YOSHWA 21
21
Mataala Kuluhia lwa Levi Vaheelwa
1Vimilili va vandu vi tsinzu tsia vandu vu lwivulu lwa Levi vatsia khu musalisi Eliazari, Yoshwa mwana wa Nuni, khandi khu vimilili vi tsinzu tsi tsimbia tsiosi tsia Israeli. 2Vasimukha nivatsia khuvo mu litaala lia Shilo mu shivala shia Kanaani, nivavavoolela, “Mwami Nyasaye yavoola khuvirila khu Musa ndi khutukha khuheelwi mataala ka khunyala khumenyamu, khali havundu ha vanyala khwayitsa miruku chieru.” 3Khulondokhana khuli Mwami Nyasaye yali niyavoolela Vaisraeli vakhole, vahaana khu vandu vu lwivulu lwa Levi, mataala katsitsanga khurovwa yaka, khandi havundu ha vanyala khwayitsa miruku chiavo khurula mu tsisomo tsiavo vene.
4Vandu vi tsinzu tsia vandu vu lwivulu lwa Levi vu lwivuli lwa Kohaatsi, navo vali vu khuraanga khuheelwa mataala. Vitsukhulu vu musalisi Haruni, vaheelwa mataala likhomi na kavaka khurula mu tsisomo tsia vandu vi tsimbia tsia Yuda, Simioni, nende Benyamini. 5Vandu vali nivarikale khurula mu vandu vu lwivulu lwa Kohaatsi, vaheelwa mataala likhomi khurula mu tsisomo tsia vandu vi tsimbia tsia Efurahimu, Dani, nende inusu ya vandu vuluhia khuluveka luli imbo wa Manaase. 6Vandu vu lwivulu lwa Gerishoni, vaheelwa mataala likhomi na kavaka, khurula mu tsisomo tsia vandu vi tsimbia tsia Isakari, Asheri, Nafutali, nende inusu ya vandu vuluhia lwa Manaase, khuluveka luli ivukwi.
7Vandu vu lwivulu lwa Merari, vaheelwa mataala likhomi na kavili, khurula mu tsisomo tsia vandu vi tsimbia tsia Rubeni, Gadi nende Zabuloni.
8Vaisraeli vahaana mataala kenako nende havundu ha vanyala khwayitsa miruku chiavo khu vandu vu lwivulu lwa Levi, khuvirila khu ikura, khuli Mwami Nyasaye yali niyavoola vakhole khuvirila khu Musa.
9Yaka nako mira ka mataala khurula mu tsisomo tsia vandu vi tsimbia tsia Yuda nende Simioni kaheelwa 10vitsukhulu va Haruni vu lwivulu lwa Kohaatsi, varula mu vandu vu lwivulu lwa Levi. Navo vali vu khuraanga khuheelwa. 11Vaheelwa litaala lia Araba (Araba yali tata wa Anaki), lilaangwangwa nunundi Heburoni, lili mu shivala shi vikulu shia Yuda, halala na havundu ha vanyala khwayitsa miruku chiavo himbi khulio. 12Navutswa milimi chi litaala lienelo, halala ni michitsi chiliho himbi, viali viaheelwa Kalebu mwana wa Yefuna khuva vievie mwene.
13Vahaana khu vitsukhulu va Haruni mataala ka Heburoni (litaala liu khwilushilamu), Libuna, 14Yatiri, Eshitemoha, 15Holoni, Debiri, 16Ahini, Yuta, nende Betsi-shemeshi, nende havundu ha vanyala khwayitsa miruku chiavo. Kali mataala tisa khurula mu tsisomo tsia vandu vi tsimbia tsia Yuda nende Simioni; 17vaheelwa khandi khurula mu lusomo lwa Benyamini mataala ka Gibioni, Geba, 18Anatsotsi, nende Alumoni, nende havundu ha vanyala khwayitsa miruku chiavo. 19Mataala koosi ka vasalisi, vitsukhulu va Haruni kali likhomi na kavaka, nende havundu ha vanyala khwayitsa miruku chiavo.
20Vandu vi tsinzu tsindi tsiali nitsirikale, tsia vandu vu lwivulu lwa Levi tsia Kohaatsi vaheelwa mataala malala khurula mu lusomo lwa Efurahimu. 21Vaheelwa mataala kane, nikali Shekemu halala nu havundu ha vanyala khwayitsa miruku mu shivala shi vikulu shia Efurahimu, nilili lilala khu mataala ku khwilushilamu, Gezeri, 22Kibuzahimu, nende Betsi Horoni, nende havundu ha vanyala khwayitsa miruku chiavo. 23Vaheelwa khandi khurula mu vandu vuluhia lwa Dani mataala kane ka Elutekeha, Gibetsoni, 24Ahiyaloni, nende Gatsi-rimoni, nende havundu ha vanyala khwayitsa miruku chiavo. 25Vaheelwa mataala kavili khurula khuluveka luli imbo mu lusomo lwa Manaase. Mataala kenako kali Tanaki nende Gatsi-rimoni, nende havundu ha vanyala khwayitsa miruku chiavo. 26Vandu varulanga mu vandu vu lwivulu lwa Kohaatsi lwenelo, vaheelwa mataala koosi likhomi, nende havundu ha vanyala khwayitsa miruku chiavo.
27Shituma shindi shia vandu vu lwivulu lwa Levi vu lwivulu lwa Gerishoni, vaheelwa mataala kavili khurula mu lusomo khuluveka luli ivukwi wa Manaase. Mataala kenako kali Golani lili Bashani (lilala khu mataala ku khwilushilamu) nende Beheshutera, nende havundu ha vanyala khwayitsa miruku chiavo. 28Vaheelwa mataala kane khurula mu lusomo lwa Isakari. Mataala kenako kali Kishihoni, Daberatsi, 29Yarumutsi, nende En Ganimu, nende havundu ha vanyala khwayitsa miruku chiavo. 30Vaheelwa mataala kane khurula mu lusomo lwa Asheri. Mataala kenako kali Mishali, Abudoni, 31Helikatsi, nende Rehobu, nende havundu ha vanyala khwayitsa miruku chiavo. 32Vaheelwa mataala kavaka khurula mu lusomo lwa Nafutali nikali Kedeshi lili Galilaya, nende havundu ha vanyala khwayitsa miruku chiavo (lilala khu mataala ku khwilushilamu), Hamotsi, Dori, nende Karutani, nende havundu ha vanyala khwayitsa miruku chiavo. 33Mataala koosi ku lwivulu lwa Gerishoni vaheelwa kali likhomi na kavaka, nende havundu ha vanyala khwayitsa miruku chiavo.
34Vandu vuluhia lwa Levi varikala, vu lwivulu lwa Merari, vaheelwa mataala kane khurula mu lusomo lwa Zabuloni. Mataala kenako kali Yokunehamu, Karuta, 35Dimuna, nende Nahalalu, nende havundu ha vanyala khwayitsa miruku chiavo. 36Vaheelwa mataala kane khurula mu lusomo lwa Rubeni. Mataala kenako kali Bezeri, Yahazi, 37Kedemotsi, nende Mefahatsi, nende havundu ha vanyala khwayitsa miruku chiavo. 38Vaheelwa mataala kane khurula mu vandu vuluhia lwa Gadi. Mataala kenako kali Ramotsi mu lusomo lwa Gileadi (lilala khu mataala ku khwilushilamu), Mahanahimu, 39Heshiboni nende Yazeri, nende havundu ha vanyala khwayitsa miruku chiavo. 40Khulwa yako, lwivulu lwa Merari lwaheelwa mataala likhomi na kavili koosi.
41Mataala koosi ka vandu vu lwivulu lwa Levi mu lusomo lwa Vaisraeli vamenyamu kali makhomi kane na munane, nende havundu ha vanyala khwayitsa miruku chiavo. 42Shia litaala khu mataala kenako, liali nu havundu ha vanyala khwayitsa miruku chiavo himbi khulio; ndio mataala koosi kali.
Vaisraeli Vavukula Shivala Shiosi
43Khulwa yako, Mwami Nyasaye yaha Vaisraeli shivala shia yali niyalaaka, aliitsa khuha vakuuka vavo. Lwa vali nivashivukuli, vamenya mu shivala shienesho. 44Mwami Nyasaye yachila, nivamenya mu milembe shia havundu hosi mu shivala shienesho, khuli yali niyalaaka vakuuka vavo. Mundu avulakhuho, khali mulala khu vatsiku vavo wali unyala khuvakuura, shichila Mwami Nyasaye yaha Vaisraeli tsingulu tsiu khukuura vatsiku vavo voosi. 45Mwami Nyasaye yarweshitsa shia lilaaka liosi, lia yali niyalaaka Vaisraeli.
© The Bible Society of Kenya, 2013