AYUBU 3
3
Khuli Ayubu Yililila khu Nyasaye
1Matukhu mati nikakhavira, Ayubu yalomoloma, nalaama litukhu lia yivulwa. 2Ayubu yavoola,
3“Litukhu lia nivulwa litivitswi;
vutukhu vwa kavoolekha,
‘Mwana vi shiyayi umali khuvelekhwa.’
4Shisuundii shimwaminyili litukhu lienelo!
Nyasaye wikulu alekhane nalio,
khali vulavu vuvuli khuliashila!
5Likwi liu khutuunya ni shisuundi;
malesi malitoho kalikhunishi;
khali shisuundi shilechelele vulavu.
6Vutukhu vwenovo -- shisuundi shikali shilimwaminyi,
livuli khwitsushitswa khuli lilala mumatukhu ku khumuhika,
inoho khuva lilala khu mieli.
7Nu vulahi vutukhu vwenovo nuvuvele khuli mukhali mukuumba;
khali liyooko liu vuyaanzi livuli khuhulilikhana khulio.
8Nu vulahi vandu valilaama nivalaami litukhu lienelo,
vali nu vucheli vukhulindula Leviatsani.
9Nu vulahi tsinyining'ini tsialio tsiu mu mavwevwe nitsivuli khwakha,
khulindilila vulavu, navutswa vuvuli khuliashila,
inoho khali khuvula khuvushelela mu mavwevwe;
10shichila liachila ninzivulwa,
khandi nilivula khunzikalila khurula mu vutiinyu.
11Shichila shina nimbula khukhutsa khulitukhu lia nivulwa,
khurula munda mwa mama wanje nu khukora?
12Shichila shina mama wanje nanzivula?
Shichila shina ninunyinywa?
13Khani nakhutsila mu milembe,
khani nayeveelwa ngonanga nimbulukha;
14halala na vami nende vamihi khulilova khunu,
viyumbashila tsinzu tsiu vwami tsiapomolanyinywa;
15inoho halala na vimilili vavetsakhu ni itsahabu,
vali nivitsulitsa ifetsa inyishi mu tsinzu tsiavo.
16Inoho, shichila shina nimbula khuhululwa,
khuli indaana yakhutsa vuchila khulolakhu vulavu?
17Vandu vatamanu vavulakhu mundu wa vanyashitsayo,
khali vandu vavula tsingulu vahulushilayo.
18Khali vavohe nivalakhule iweneyo;
vavulakhu liyooko lia vahulilanga khurula khu muruchi wavo.
19Vakali khu vati valiyo,
khali murukwa nu muvoholole khurula khu muruchi wewe.
20Shichila shina vulavu vwashilanga mundu uli mu vutiinyu,
khali vulamu khu woyo unyakhananga mu mwoyo,
21mundu wikombanga likhutsa, navutswa livulakhuho,
nu khulikhavilitsa khushila muno, khuvira livishilu liaviswa;
22mundu usangalanga khushila muno,
khali ava nu vuyaanzi niyakhayeveelwa mu shilindwa?
23Shichila shina vulavu vwashilanga mundu wikalilwa injila,
mundu wa Nyasaye yakhumbelitsa?
24Miikha chia nzayulanga nashio shiukhulia shianje;
khandi ndilanga nindonya miliika khuli matsi.
25Ka naritsanga nako ka nanyola;
ka naheendelanga mwoyo nako kangwila.
26Mbulakhu milembe chiosi, lihonjela livulakhuho;
lihulukha livulakhuho, navutswa vutiinyu vwanyola.”
© The Bible Society of Kenya, 2013