YAKOBO 5
5
Makhuva ku Khuchelihitsa Vandu Vahinda
1Munyi vandu vahinda, mbulishitsi nunundi! Mwikhule numulila, shichila vutiinyu vutsitsanga khumukwila! 2Miandu chienyu chiamala khukuunda khale; khandi tsinguyi tsiamala khulia tsinguvu tsienyu. 3Ifetsa nende itsahabu yenyu viakholwa vuruluvembe; khandi vuruluvembe vwenovo, vuli khuli vushiahidi khu munyi, khandi vuliitsa khusamba mivili chienyu khuli mulilu. Mwayivishila miandu minyishi mumatukhu kukhumalilikha kanu. 4Mwayambakhana khurunga vandu vakholanga mihinzilu mu milimi chienyu mirungu chiavo. Hulishitsi khuli vikananga! Khulila khwa vandu vamukhonyanga khuchesa viraakwa vienyu, khwatukha khu Nyasaye, uli Mwami Nyasaye. 5Mwamenyanga mu shivala shinu mu limenya lilahi, khandi liu khuyaanzitsa likomba li mivili chienyu. Mwakhomeela mivili chienyu mumatukhu ku khusinzwa. 6Mwakhalachila khandi numwiira mundu wakholanga ku vulunji, vuchila khumuhinganyinya munyi.
Khwikhutsila nu Khusaala
7Khulwa yako, vasuuvili vashianje, muve ni likhutsila khutukha lu Mwami aliitsa khukalukha. Loli khuli mulimi yikhutsilanga, lwa alindililanga alole mulimi kwekwe nukwami viraakwa vilahi. Alindililanga ni likhutsila imbula yu khuraanga yaraachilamu nende imbula yi shiuvwi yu khucheselamu. 8Khali munyi khandi, muve ni likhutsila. Mutsililile khuva ni lisuuvilitswa linyishi, shichila litukhu liu Mwami aliitsa khukalukha lili himbi khutukha.
9Vasuuvili vashianje, muvuli khwililila vene khuvene, khu Nyasaye avuli khumukhalachila. Mukhalachi ali himbi, wayirechekha khulolekha. 10Vasuuvili vashianje, mwitsushitse vaprofeti valomoloma khuvirila mu lira liu Mwami Nyasaye. Muvavukuli khuli vimanyilu viu khwikhutsila, lwa muliitsa khunyakhananga. 11Khali ndio, khuvavukuli khuva ni tsikhaavi, shichila vikhutsila. Mwahulila makhuva khulondokhana khuli Ayubu yikhutsila, khandi mwalola ku Mwami Nyasaye yamulerela lukhumalilikha. Mwami Nyasaye wayitsula tsimbavasi khandi avelanga tsimbavasi tsinyishi.
12Khuvira shia shindu shiosi, munyi vasuuvili vashianje, muvuli khwisuuha lwa mulombanga lilaaka. Muvuli khwisuuha khuvirila khu likulu inoho khuvirila khulilova inoho khuvirila khu shindu shindi shiosi. Muvoole vutswa “Khuhuchilile” nu muvoolanga muhuchilile, inoho “Khwambakhane” nu muvoolanga mwambakhane, khu Nyasaye alivula khumukhalachila.
13Mundu anyala khuva alikhuho mu munyi unyakhananga? Nu vulahi asaale. Mundu anyala khuva alikhuho mu munyi uli nu vuyaanzi? Yenyekhanga araanje khwimba tsinyimbo tsiu khwitsominya. 14Mundu anyala khuva alikhuho mu munyi ulwalanga? Yenyekhanga arumane vimilili vi likanisa khwitsa khumusaalila nu khumuvekha makura ku musayituni khuvirila mu lira liu Mwami. 15Lisaala lia vandu vasaalanga mu lisuuvila linyala khuhonyinya mundu ulwalanga. Mwami aliitsa khukhola mundu ulwalanga khuva mulamu, nu khumusemeha, niiva wakhola vwoni. 16Khulwa yako, muvoolelane havulavu vwoni vwa mwakhola; khandi musaalilane vene khuvene, khu mulihonyinywa. Lisaala liu mundu wi likhola liu vulunji, lili ni tsingulu tsiu khurweshitsa shindu. 17Eliya yali mundu khuli khutsi muliiva lieru. Yasaala nu mwoyo kwosi ndi imbula ivuli khukhuva. Imbula yakora mu shivala khumihika chivaka nende mieli sita. 18Nalwo lwa yasaala khandi, ma imbula nikhuva khurula mwikulu, nilomba viraakwa khumeela khulilova.
19Vasuuvili vashianje, niiva mulala khu munyi anyala khuhaya haya khulekha khulonda katoto, ma wundi amukalushitsi khunjila yatoto, 20mwenyekhanga mumanye ndi mundu ukhonyanga mundu mwoni khulekha khukhola vindu vitamanu, aliitsa khuva namuhonyinyi khurula mu likhutsa, khandi vwoni vwevwe vunyishi vuliitsa khusemehwa.
© The Bible Society of Kenya, 2013