Yos 9
9
Andũ ma Ngiveoni Maikenga Yosua
1Ũsindi wa andũ ma Ĩsilaeli nĩwamanyĩkie nĩ asumbĩ onthe ala maĩ ngalĩko ya ũthũĩlonĩ wa syũa ya Ũsĩ wa Yolotani, namo nĩ ala maĩ nthĩ yĩ iĩma, kũndũ kũtindimalu na ndeenĩ syonthe sya Ũkanga wa Menditelenia, kwambata kũthi kũvika Levanoni. Asumbĩ asu nĩ ala masumbĩkĩte Aititi, Aamoli, Akanaani, Avelisi, Aivi, na Ayevusi. 2Asumbĩ asu onthe nĩmoombanie vamwe na matetheanĩsya kũkita Yosua na andũ ma Ĩsilaeli.
3Ĩndĩ yĩla Aivi ala matwĩe Ngiveoni meewie ũndũ Yosua weekanĩte na ndũa ya Yeliko na ya Ai, 4nĩmavangie kwĩthĩwa na ũseleke na mamũkenga Yosua. Nĩmaendie maseũvya lĩu, mailĩĩla mang'oinĩ moo makunia makũũ, na ikuu sya ithuma sya kwĩkĩa ndivai syĩ na ilaka. 5Nĩmeekĩie iatũ syĩ na ilaka na ngũa ngũũ. Makuĩte mĩkate myũmũ na yĩna mbuka. 6Nĩmaendie maeemanĩ Ngilikali vala ve Yosua na andũ ma Ĩsilaeli na mamea atĩĩ, “Twauma nthĩ yĩ kũasa. Twĩenda kũseũvya wĩw'ano nenyu.”
7 #
Kuma 23.32; 34.12; Kũt 7.2 Ĩndĩ andũ ma Ĩsilaeli nĩmeeie Aivi asu atĩĩ, “Twĩseũvya wĩw'ano nenyu nĩkĩ? Nĩmũtonya kwĩthĩwa mũtũaa vakuvĩ naitũ.”
8Namo Aivi meea Yosua atĩĩ, “Twĩ athũkũmi maku.”
Yosua amakũlya, “Ninyw'ĩ aaũ na mumĩte va?”
9Namo mamũsũngĩa mamwĩa atĩĩ, “Mũnene, twauma nthĩ yĩ kũasa, nũndũ nĩtwĩw'ĩte ĩũlũ wa Mwĩai Ngai, Ngai wenyu. Nĩtwĩw'ĩte maũndũ onthe ala Mwĩai Ngai weekie nthĩ ya Misili, 10#Mot 21.21-35 na ũndũ weekanie na ala asumbĩ elĩ ma Aamoli ala matwĩe ngalĩko ya wumĩlonĩ wa syũa ya Ũsĩ wa Yolotani, namo nĩ: Mũsumbĩ Sioni wa ndũa ya Esivoni na Mũsumbĩ Oku wa ndũa ya Mbasani ũla watwĩe Asitalothi. 11Atongoi maitũ na andũ ma nthĩ yaitũ matwĩie tũseũvye lĩu wa kũya twĩ kyalonĩ tũke kũkomana nenyu, na tũimwĩa, twĩ athũkũmi menyu na twĩenda kũseũvya wĩw'ano nenyu. 12Sisyai mĩkate ĩno yaitũ! Yĩla twambĩĩe kyalo kuma kwitũ tũke kũũ kwenyu, mĩkate ĩno yaĩ mĩvyũ, ĩndĩ yu nĩmwene nĩ myũmũ na yĩna mbuka! 13Yĩla twausũasya ikuu ii sya ithuma na ndivai syaĩ nzaũ, ĩndĩ sisyai! Yu nĩ ndembũkangu. Ngũa na iatũ sitũ nitw'ĩkĩte nũndũ wa kyalo kĩasa.”
14Andũ ma Ĩsilaeli nĩmoosie lĩu ũmwe wa Aivi maya, ĩndĩ mayaakũlya ũtao kuma kwa Mwĩai Ngai. 15Yosua nĩwatumie ndũũ na andũ asu ma Ngiveoni na aseũvya wĩw'ano namo, na ametĩkĩlya kwĩkala kũu. Atongoi ma andũ ma Ĩsilaeli nĩmathanie kwĩanĩsya wĩw'ano ũsu.
16Mĩthenya ĩtatũ yathela, ĩtina wa kũseũvya wĩw'ano, andũ ma Ĩsilaeli nĩmamanyie kana andũ asu maĩ atũi moo, na mekalanasya namo. 17Andũ ma Ĩsilaeli nĩmambĩĩie kyalo kya kũthi kũla andũ asu mekalaa ndũanĩ sya Ngiveoni, Kevila, Mbeelothi na Kiliathi-yealimu, na ĩtina wa mĩthenya ĩtatũ mavika ndũanĩ ĩsu. 18Ĩndĩ andũ ma Ĩsilaeli mayaĩ matonya kũaa andũ asu, nũndũ atongoi moo nĩmaseũvĩtye wĩw'ano namo ĩsyĩtwanĩ ya Mwĩai Ngai, Ngai wa Ĩsilaeli. Andũ ma Ĩsilaeli nĩmanyungunyĩisye atongoi moo nũndũ wa ũndũ ũsu. 19Ĩndĩ atongoi masũngĩa ĩkomano mayasya atĩĩ, “Nĩtũminĩte kũseũvya wĩw'ano na andũ asu, na kwoou tũitonya kũmakiita. 20No nginya tũekane namo mekale thayũ nũndũ wa wĩw'ano ũla tũneew'anie namo. Tũkalea kwĩka ũu Ngai no atũkany'e. 21Ekanai namo, ĩndĩ namo makatunĩaa ngũ na kũtũutĩa kĩw'ũ.” Ũsu nĩw'o woni ũla atongoi manengie andũ ma Ĩsilaeli.
22Yosua nĩweeaie andũ ma Ngiveoni maetwe kũla ũĩ, na mooka amakũlya atĩĩ, “Mũnatũkengie mwatwĩa mumĩte nthĩ yĩ kũasa nenyu mumĩte o vaa vakuvĩ nĩkĩ? 23Kwoou yu mwĩ aumanĩe nũndũ nĩmwĩkĩte ũu. Mũkatũaa mwĩ ngombo sya kuna ngũ na kũuta kĩw'ũ kwondũ wa nyũmba ya ũthaithĩa ya Ngai wa andũ ma Ĩsilaeli.”
24Nĩmasũngĩie Yosua mamwĩa atĩĩ, “Mũnene, ithyĩ tweekie ũu nũndũ nĩtwamanyie nesa kana Mwĩai Ngai, Ngai wenyu, nĩweeaĩie mũthũkũmi wake Mwose amwĩa kana akamũnenga nthĩ ĩno yonthe na ayũaa andũ onthe ala matwĩe nthĩnĩ wayo maume mbee wenyu. Tweekie ũu nũndũ nĩtwakĩaa mũikatũae. 25Ithyĩ yu twĩ ungu wa ũtonyi waku; twĩke ũndũ ũkwona wĩ waĩlu.” 26Kwoou Yosua nĩwatangĩĩie andũ asu kuma kwa andũ ma Ĩsilaeli, na malea kũawa. 27Mũthenya ũsu Yosua nĩwatw'ĩkĩthisye andũ ma Ngiveoni ngombo sya kunĩa andũ ma Ĩsilaeli ngũ na kũmatavĩa kĩw'ũ. O ta ũu nĩmatavaa kĩw'ũ na kuna ngũ ila syatũmĩawa kĩthembeonĩ kya Mwĩai Ngai. Kũvika o na ũmũnthĩ andũ ma Ngiveoni matethasya wĩa ũsu vala Ngai wanyuva athaithĩwe.
BIBLE SOCIETY OF KENYA © 2011