2 TIMOTEO 2
2
Musikali Mulahi wa Yesu Kristo
1Navutswa yivi, khuli luli mwana wanje, uve ni tsingulu khuvirila mu tsimbavasi, tsia khuli natsio mu Yesu Kristo. 2Vukula mechitso ka wahulila ninzilwatsanga imbeli wa vashiahidi vanyishi; nu khwechitsa vandu vatoto vatushili, vanyala khwechitsa khandi vandi.
3Khuli musikali mulahi wa Yesu Kristo, wenyekhanga wikhutsile na khutsi mulinyakhana. 4Musikali wu kholanga muhinzilu kutushili, akholanga khuyaanzitsa mwimilili wewe; khandi shianyala khuhuchililwa khutsukanyinya limenya lielie na vandu vakhakholanga muhinzilu ku vusikali tawe. 5Mwilukhachi wilukhakanga mu maliviri, shianyala khunyolakhu itaachi, nakhalondi malako kaliho tawe. 6Mulimi wu kholanga muhinzilu kwekwe ni tsingulu, khutukha ave wu khuraanga khunyola shitonye shi viraakwa via vachesi. 7Ukanakane khulondokhana khu kambolanga, shichila Mwami alakhuha vucheli vu khumanya shia shindu shiosi.
8Witsushitse Yesu Kristo, wali mwitsukhulu wa Daudi, wisimushitswa khurula mu likhutsa, khuli Ivanjeli ya nzilwatsanga ivoolanga. 9Nyakhananga, khali nimbohwa ni minyololo mucheela khuli mundu mutamanu, shichila nzilwatsanga Ivanjeli. Navutswa likhuva lia Nyasaye, shilinyala khuvohwa ni minyololo tawe. 10Khulwa yako, nzikhutsilanga shia shindu shiosi, shichila vandu va Nyasaye yarovola, khu khali vo vanyole vuhonyinyi khuvirila mu Yesu Kristo nu vukhumi vwi mihika ni mihika. 11Livoola yili ni liatoto:
“Niiva khwakhutsa na Kristo,
khuliitsa khutsililila khuva mwoyo khandi naye.
12Niiva khulatsililila khwikhutsila,
khuliitsa khwamiha khandi naye.
Niiva khunyala khumwambakhana,
aliitsa khandi khukhwambakhana.
13Niiva khulambakhana khuva vasuuvilwa,
aliitsa khutsililila khuva musuuvilwa,
shichila mwene shianyala khwiyambakhana tawe.”
Muhinzili Uyaanzitsanga Nyasaye
14Witsushitse vandu vovo khulondokhana khu makhuva yaka, ma uvachelihitsi imbeli wa Nyasaye, valekhane nu khulembana. Shikanyala khuvakhonyakhu tawe; navutswa kononyinyanga yavo vakahulishitsanga. 15Uchelitsi khuli lunyala khuyaanzitswa na Nyasaye, khuli muhinzili uvula tsisoni khulondokhana khu muhinzilu kwekwe, mundu wechitsanga munjila indahi likhuva liatoto lia Nyasaye. 16Ulekhane ni lilomoloma lia vandu vatamanu vakorwa Nyasaye, shichila vandu vayaanzilila khukhola kenako, valiitsa khuva ihale wene khurula khu Nyasaye. 17Mechitso khuli kenako kali khuli likuule linyala khuvula khuhona khu mmbili. Himenayo nende Filetusi, navo valala khu vandu veechitsa mechitso khuli kenako. 18Vechitsanga ndi vandu vakhutsa, vayisimukha khale khurula mu likhutsa. Yaka kali ihale wene khurula khu katoto; khandi ka koyanyinyanga vandu valala mu lisuuvila. 19Navutswa musinji kwi tsingulu kwa Nyasaye yaraanjitsa shiukunyala khunuyanyinywa tawe; navutswa khukwo makhuva yaka kahandikwakhu: “Mwami Nyasaye wamanya yavo vali veve” khandi “Shia mundu wosi uvoolanga ndi neye wu Mwami Nyasaye, alekhane nu vwoni.”
20Munzu ingali, khulimu ni tsisahani nende tsibakuli tsiosi lukanu na lukanu: tsindala tsialombwa khu itsahabu, khandi tsindi khu ifetsa, tsindi tsialombwa khu tsimbaho nende khu matohi; tsindala tsirumikhanga mumatukhu kalolekhanga khuva nu vukhonyi, tsindi mumatukhu ka shia khase khosi. 21Niiva mundu aliitsa khuva munihu khurula khu vindu vitamanu, mundu khuli mwenoyo aliitsa khuva shindu shilahi shiu khurumikha mumatukhu kali nu vukhonyi, shiatakaswa, khandi shiu muruchi mwene inzu anyala khurumishila; khandi shia yirecheshitswa khukholela muhinzilu mulahi. 22Ulekhane ni likomba litamanu lia vayayi vavukha, ulondelele vulunji mu likhola, lisuuvila, vuyaanzi nende milembe, halala na yavo vasaalanga nu mwoyo munihu khu Mwami. 23Navutswa ulekhane na makhuva ki tsimbakha tsia vutswa ka mahingani nende ku vusilo; shichila wamanya ndi makhuva khuli kenako kaleranga lilembana. 24Murumishi wu Mwami khutukha alekhane nu khulembana. Yenyekhanga ave mundu mulahi khu vandu voosi, ave mwechitsi mulahi khandi mwitsumishitsi, 25muhoma lwa alunjishitsanga vandu vamuhinganyinyanga, shichila haundi, Nyasaye anyala khuvaha vwiyangu vu khwikanila nu khumanya katoto. 26Valiitsa khunyola limanya, nu khwihonolokha khurula khu mureeko kwi Ibilisi, wali ni ya vakumila navalomba khukhola lienya lielie.
© The Bible Society of Kenya, 2013