Yos 12
12
Asumbĩ Ala Masindiwe nĩ Mwose
1 #
Mot 21.21-35; Kũt 2.26—3.11 Andũ ma Ĩsilaeli maĩ manokita makasinda na makalika makatũa nthĩ ĩla yĩ ngalĩko ya wumĩlonĩ wa syũa ya Ũsĩ wa Yolotani, ĩla yaumĩte Mwandanĩ wa Alinoni na ĩkambata kũthi kũvika Kĩĩmanĩ kya Elimoni, o vamwe na nthĩ yonthe ya Mwanda wa Yolotani kũthi na ngalĩko ya wumĩlonĩ wa syũa. Nĩmasindie asumbĩ elĩ kũu. 2Ũmwe woo eetawa Sioni, ũla waĩ mũsumbĩ wa Aamoli na wekalaa Esivoni. Sioni asumbĩkaa e nyũmbanĩ yake ya kĩ-ũsumbĩ ĩla yaĩ Aloeli, ndũa yaĩ ũtee wa Mwanda wa Alinoni. O ta ũu nĩwasumbĩkĩte kuma katĩ wa mwanda ũsu kũthi kũvika Ũsĩnĩ wa Yavoki ũla nĩw'o waĩ mũvaka wa nthĩ ya Amimoni. Kĩsio kĩu kyaĩ nyusu ya nthĩ ya Ngileati. 3Mũsumbĩ ũsu o ta ũu nĩwasumbĩkĩte ngalĩko ya wumĩlonĩ wa syũa ya Mwanda wa Yolotani, kuma Ũkanganĩ wa Kinelethi kũthi kũvika Ũkanga wa Alava, ũla kwa ĩsyĩtwa yĩngĩ wĩtawa Ũkanga Mũkw'ũ, na kũendeea kũvika Mbethi-yesimothi na kũthi ngalĩko ya ĩtheo kũvika ivaũũkonĩ sya Visika.
4Andũ ma Ĩsilaeli nĩmasindie mũsumbĩ ũngĩ weetawa Oku ũla wasumbĩkĩte kĩsio kya Mbasani. Oku aĩ ũmwe wa ala andũ anene matialĩte meetawa Alevai. Mũsumbĩ ũsu asumbĩkaa kuma nyũmbanĩ syake sya kĩ-ũsumbĩ ila syaĩ ndũanĩ ya Asitalothi na ya Etilei. 5Oku asumbĩkĩte kĩsio kĩla kĩ Kĩĩmanĩ kya Elimoni, na kĩsio kya Saleka, na kĩsio kya Mbasani kyonthe, kũthi kũvika mũvakanĩ wayo na andũ ma ndũa ya Ngesuli na ya Maaka, na nyusu ya Ngileati kũthi kũvika kĩsio kĩla Sioni mũsumbĩ wa Esivoni wasumbĩkĩte.
6 #
Mot 32.33; Kũt 3.12 Asumbĩ asu elĩ nĩmasindiwe nĩ Mwose na andũ ma Ĩsilaeli. Mwose mũthũkũmi wa Mwĩai Ngai nĩwanenganie isio sya nthĩ ya asumbĩ asu kũla kwĩ andũ ma mbaĩ ya Lũveni, Ngandi, na nyusu ya mbaĩ ya Manase mamesye.
Asumbĩ Ala Masindiwe nĩ Yosua
7Yosua vamwe na andũ ma Ĩsilaeli nĩmasindie asumbĩ onthe ala masumbĩkĩte kĩsio kya nthĩ kĩla kyaĩ ngalĩko ya ũthũĩlonĩ wa syũa ya Ũsĩ wa Yolotani. Kĩsio kĩu kyaĩ kuma Mbaali-ngandi ĩla yĩ Mwandanĩ wa Levanoni kũthi kũvika Kĩĩma kya Alaki ngalĩko ya ĩtheo vakuvĩ na ndũa ya Etomu. Yosua nĩwaanĩsye mbaĩ sya Ĩsilaeli kĩsio kĩu kya nthĩ mamesye na kĩyĩthĩwa ng'ũndũ yoo tene na tene. 8Kĩsio kĩu kya nthĩ kyaĩ vamwe na nthĩ yĩ iĩma, nguumo wa iĩma ila syĩ ngalĩko ya ũthũĩlonĩ wa syũa, Mwanda wa Yolotani na nguumo syaw'o, ivaũũko sya iĩma na weũ ũla wĩ ngalĩko ya ĩtheo wĩtawa Nengevu. Kĩsio kĩu kya nthĩ nĩkyo andũ aa matwĩe: Aititi, Aamoli, Akanaani, Avelisi, Aivi na Ayevusi. 9Andũ ma Ĩsilaeli masindie asumbĩ ma ndũa ii: Yeliko, Ai ĩla yĩ vakuvĩ na Mbethi-eli, 10Yelũsalemu, Eviloni, 11Yalimuthi, Lakisi, 12Ekeloni, Ngeseli, 13Ndevili, Ngeteli, 14Olima, Alati, 15Livina, Atulamu, 16Maketa, Mbethi-eli, 17Tavua, Eevieli, 18Aveki, Lasaloni, 19Matoni, Asoli, 20Similoni-Meloni, Akisavu, 21Taanaki, Mekito, 22Ketesi, Yokineamu ĩla yĩ Kalimeli, 23Ndoli ĩla yĩ ũtee wa ũkanga, Ngoiimu ĩla yĩ Ngilikali, 24na mũsumbĩ wa Tilisa. Asumbĩ asu onthe nĩ mĩongo ĩtatũ na ũmwe.
BIBLE SOCIETY OF KENYA © 2011