Ta je Vejec 29
29
1HABA at adre me osehia nâ, kʼ ame ka ohwegiâ bi nyin,
Me adre me he ka ie oamâmâ, ke ba bi eny.
2E ka se hia tavat ae wisa, me ame senyin tavat:
Ke e ka musi at ae kong, me ame he ka mâng tavat.
3Haba at ame hnyok ka metâ me ame osenyinâ kamen:
Ke haba at ame tha e me je momo hnyi gethen, me ame odilâ omjeû.
4Haba than, me ame ohmâ hnyei ge hna owisa:
Ke haba at ame hnö je bwihlany, me ame hagutâ e.
5Haba at ame ita hofuc ka ke at
Me ame ka thong ert hobi kâu li can.
6E hu hnewe hnyi hna hanyâûâ hnen at ae kong:
Kʼ ame khumöng me senyin at ae wisa.
7Haba at ae wisa, me ame ûnykûme he ka bi hien at ae theduoc:
Ke haba at ae kong, me ba wâhmakhmeto gan he ka khana thö.
8Haba tavat ûhiö, me adre me thong taun:
Ke haba tavat ae metâ, me adre me ohaûâ bi hmonyin,
9E ka he at ae metâ ka ivino me at ae monu,
Ame ne hmonyin, ame ne hluma, me ba ta hau.
10Haba at ame behingâlâ dra, me ame hmiân at ae wisa,
Ke haba at ae fofâ, me adre me elâm ke ka hlingâ e.
11Haba at ae monu, me ame ha hia anyin hmonyin:
Ke haba at ae metâ, me ame noc e, me omenâ e.
12E ka he at musi ka long hoton ta je hofuc thoi,
Me tavat ae kong hia je athnyabainy.
13Haba at ae theduoc ke at ûöveci, me ödru me iouny;
Iehova bi at ame omelamâ li emaködru hia.
14Haba than a at ame owisa hnathoâ ka tavat ae theduoc,
Me ame he bala bi ka tethmâ anyin theron.
15Haba osö ke hwa ûne, me wale li at ûömetö;
Kʼ ame he ka ohmehma hinyen ge wanakat adre me hna.
16E ka se hia tavat ae kong, me se hia minya hanyâûâ:
Kʼ ame he tavat ae wisa ka wâ hnödra hna kolu.
17Nâ thö nokom, me u me he ka laba so;
Eke, e ame he ka osenyinâ hnyekom.
18E ka ba hna omanenâ, me ame he tavat ka hota degecâ hokhnyok:
Ke hnahic hnen at ame tuö hnanyibu.
19E ca khana bi ta je hofuc he ka thawâ athnyaba:
Eja ke ne a ne wâhmakhmeto, me ame ca he ka long hoton.
20U je wâ but at ame fuc bebehû?
E so geju ka at ae monu hon momo eling.
21Haba at ame betenge ge athnyabainy hwân ke tiga wanakat,
Me ame he ka kap e me nokon hnyi obiny.
22Ame okûâ iwatretra at ame hmonyin,
Kʼ ame osehia hanyâûâ ge at ae wathethot.
23Haba bigan anyin at, me ame ohnyikânâ e:
Kʼ adre me he ka ogânâ at ame hnyok hnyikânâ.
24Haba at ame tha hien me at venöu, me e ame ka hmiân hanon bi:
E ame long ûhangö, kʼ ame ca omanenâ bi.
25E ka ot at, me hnân e hnewe:
Kʼ ame he ka laba khötkic at ame labageju kö Iehova.
26E se hia tavat adre me elâm ibetengiö ge at musi:
Ke ûnyi ga Iehova hna owisa ka at.;
27Hûkötiânen tavat ae wisa, at ae hwali hwakecin:
Ke hûkötiânen at ae kong, at ae fofâ hnyi gethen.
maintained by the British and Foreign Bible Society