Yos 24
24
Andũ Maisyokea Ũtianĩo katĩ woo na Ngai me Sekemu
1Yosua nĩwoombanĩisye andũ ma mbaĩ syonthe sya Ĩsilaeli ndũanĩ ya Sekemu. Nĩweetie atumĩa, atongoi, asili, na ala angĩ onthe matongoesye andũ ma Ĩsilaeli, na mathi mbee wa Ngai. 2#Mwa 11.27 Yosua nĩwaneenie na andũ onthe amea atĩĩ, “Ũũ nĩw'o Mwĩai Ngai, Ngai wa Ĩsilaeli ũkwasya, ‘Tene mũno aaũmae menyu matũaa mũingo wa Ũsĩ wa Euvalati, na mathaithaa ngai ingĩ. Ũmwe wa aaũmae asu menyu aĩ Tela, ĩthe wa Avalaamu na Naoli. 3#Mwa 12.1-9; 21.1-3 Nĩnaumisye ĩthe wenyu Avalaamu nthĩ ĩla yĩ mũingo wa Ũsĩ wa Euvalati na namũtongoesya kwĩsĩla nthĩ yonthe ya Kanaani. Nĩnanengie Avalaamu nzyawa mbingĩ. Nĩnamũnengie Isaka, 4#Mwa 25.24-26; 36.8; 46.1-7; Kũt 2.5 nake Isaka namũnenga Yakovo na Esaũ. Nĩnanengie Esaũ nthĩ ya Etomu ĩla yĩ iĩma yĩthĩwe ng'ũndũ yake, ĩndĩ ũmae wenyu Yakovo na syana syake nĩmatheeie mathi Misili. 5#Kuma 3.1—12.42 Ĩtina wa ũu nĩnatũmie Mwose na Alũni kũu Misili, na naetee andũ ma nthĩ ĩsu thĩna mũnene. Ĩndĩ nyie nĩnamumisye nthĩ ĩsu. 6#Kuma 14.1-31 Nĩnaumisye aaũmae menyu nthĩ ya Misili namo andũ ma Misili mamaatĩĩa na makasya ma kaũ na asikalĩ malĩsĩte mbalasinĩ. Ĩndĩ yĩla aaũmae menyu mavikie Ũkanganĩ Mũtune, 7nĩmambĩkaĩlile nĩmatetheesye, nakwa naete kĩvindu katĩ woo na andũ ma Misili. Nĩnatumie kĩw'ũ kya ũkanga ũsu kyũkĩa andũ ma Misili kĩna itulumo, na kyamoaa. Nĩmwĩsĩ ũndũ neekanie na andũ ma nthĩ ya Misili. Nĩmwekalile weũnĩ vandũ va ĩvinda ĩasa. 8#Mot 21.21-35 Nĩvo ĩndĩ namũetie mũlike nthĩ ya Aamoli, ala matwĩe ngalĩko ya wumĩlonĩ wa syũa ya Ũsĩ wa Yolotani. Nĩmamũkitie, ĩndĩ nyie namũnenga vinya wa kũmasinda. Nĩmwoosie nthĩ yoo, nakwa naendeea kũmamina yĩla mwaendee kũlika nthĩ ĩsu. 9#Mot 22.1—24.25 Yĩla mũsumbĩ wa Moavi Mbalaki mwana wa Nzivoli weeyũmbanisye kũkita nenyu, nĩwatũmanie Mbalaamu mwana wa Mbeoli oke kũmũumanĩa. 10Ĩndĩ nakwa ndyaaĩthukĩĩsya Mbalaamu, kwoou eeka kũmũathima, na kwa nzĩa ĩsu namũtangĩĩa kuma kũla kwĩ Mbalaki. 11#Yos 4.14-17; 6.1-21 Nĩmwaingie Ũsĩ wa Yolotani na mwavika ndũanĩ ya Yeliko. Andũ ma ndũa ĩsu nĩmokitie nenyu, o vamwe na Aamoli, Avelisi, Akanaani, Aititi, Angilikasi, Aivi na Ayevusi. Ĩndĩ nĩnatumie mũmasinda onthe. 12#Kuma 23.28; Kũt 7.20 Mũendee kũlika nĩnatũmĩie andũ ma nthĩ isu mauĩ makwatwa nĩ w'ĩa na nalũngya ala asumbĩ elĩ ma Aamoli. Mũyaaĩka ũu mũitũmĩa mbyũ na mbũta syenyu. 13#Kũt 6.10-11 Namũnengie nthĩ mũtaĩ mwaanoa mũimĩĩma, na namũnenga ndũa mũtaaka. Yu mwĩkalaa vo mũiya nzavivũ kuma mĩsavivũnĩ mũtaavanda, na kũya matunda kuma mĩthatanĩ mũtaavanda.’ ”
14Yosua nĩwaendeeie kũneena ayasya atĩĩ, “Yu ĩndĩ, mũnengei Mwĩai Ngai ndaĩa, na mũimũthũkũma kwa ũw'o na ũĩkĩĩku. Vetangai kũasa nenyu ngai ila aaũmae menyu mathaithaa me nthĩ ya Mesovotamia na ya Misili, na mũimũthũkũma Mwĩai Ngai e weka. 15Ethĩwa mũikwenda kũmũthũkũma Mwĩai Ngai, nyuvai ũmũnthĩ mũkathũkũmaa ũũ; nĩ ngai ila aaũmae menyu mathaithaa me nthĩ ya Mesovotamia, kana nĩ ngai sya Aamoli ala yu mũtwĩe nthĩ yoo. Ĩndĩ nyie na andũ ma mũsyĩ wakwa, tũkathũkũmaa Mwĩai Ngai.”
16Andũ nĩmasũngĩie masya atĩĩ, “Ithyĩ tũyĩsa kũtaanĩsya na Mwĩai Ngai, na kũthũkũma ngai ingĩ! 17Mwĩai Ngai, Ngai waitũ mwene, nĩwe watumisye ithyĩ na aaũmae maitũ nthĩ ya Misili, kuma nthĩ ĩsu twekalaa twĩ ngombo, na eeka syama nene ithyĩ tũsyaĩĩsye. Nĩwatũsũvĩie twĩ kyalonĩ kitũ kyonthe kuma andũnĩ ma mbaĩ sya nthĩ ila twesĩlile. 18Yĩla twaendee na kũlika nthĩ ĩno tũĩ, Mwĩai Ngai nĩwalũngilye Aamoli onthe ala matũaa kũũ. Kwoou o naitũ tũkamũthũkũmaa Mwĩai Ngai, nũndũ nĩwe Ngai waitũ.”
19Ĩndĩ Yosua nĩwaneenie na andũ amea atĩĩ, “Inyw'ĩ mũitonya kũthũkũma Mwĩai Ngai, nũndũ nĩ Ngai mũtheu, na nĩ Ngai ũtetĩkĩla kũthaithanĩw'a na ngai ingĩ. Ndakamũekea mavĩtyo menyu kana naĩ syenyu. 20Ethĩwa mũkatia Mwĩai Ngai na kũthũkũma ngai ngeni, akamũlea na kũmũetee maũndũ mathũku. Akamũmina vyũ o na kau ethĩĩtwe aimwĩka maũndũ maseo.”
21Andũ nĩmasũngĩie Yosua mamwĩa atĩĩ, “Aiee, ithyĩ tũkathũkũmaa Mwĩai Ngai.”
22Nake Yosua amea atĩĩ, “Inyw'ĩ ene no inyw'ĩ ngũsĩ sya kana nĩmũnyuvĩte kũthũkũma Mwĩai Ngai.”
Namo andũ mamwĩa, “Ĩĩ nĩw'o, ithyĩ twĩ ngũsĩ.”
23Nĩvo ĩndĩ Yosua wameie atĩĩ, “Anangai mĩvw'anano ya ngai isu ngeni mwĩ nasyo, na mũyĩnengane kũla kwĩ Mwĩai Ngai, Ngai wa Ĩsilaeli.”
24Andũ namo nĩmeeie Yosua, “Tũkamũthũkũmaa Mwĩai Ngai, Ngai waitũ, na kũmwĩw'aa.”
25Mũthenyanĩ ũsu Yosua nĩwaseũvisye ũtianĩo na andũ ma Ĩsilaeli kũu Sekemu na amanenga motw'ĩo na myamũlo. 26Yosua nĩwaandĩkie mĩao ĩsu Ĩvukunĩ ya Ngai ya Mĩao. Nĩwoosie ĩvia ĩnene na ayĩnzĩla ungu wa mũtĩ wa mwalonĩ ũla waĩ vakuvĩ na vala vandũ vatheu va Mwĩai Ngai. 27Yosua nĩweeie andũ onthe ma Ĩsilaeli atĩĩ, “Ĩvia yĩĩ nĩyo ngũsĩ yaitũ. Nĩyeew'a ndeto syonthe ila Mwĩai Ngai waneena naitũ. Ĩvia yĩĩ yĩkeethĩawa ũkũsĩ kwenyu yĩla mweethĩwa mũte aĩkĩĩku kũla kwĩ Ngai wenyu.” 28Nĩvo ĩndĩ Yosua wanengie andũ mwanya wa kũtaanĩsya, na kĩla mũndũ asyoka kĩsionĩ kya nthĩ kĩla wanengetwe kĩthĩwe ng'ũndũ yake.
Kĩkw'ũ kya Yosua na kya Mũthembi Eleasali
29Ĩtina wa maũndũ asu Yosua mwana wa Nuni, mũthũkũmi wa Mwĩai Ngai nĩwakwie. Akwie e na ũkũũ wa myaka ĩana na ĩkũmi. 30#Yos 19.49-50 Nĩwathikiwe kĩthekanĩ kyake kya ng'ũndũ kĩla kyaĩ ndũanĩ ya Timinathi-selaa ĩla yĩ nthĩ yĩ iĩma ya Evalaimu, ngalĩko ya ĩũlũ ya Kĩĩma kya Ngaasi.
31Andũ ma Ĩsilaeli nĩmathũkũmie Mwĩai Ngai ĩvindanĩ yonthe yĩla Yosua waĩ thayũ. O ta ũu nĩmaendeeie kũmũthũkũma ĩvindanĩ yĩla atongoi ala meeyoneie ene maũndũ ala Mwĩai Ngai weekĩte andũ ma Ĩsilaeli maĩ thayũ.
32 #
Mwa 33.19; 50.24-25; Kuma 13.19; Yoa 4.5; Meko 7.16 Mavĩndĩ ma Yosevu ala andũ ma Ĩsilaeli makuie kuma nthĩ ya Misili nĩmathikiwe ndũanĩ ya Sekemu. Mathikiwe kĩsionĩ kya nthĩ kĩla Yakovo waũĩte kwa thooa wa mbesa sya silĩva ĩana yĩmwe kuma kwa ana ma Amolu ĩthe wa Sekemu. Kĩsio kĩu kya nthĩ nĩkyatw'ĩkie ng'ũndũ ya nzyawa sya Yosevu.
33Eleasali mwana wa Alũni nĩwakwie na athikwa ndũanĩ ya Ngivea ĩla yĩ nthĩ yĩ iĩma ya Evalaimu, ĩla yanengetwe Vineasi mwana wake.
BIBLE SOCIETY OF KENYA © 2011