TSABURI 76
76
Nyasaye Neye Ukuuranga Liihe
1Nyasaye wamanyikhana mu lusomo lwa Yuda;
Lira lielie lili ni tsingulu mu Israeli.
2Hango hehe hali mu litaala likali lia Yerusalemi;
amenyanga mu Shikulu shia Sayoni.
3Yameneekelayo mivanu chiu mutsiku,
tsingavo tsiavo nende vivavi, nende viuchi viavo viliihe viosi.
4Nyasaye, uli nu vukhumi vunyishi vurina!
Uli ukhuchenyinya lukalukhanga khurula mu vikulu ha wakuurila vatsiku vovo.
5Vasikali vavo viliihe vamanya khukwana vanuulilwi vindu viosi via vali navio
khali vamali khukhutsa;
tsingulu tsiavo shitsiavakhonyakhu tawe.
6Yivi Nyasaye wa Yakobo, lwa wakondekha,
tsifarasi nende vahili vatsio vakwa hasi nivakhutsa.
7Nivi wonyene unyala khurilwa;
ni viina wakhasinjila himbi nivi nuli nu vurima?
8Nivi walomba khukhalaaka khwokhwo khumanyikhana nuli mwikulu;
vandu vu mu shivala varia nivahonjela.
9Lwa wasinjila nu wenya khukhalachila vandu,
khuhonyinya voosi vanyashitswangwa mu shivala.
10Ni kilikali, vuhimwa vwa vandu vuchilanga witsominywa,
khandi yavo valiitsa khwihonolokha khurula mu vurima vwovwo
valiitsa khukhusaala khumatukhu koko ku mulukha.
11Muhe Mwami Nyasaye vindu via mwamulaaka;
mulereli vihanwa munyi vandu vi tsimbia tsia hahimbi.
Nyasaye alombanga vandu vamuria;
12akholanga vamihi vilola vava vichehitsi
khandi atechelitsa vami vamanyikhana.
© The Bible Society of Kenya, 2013