Mika 3
3
Mika Aikany'a Atongoi ma Ĩsilaeli
1Nĩvo ĩndĩ naneenie nasya atĩĩ,
“Ĩthukĩĩsyei inyw'ĩ atongoi ma Yakovo,
inyw'ĩ asumbĩ ma nyũmba ya Ĩsilaeli,
nĩmũkũlya, kwa w'o ti inyw'ĩ mwaĩlĩte kũmanya ũla w'o?
2Inyw'ĩ ala mũmenete ũseo na mwendaa ũthũku,
ala mũtembũaa kĩkonde kya andũ makwa,
na nyama kuma mavĩndĩnĩ moo.
3Inyw'ĩ ala mũĩsaa nyama sya andũ makwa,
na kũmaumya kĩkonde kyoo,
na kũtũlanga mavĩndĩ moo makatw'ĩka ilungu,
na kũtilanga mavĩndĩ asu ta nyama sya kwĩkĩa mbisũnĩ,
na ta nyama sya kwĩkĩa ĩsilianĩ.
4Ĩvinda nĩyũkĩte yĩla mwĩĩkaĩla Mwĩai Ngai,
ĩndĩ ndakamũsũngĩa.
Ĩvinda yĩu ndakamwĩthukĩĩsya,
nũndũ nĩmwĩkaa naĩ.”
5Ũũ nĩw'o Mwĩai Ngai ũkwasya,
“Athani ala matongoeasya andũ makwa na kũmasya,
yĩla mũndũ wamanenga lĩu,
nĩmaneenaa makasya, ‘Kwĩ mũuo.’
Ĩndĩ alea kũmanenga lĩu,
nĩmeyũmbanasya kũmũkita.
6Kwoou inyw'ĩ athani, mũkeethĩwa na ũtukũ ũte na mawoni,
kũkeethĩwa na kĩvindu na mũikethĩwa mũtonya kwathana kĩndũ.
Syũa yenyu inyw'ĩ athani yĩkathũa,
na mũthenya ũkatw'ĩka kĩvindu kwenyu.”
7Ala mamanyaa maũndũ mokĩte makasonokw'a,
ala maaũasya makakwatwa nĩ nthoni;
makavw'ĩka makanyw'a moo monany'e kana me na nthoni,
nĩkwĩthĩwa Ngai ndakamasũngĩa.
8Ĩndĩ ngalĩko ĩla yakwa nusũĩtwe nĩ vinya;
nusũĩtwe nĩ Veva wa Mwĩai Ngai,
na ngausũwa nĩ ũw'o na ũtonyi,
nĩ kana nĩtavye nzyawa sya Yakovo mavĩtyo moo,
na kũtavya Ĩsilaeli naĩ syoo.
9Ĩthukĩĩsyei inyw'ĩ atongoi ma nyũmba ya Yakovo;
ĩthukĩĩsyei inyw'ĩ atongoi ma Ĩsilaeli;
inyw'ĩ ala mũleaa maũndũ ala maw'o,
na kwĩka maũndũ ala mataĩlĩte.
10Mwakaa Saioni kwa nzĩa ya kũaana,
na mwakaa Yelũsalemu na ũthũku.
11Atongoi mayo masilaa kwa kũnengwa ĩtuvi ya wendeesyo,
athembi mayo mamanyĩasya matuvwe,
athani mayo mathanaa matuvwe.
Ĩndĩ ũu wĩ o vo maasya kana nĩmamwĩkwatĩtye Mwĩai Ngai.
Maneenaa makakũlya, “Kwa w'o Mwĩai Ngai nde vamwe naitũ?
Tũikakwatwa nĩ thĩna o na ũmwe.”
12 #
Yel 26.18
Kwoou nũndũ wenyu,
Saioni ĩkaĩmwa ta mũũnda,
Yelũsalemu ĩkaanangwa ĩtw'ĩke kĩvumbu,
na kĩĩma kya Ĩkalũ kĩkatw'ĩka kĩtheka kĩthungu.
BIBLE SOCIETY OF KENYA © 2011