakane nayo. 11Nyambi unatende byuma nimwabyo kwinga byabiwahe ha shikati shabyo, kami unayaka bifungo kukwetu bya kulimuka bya kumbili ngoboni shilolo atupanike ku yuvwishisha kunebye atendele ha kutatika naku mamaninino.
12Nalimuku ngayi kowa shuma shashiwahe eshe bantu ba kutwesha kutenda ndele tuhu ku wahilila na kulikuwa nibo bamwine shikati bashili kuyoya, 13kami shenga shishemo sha Nyambi ngayi bantu nimwabo ba ku fwanina kulya na kunwa na ku wahilila mu mitima ku milimo yendi nimwayo.
14Nikulimuka ngayi byuma nimwabyo atendele Nyambi bikekala mwaya myaka, kowa shuma shikayakiwilako hinge kufumishiwako. Nyambi niye washingile ngayi shitendiwe noho, mwanga bantu bakamuyuvwile bowa. 15Shuma shiku moneka lelo naku mwaka shamonekele kami eshe shiliko lelo naku mwaka shekalileko, kami Nyambi ukashinga ebye byatendiwile mwaka ngayi biboke.#3:15Biboke: Mu shihebelu beshi eye yifwako kuyuvwanika shiwahe.
Shihota mu Kaye
16Natoshele shuma shamina hano hanci ku mwanya wakuyatila, nimo mwekalile bya kuluwa na mumwanya wa bakulunga mwekalile bakuluwa. 17Nalyambashanine mu mutima wami ngayi, “Nyambi ukayata bakulunga na bakuluwa, ndaba wayakile shikati sha byuma nimwabyo na shikati sha kuyata milimo nimwayo.” 18Nalyambashanine mu mutima wami kami ngayi, “Haya Nyambi unakwezeka bana ba bantu na kubamonesha ngayi nibo banengi ngonehe batuyamana.” 19Ebye bikwizilila bantu nibyo kami bikwizilila batuyamana, eshe akufwa muntu nakayamana kami nisho akufwa. Nimwabo bali na kwoya mpepo yimo. Kami muntu kupitakana batuyamana wufwako, ndaba ebye nimwabyo bifwako kukayikalilila. 20Nimwabo bakaya ku mwanya umo, nimwabo bafuma ku lukungu, kami bakaboka ku lukungu. 21Kati yani ukutwesha kulimuka ngayi moyo wa muntu wayanga kuyilu na moyo wa kayamana wayanga hanci mu nceto ya limvu? 22Niho namonene ngayi shinafwanini ku muntu kulikuwa bya mulimo wendi, ndaba niyo yinengi ncuungu yendi, kati yani ukamubwesha ngayi akatweshe ku mona ebye bikekalako munyima ya lufu lwendi?
Libuka Lya Kuyela © Bible Society of Zambia, 2020.