2Sam 22
22
Wathi wa Ndeviti wa Ũsindi
(Sav 18)
1Ndeviti nĩwainĩie Mwĩai Ngai wathi ũũ yĩla Mwĩai Ngai wamũtangĩĩie kuma ũtonyinĩ wa amaitha make onthe, na kuma ũtonyinĩ wa Saũlo. Nĩwainie asya:
2“Mwĩai Ngai nĩwe ũnzũvĩaa,
nĩwe wĩvitho wakwa na mũtangĩĩi wakwa.
3Ngai wakwa nĩ ĩvia yakwa, ũla nĩvithaa nthĩnĩ wake,
nĩwe ngao yakwa,
na vinya wa ũtangĩĩo wakwa.
Nĩwe ũnzũvĩaa na nĩ wĩvitho wakwa mũlũmu, na mũtangĩĩi wakwa,
na nĩwe ũnzũvĩaa kuma kũla kwĩ andũ athũku.
4Nĩnĩkaĩlaa Mwĩai Ngai ũla waĩlĩte kũtaĩwa,
nake nũndangĩaa kuma amaithanĩ makwa.
5“Itulumo sya kĩkw'ũ nĩsyambĩlingĩlĩte;
itulumo sya wanangĩko syaĩ ĩũlũ wakwa.
6Mĩisyo ya kũla maveva ma ala akw'ũ mekalaa nĩyanthyũlũlũkĩte;
mĩteo ya kĩkw'ũ nĩyangwatie.
7Thĩnanĩ wakwa nĩnamwĩkaĩlile Mwĩai Ngai;
nĩneekaĩlile Ngai wakwa andetheesye.
Nĩweewie wasya wakwa e ĩkalũnĩ yake;
nĩweethukĩĩisye kĩĩo kyakwa na matũ make.
8“Nĩvo ĩndĩ nthĩ yatetemie na yathingitha;
myambĩlĩĩlyo ya matu nĩyathingithie,
yathingithie nũndũ Ngai nĩwathatĩte!
9Syũki nĩyaumie manyiũũnĩ make;
na mwaki ũvĩvasya na makaa me mwaki,
syauma kanyw'anĩ wake.
10Nĩwaatũie matu na atheea nthĩ;
atheeie na matu makamu me ungu wa maũũ make.
11Nĩwalĩsile kyũmbenĩ kĩ nthwau kĩtawa mũkelũvi na aũlũka;
nĩwaũlũkile aitũmĩa kĩseve ta kyo nthwau syake.
12Nĩwatumie kĩvindu kĩmwĩlingĩla;
mũumbĩ mũkamu wusũĩte kĩw'ũ nĩwamwĩlingĩlĩte.
13Kuma ũtheunĩ wake mũtisu,
makaa me mwaki nĩmakanĩte.
14“Mwĩai Ngai nĩwatundumie e ĩtunĩ;
wasya wa Ũla wĩ Ĩũlũ Mũno nĩweew'ĩkie.
15Nĩwekisye maangi na anyaĩĩkya amaitha make;
nĩwamalũngilye na kyeni kya ũtisi mathi masembete.
16Yĩla Mwĩai Ngai wakanisye amaitha make,
na aneena namo na wasya mũnene e mũthatu,
kũndũ kũliku ũkanganĩ nĩkwoonekie ũndũ kũilyĩ,
na myambĩlĩĩlyo ya nthĩ yavuwa yooneka!
17“Mwĩai Ngai nĩwatambũũkisye kw'oko kwake kuma ĩũlũ na angwata;
nĩwangusisye ambumya kĩw'ũnĩ kĩliku.
18Nĩwandangĩĩie kuma mũmaithanĩ wakwa wĩ vinya,
na kuma kwa ala mamenaa,
ala maĩ na vinya mwingĩ mbee wakwa.
19Yĩla naĩ thĩnanĩ nĩmambithũkĩie,
ĩndĩ Mwĩai Ngai nĩwanzũvĩie.
20Nĩwandetheeisye nauma mũisyonĩ;
nĩwandangĩĩie nũndũ nĩwendeew'e ninyie.
21“Mwĩai Ngai nũnengete ĩtuvi kwĩanana na ũlũngalu wakwa;
nũnduvĩte kwĩanana na ũtheu wa maũndũ ala nĩkaa.
22Nũndũ nĩnĩanĩasya mĩao ya Mwĩai Ngai,
na ndyaaĩka ũndũ mũthũku kwa kũmũtia Ngai wakwa.
23Nĩnĩkaa ũndũ myamũlo yake yonthe ĩkwasya,
na ndyaalea kwĩanĩsya motw'ĩo make.
24Ndyaĩ nĩtalĩlwa ĩvĩtyo mbee wake,
na nĩneesũvĩaa ndikavĩtye.
25Mwĩai Ngai nũnengete ĩtuvi kwĩanana na ũlũngalu wakwa,
kwĩanana na maũndũ maĩlu ala nĩkaa mbee wake.
26“Ame Mwĩai Ngai wĩ mũĩkĩĩku kwa andũ ala aĩkĩĩku kwaku,
na wĩ mũseo kwa ala aseo.
27Wĩ mũtheu kwa ala atheu,
ĩndĩ ala athũku nũmakanasya.
28Nũtangĩĩaa andũ ala menyivasya,
ĩndĩ nũnyivasya ala mekathĩĩaa.
29“We Mwĩai Ngai nue kyeni kyakwa,
nũalyũlaa kĩvindu kyakwa kĩkatw'ĩka kyeni.
30Nũnengae vinya wa kũsinda nguthu ya amaitha makwa,
na ũtonyi wa kũkĩlĩla ũkũtanĩ woo.
31Maũndũ ala Ngai ũsu wĩkaa nĩ meanĩu,
watho wa Mwĩai Ngai nĩ wa kwĩkwatw'a.
Ngai ailyĩ ta ngao kwa andũ onthe,
ala mevithaa nthĩnĩ wake.
32“Mwĩai Ngai nowe Ngai e weka;
Ngai e weka nĩwe ũsũvĩo witũ.
33Ngai ũsu nĩwe wĩvitho wakwa mũlũmu,
na nĩwe ũndongoeasya nzĩanĩ ngethĩwa nĩ ũsũvĩonĩ.
34 #
Ava 3.19
Nũtumaa maũũ makwa methĩwa mailyĩ ta ma nthia;
nũndonyethasya kũũngama iĩmanĩ ndũlu.
35Nũmanyĩasya kũkita,
nĩ kana nĩthĩwe ndonya kũkoota ũta wa kyũma kya mbulonzi.
36We Mwĩai Ngai nũnzũvĩaa na kũndangĩĩa;
ũtethyo waku nũtumĩte nĩthĩwa na nguma.
37Nũtumaa nzĩa yakwa yĩthĩwa yĩ ntheu,
nĩ kana ndikese kũvalũka.
38Nĩnaatĩĩie amaitha makwa na namasinda;
ndyaaekana namo nginya namamina vyũ.
39Nĩnĩmatonyete mũkuthũ ngamamina vyũ ũkethĩa maitonya kũkĩla ĩngĩ;
nĩmavalũkile ungu wa nyaĩĩ syakwa.
40Nĩwanengie vinya wa kũkita,
na watuma nĩsinda amaitha makwa.
41Nĩwatumie amaitha makwa masemba mangĩĩte;
nĩnaminie ala mamenete.
42Nĩmamanthie ũtethyo,
ĩndĩ vayaĩ mũndũ ũmatangĩĩa;
nĩmamwĩkaĩlile Mwĩai Ngai,
ĩndĩ ndaamasũngĩa.
43Nĩnamatumbatumbie mavinya ta kĩtoo;
nĩnamakinyangĩie nthĩ ta ndaka yĩ nzĩanĩ.
44“Nũmbonoketye kuma kwa andũ ala mang'endeaa,
na kũtuma nĩendeea kwĩthĩwa nĩ mũsumbĩ wa andũ ĩũlũ wa nthĩ.
Andũ ndeesĩ, yu matw'ĩkĩte athũkũmi makwa.
45Andũ aeni makumanaa mbee wakwa makanenga ndaĩa;
meew'a naneena, nĩmekaa ũndũ nasya.
46Onthe nĩmakusaa ngoo,
na kũka mathĩlĩĩte kuma kũndũnĩ kwoo kwa wĩvitho.
47“Mwĩai Ngai e thayũ! Nĩataĩwe mũsũvĩi wakwa!
Tavany'ai ũnene wa Ngai wakwa ũla wĩ vinya na ũndangĩĩaa.
48Nĩwe Ngai ũla ũtumaa nĩsinda amaitha makwa;
nũtumaa andũ onthe ĩũlũ wa nthĩ methĩwa ungu wa ũtonyi wakwa.
49Nũndangĩĩaa kuma amaithanĩ makwa.
Mwĩai Ngai nũtumaa nĩsinda ala mamenaa,
na kũnzũvĩa kuma kũla kwĩ andũ athũku.
50 #
Alo 15.9
“Kwoou we Mwĩai Ngai nĩngũũtaĩa katĩ wa andũ onthe ma nthĩ;
na kwina mbathi sya kũtaĩa ĩsyĩtwa yaku.
51Ngai nũnengae mũsumbĩ wake ũsindi mũnene;
nĩwonanasya wendo ũtaolekaa kũla kwĩ ũla ũnyuvĩte,
kũla kwĩ Ndeviti na nzyawa syake kũvika tene na tene.”
BIBLE SOCIETY OF KENYA © 2011