LWIKHULU 3
3
Lisuuvilitswa mu Linyakhana
1Ninzi wa yivi Nyasaye wasalilitsa muno
khurulana khu indovoshi yu vululu vwovwo.
2Nivi wakhunga numbila mu shisuundi
ha vulavu vwosi vukhatukhanga tawe.
3Ni kilikali, ninzi wonyene wa wasalilitsa,
nivi wasalilitsanga shia litukhu.
4Nivi wachila ning'aha mmbili,
khandi nundong'ola makuumba.
5Nivi wangwana khandi numbotokhana
khuvirila khu linyakhana nende matiinyu.
6Wachila khali menyanga mu shisuundi,
khuli vandu vakhutsa khale.
7Nivi wanzikalila ni lisisi khuvula khwilukha;
wamboha ni minyololo militoho.
8Khali niiva saalanga khuye nindeva akhonye;
wayambakhana khuhulishitsa lisaala lianje.
9Nivi wikala injila yanje ni michina mikali;
washiaminya muhaanda kwanje.
10Nivi wakwa khuli likunyuli likonekhanga shindu,
inoho isimba yivisa mumbulimu.
11Nivi wandulitsa khu injila yanje wa numakanyinya mu vitonye;
wanzivala vutswa vuchila tsingulu.
12Nivi wakhumbula vura vwevwe,
manindolekha khuli shindu shia yenyanga
khulesa nu muvanu kwekwe.
13Nivi walivira mu mwoyo kwanje nu muvanu,
kwa warulitsa mushiula shieshie.
14Nakwa khuli shindu shia vandu voosi vakholelanga shihenye henye,
vimbanga lwimbo lu khuseshelela khulitukhu liosi.
15Nivi wanzikuritsa vutsuni mu mwoyo kwanje,
wanyanyinya indula.
16Nyasaye wanomba menenanga tsimbuyi,
khandi wanomba ngalakalaanga mu likooshe.
17Mbulakhu milembe chiosi,
nayivilila khuva nu vuyaanzi.
18Khulwa yako, mbolanga,
“Lisuuvilitswa lianje liamala khuvwa,
ka nalindililanga khu Mwami Nyasaye kakora.”
19Lwa nzitsushitsanga khuli ndi mu vutiinyu
khandi khuli nyakhananga
khunombanga khulia shilulu nende induli!
20Nzitsushitsanga shia khase khosi vindu vienevo,
mamba nu vuveleli mu mwoyo.
21Navutswa ni shindu shilala shianganakananga,
khandi ndi ni lisuuvilitswa;
22Ndi vuyaanzi vwi mihika ni mihika vu Mwami Nyasaye shiuvuvwetsanga tawe;
tsimbavasi tsietsie tsiliho khumatukhu koosi.
23Tsimbavasi tsietsie tsili ni tsingulu shia khase khosi;
neye musuuvilwa watoto.
24Nganakananga mu mwoyo nimbola,
“Mwami Nyasaye ni livishilu lianje;
niitsa khuvikha lisuuvilitswa lianje muye.”
25Mwami Nyasaye nu mulahi khu yavo vali ni lisuuvilitswa muye,
khu mioyo chia vandu vamukhavanga.
26Nu vulahi mundu khulindilila mu vwikhutsili;
Mwami Nyasaye khumuhonyinya.
27Nu vulahi mundu khweka khwikhutsila
mumatukhu kashili muvukha.
28Nu vulahi khwikhala wonyene nuhonjeli,
lwa matiinyu khurula khu Nyasaye ka khukwilanga.
29Nu vulahi khwichehitsa,
shichila lisuuvilitswa lishiliho.
30Haana luseye khu woyo wenyanga khukhusamula,
wirecheshele manyeko keke.
31Shichila Mwami Nyasaye aliitsa khuvula
khukhwambakhana mihika ni mihika.
32Navutswa khali niiva neye uchilanga nu khunyakhana,
aliitsa khukhulolela khandi tsimbavasi
khulondokhana khu vunyishi vu vuyaanzi vwevwe.
33Shiayaanzililanga khumusalilitsa
inoho khuvelelitsa mioyo chia vandu tawe.
34Atuuvachilanga hasi
vavohe voosi mu shivala shinu,
35lwa vandu vavula khurweshitsilwa katoto
imbeli wa Nyasaye Uli Ikulu khu Viosi,
36lwa mundu yihonelwangwa mushiina --
ni kilikali, Mwami Nyasaye anyala khuva wakhaywa khulola nikakholekha?
37Ni viina unyala khuhaana lilako shindu khwikholekha,
Mwami Nyasaye nashili khuviritsa kikholeshe kario?
38Shindu shilahi nende shitamanu
viosi vikholekhanga khurulana khu lilako lia Nyasaye Uli Ikulu khu Viosi.
39Shichila shina mundu uli mwoyo yilililanga,
lwa asalilitswangwa shichila vwoni vwevwe?
40Chendi khwichelitsi nu khurunishitsa likhola lieru,
khulu khukalukha khu Mwami Nyasaye!
41Chendi khwihaane nu mwoyo kwosi,
nu khuchinga makhono keru khu Nyasaye wu mwikulu.
42“Yivi Mwami Nyasaye,
khwakhola vwoni imbeli wowo khandi khuli vahingani,
navutswa ushili khukhusemeha.
43“Nivi wakhuhitsanyinya mu vurima vwovwo,
lwa wa khwiira vuchila khukhuvela tsimbavasi.
44Wayivisa mu malesi malitoho,
khali lisaala lieru shilitukhanga khu yivi tawe.
45Wakhukhola khuva khuli shituma shi indakala
mu vandu vi tsimbia tsindi tsiosi.
46“Vatsiku veru voosi
valomolomanga vindu vitamanu khu khutsi.
47Liheenda mwoyo nu khutivitswa khwakhulondelela,
khwamenya mu maraava nu khurishitswa.”
48Miliika minyishi chiamenya nichiroonyanga
khurula mu tsimoni mwanje
shichila vandu vaanje vativitswa.
49“Miliika chilatsililila khuroonya
khurula mu tsimoni mwanje, vuchila khusinjila,
50khutukha lwa Mwami Nyasaye wu mwikulu
aheenza hasi alole kakholekhanga.
51Vindu via ndolanga ni tsimoni tsianje
ni vikholekha vinyashitsanga mwoyo kwanje,
shichila makhuva kikholekhanga khu vakhali vi litaala likali.
52“Mbitsanyinywa khuli linyonyi,
na vatsiku vaanje vuchila shivune shiosi.
53Vasiuva mu vwina nishili mwoyo,
nivandesa na machina.
54Matsi karaanga khukhunikha khu murwi;
nimbola, ‘Mali khukhutsa.’
55“Yivi Mwami Nyasaye,
nasaala khuvirila mu lira liolio,
nindi mukari hasi hene mu vwina.
56Nivi wahulila khuli nakhusaya nimbola,
‘Uhulishitsi lisaala lianje liu khwenya ukhonye,
ukholele ka khureevi.’
57Nivi wisuunda himbi khwinzi lwa nasaala khu yivi;
numbolela, ‘Nuyaanza lekha khuria!’
58“Mwami Nyasaye,
nivi mukhalachi wanje khunzalila mushiina,
lwa wambonyinya.
59Mwami Nyasaye,
nivi walola vindu vitamanu viakholekha khwinzi;
wakhola vulahi nungalushila!
60Nivi walola khuli vatsiku vambimanga,
khandi khuli vanzikhalilanga khunziira.
61“Mwami Nyasaye,
nivi wahulila khuli vanyekanga,
khandi khuli valoshitsa khukhola.
62Vatsiku vaanje valomolomanga nivanganakanila
vindu vitamanu khulitukhu liosi.
63Khali isaa yosi ya vakhola muhinzilu kwavo,
ninzi wa vamenya nivakholelanga shihenye henye mu tsinyimbo tsiavo.
64“Yivi Mwami Nyasaye,
vanzila ka vakhola,
khulondokhana khu muhinzilu kwavo vene.
65Vakhole khuva vahaaka khu vanyakhane mu mioyo;
khu shilaamo shioshio khuvakwila!
66Vahitsanyinye mu vurima vwovwo, khuvativitsa,
nu khuvamulula khurula mu shivala.”
© The Bible Society of Kenya, 2013