2 SAMWELI 10
10
Daudi Yakuura Vaamoni
(1 Tsiny 19:1-19)
1Lwa matukhu mati kali nikakhavira, Mwami Nahashi wa Vaamoni yakhutsa, ma mwana wewe walaangwangwa Hanuni, niyamiha havukono hehe. 2Mwami Daudi yavoola, “Niitsa khukholela Hanuni vindu vilahi, khuli tata wewe Nahashi yakholela.” Mwami Daudi yaruma vandu khutsia khuleminya mwoyo kwa Hanuni, shichila likhutsa lia tata wewe.
Lwa varumishi vu Mwami Daudi, vali nivamali khutukha mu shivala shia Vaamoni, 3vimilili va Vaamoni vavoolela Mwami Hanuni, “Ukanakananga Daudi yenyanga khuha tata wowo luyali, lwa yaruma vandu khwitsa khukhuleminya mwoyo? Shikali kario tawe! Uvarumi khuli varunishitsi mu litaala lieru, khulirunishitsa khandi akhukwane!”
4Mwami Hanuni yakumila varumishi vu Mwami Daudi yali narumi, naveka luveka lulala lwa matelu kavo, nakhalaaka tsinguvu tsiavo hasi muvisiindi viavo, navaseevula khutsia. 5Valola tsisoni tsinyishi khukalukha ingo. Lwa Daudi yahulila kali nikakholeshe, yaruma mundu khutsia khuvavoolela vakhole nivamenya mu litaala lia Yeriko, khutukha lwa vameela matelu kavo. Nikamali khwikholekha kario, nalwo lwa mukalukha.
6Lwa Vaamoni vamanya ndi vakholi Daudi khuva mutsiku wavo, vasamulitsa vasikali tsiheelefu makhomi kavili va Siria, khurula mu mataala ka Betsi-rehobu nende Zoba, vasikali tsiheelefu likhomi na vavili, khurula mu litaala lia Tobu, halala nu Mwami wa Maaka nende vasikali iheelefu indala. 7Mwami Daudi yahulila makhuva kenako, naruma Yohabu nende mukaanda kwa vasikali voosi, khutsia khuvakwana. 8Vaamoni varoonjela, nivirechekha khukwanila mu shilivwa shi litaala lia Raba, liali litaala liavo likali. Vasiria nende vasikali vali nivaruli mu mataala ka Tobu nende Maaka, virechekha khukwanila mu milimi chialiho.
9Lwa Yohabu yalola ndi atsitsanga khukuurwa muliihe, khuraanjila inyuma nende imbeli, yarovola valala khu vasikali va Israeli vi tsingulu, navirecheshitsa khukwana Vasiria. 10Yarovola amwavo wewe walaangwangwa Abishai, khusinjilila vasikali vandi, navirecheshitsa khukwana Vaamoni. 11Yohabu yavoolela Abishai, “Niiva Vasiria valalolekha vanguranga, khutukha ukhonye. Navutswa niiva Vaamoni valiitsa khuva nivakuuranga yivi, nalwo lwa niitsa khukhukhonya. 12Muve ni tsingulu nende ikholo! Hambi khukwanili vandu veru nende mataala ka Nyasaye weru. Mwami Nyasaye akhole ka muyaanzitsanga!”
13Nalwo lwa Yohabu nende vandu veve visuunda imbeli, khutsia khukwana Vasiria. Khali Vasiria vavilukha. 14Lwa Vaamoni valola Vasiria nivilukhanga, khali vo vilukha Abishai, nivakalukha mu litaala. Nalwo lwa Yohabu yalekha khukwana Vaamoni, nakalukha Yerusalemi.
15Navutswa lwa Vasiria valola ndi Vaisraeli, vamali khuvakuura, valaanga halala vasikali vavo. 16Mwami Hadadezeri yarumana Vasiria, vali nivali khuluveka luli ivukwi wu Muchela kwa Efurate, khulerwa, navo nivalerwa. Vatukha mu litaala lia Helamu, mwimilili wa vasikali walaangwangwa Shobaki, navimililanga. 17Lwa Mwami Daudi yavoolelwa makhuva kenako, yalaanga halala vasikali va Vaisraeli, niyambukha Muchela kwa Yorodani, natukha mu litaala lia Helamu, Vasiria virechekha, nivamukwana. 18Navutswa Vasiria vilukha Vaisraeli; ma Daudi niyiira vasikali tsimia saba va makaare kiliihe va Vasiria nende vasikali makhomi kane vi tsifarasi. Yasalilitsa khandi Shobaki, wali nali mwimilili wa vasikali vavo, khali nakhutsilayo. 19Lwa vami voosi vali nivali varumishi va Hadadezeri, valola Vaisraeli vamali khuvakuura, valomba navo milembe, Vaisraeli ni vavamiha. Nalwo lwa Vasiria varia khukhonyakhu khandi Vaamoni.
© The Bible Society of Kenya, 2013