2 Pita 2
2
Bakakulongesha bya mahalo
1Ngoboni kwekalile kami bamiluwe ba mahalo mukati ka bantu, ngonehe kukekala balongeshi ba mahalo mukati kenu. Bakeza kuwi na kuleta ku longesha kwa mahalo, hinge Mwene ou wabalandile bakamukana na kulikokela kuloba kwa wanguwangu. 2Babengi bakakonka mu zinzila zabo za mazilo, pe ndaba yabo bantu babengi baka kana nzila ya kupwisha. 3Ndaba ya mutongo wabo, bakamyongeza na mazu a mahalo, kufuma ku mwaka kuyata kwabo kufwako kwihala, kami banatatilili kuloba kwabo.
4Ndaba ndi Nyambi wabulile kutetelela mangeloyi oho atendele wubi, ngoboni wayumbilile mu ngehena, niho wayakile mu liteke lya mincimpwe, kutatilila kuyata. 5#Shit 6:1—7:24. Ndi Nyambi wabulile kutetelela kaye ka mwaka, oho aletele libazi ha kaye ku bakawubi, ngoboni wapulwishile Nowa mukakushimikila kwoloka na bantu mutanu na babili. 6#Shit 19:24. Ndi Nyambi wayatile zinkena za Shondoma na Ngomola ha kubalobesha na mundilo na ku bafutula kwinga shifwanikizo shikatendiwa ku bakamashewinizi. 7#Shit 19:1-16. Ndi Nyambi walamwinine Lote muntu wakwoloka, ou wayuvwile lisheni na ntendelo ya mazilo ya bakawubi, 8ndaba ou muntu wakwoloka wekalilenga mukati kabo, wakalikizilenga shikuma mu moyo ha mutena ha mutena oho amonenenga biheka na ntendelo yabo ya kubula ku fwanina. 9Ndi ngayi eshe shili noho Mwene ukulimuka kulamwina bantu ba Wunyambi ku byezeko na kulama bakawubi kutatilila Mutena wa Kuyata, 10shinene aba ba kukonka mahungu a mazilo a wuntu na kukana ngovu za Nyambi.
Aba balongeshi ba mahalo bakwamba na kukanca na kuliyemeza, bafwako kutina kutungula bakakutenda byabiwahe, 11Ngoboni mangeloyi, hinge ali na nyala na ngovu zazinene, a kubula ku bayatisha na lihandu ku meho a Mwene. 12Ngoboni aba bantu balihandu ku yuvwishisha bafwako, bakufweka ngo tuyamana twa mu lishaka twa kubula ngana, twahemuwilile kukwatiwa na kuzihiwa, bakuhandula byuma ebye bakubula ku yuvwishisha, bakalobeshiwa ngonehe tuya tuyamana. 13Bakatambula shitapilo sha makando awa baletele. Bakuhanganika ngayi ku wahilila kwikala na ngwaluke ha shikati sha mwana. Banengi byowa kami bali na shihepwa, hinge ndi ba kulifungila nenu ku shimbo sha mayambwayambwa ngoboni ba ku wahilila mu zinzila za kwongeza. 14Bali na meho anenzala na wunjenge, bafwako kuleha kutenda wubi. Bakwongeza bakakubula ku shumankana, bali na mitima yinalilongeshe bya mutongo, banakutiwi! 15#Kul 22:4-35. Banayongo ndaba bashanuku mu nzila yayiwahe, banakonko nzila ya Mbalaamu mwana Mbeyola, mukakushinga kuwana nkambiko mu byuma byabibi. 16Ngoboni bamukalihilile ndaba ya Kubipisha kwendi, mwana mbongolo wambile na lizu lya wuntu, kami wakanishile kupempela kwa muluwe.
17Aba bantu banengi tushinzi twa kubula mema na mbundu yikupepuka na nkuli, banabaholekele mincimpwe. 18Oho bakwamba mazu owa amanene a kulilundumika, bakwongeza na mahungu a wuntu, aba banapanza kukwabo aba ba kuyoya mu wubi. 19Baku ba kulupisha ku shoboloka, ngoboni nibo hinga benga bandungo ba biheka bya mazilo ndaba muntu ukwinga ndungo ku shuma nimwasho shinamukoneneke. 20Ndaba hinga oho banapanza ku biheka bya mazilo bya kaye, ha kulimuka Mwene na Mupulwishi Yeshu Kilishitu, ndi ba kupocakaniwa kami kukwabyo na kukomiwa kwinga bandungo, mamaninino abo akapitakana nyinkalo yabo ya muntazi. 21Ndaba shashiwahe kukwabo shinga kaliha balimukile nzila ya kwoloka, kupitakana ngayi munyima ya kulimuka ndayano, hiba kufutamina ndayano za kuyela zapanikiwile kukwabo. 22#Zinc 26:11. Shinatendiwi kukwabo kuya na zinguli zikwamba kupwisha ngayi, “Kawa nabokele ebye analuku. Ngulube unayoweshiwi unabokele ku kulitaka mu ntiti.”
Libuka Lya Kuyela © Bible Society of Zambia, 2020.