Ta je Vejec 17
17
1E SO ujeû ae atgec a tha e me laba wia,
Hon bijeû hnyi uma hia a tha e me û.
2Ame he athnyaba ae metâ ka muso wanakat amo ohmehma,
Kʼ ame he ka tha hu jekhoû unyin je liamekeiny.
3Hnân leû sileva öt, ke hnân leû gol meic:
Ke Iehova bi at ame cubec ta je hnyok.
4Haba at ae kong, me ame tevehlöng je esongot ae thoi;
Kʼ ame long hoton bohmen ae ûokonguny bi hnen at thoi.
5Haba at ame hiâ at ae theduoc, me ame haikongoâ At a Op e:
Kʼ ame ca he bi ka ba hwaban ka at ame senyinâ ûokonguny.
6Korona anyin wahingat ta je laöbidra;
Ke haba hmanenanginy je wanakat, me ûnyâ lakamödra.
7Hofuc ae hmanenang, ame ca ûcû ka at ae monu:
Ke hawa ge li esongot ae thoi anyin ke taben!
8Veto ae gan hwaban, bwihlany ka at ae hu e:
E so troban e hnyi hna wia e ka ke dok me ke dok.
9Haba at ame tube hna hanyâûâ, me ame elâm ibetengiö:
Ke haba at ame hâhâ ta je ûnyi, me ame öûsâkâûöâ tavat me lawaedra.
10Ame nua dit hofuc nâ ka hnyi hnyekon at ae wâhmakhmeto
Hon je hna kot a khaca haded hnyi knyekon at ae monu.
11Haba at ae kong, me ame elâm he ka okûâ hna thu musi;
Anyin a wale adre me he ka kunâ kâu ûthumetu ae beovecâ.
12E so at ame he ka ûkhanö me bea adre hûgûnâ lakon,
Hon he ka ûkhanö me at ae monu hnyi anyin hwen monu.
13Haba at ame bi hwaban so ge kong,
Me ame ca he bi ka hia hulo hnyi hnyaban.
14Haba hwân iwatretra, me helâ me adre si deny köiö:
Anyin a wale degec ut ivino, ka tiga ca kû wathethot.
15Haba at ame haiwisa at ae kong, ke at ame haikongoâ at ae wisa,
Me tha hmiö Iehova hia ödru.
16Hnân eû hwaban hnyi hnaymen at ae monu he ka ûcû metâ,
Ke ba hnyekon bi?
17Haba waeny me ame betenge hnyi je ûen hia,
Ke adre hnokoâ liamakeiny hobi kau bong adre me vec hnyin.
18Haba at ae ba hnyekon, me ame ûkhöû hnyam,
Me tot hnân hwaban hnyi hnyimakan waeny.
19Haba at ame weny ka hanyâûâ, me ame weny iwatretra:
Haba at ame ogöranyâ homagouleny, me ame heleû hnaûhango.
20Haba at ame hnyok ae hwali me ame ca he ka wâ so:
Ke haba at ame hwihwiö ge bohmen, me ame he ka ta ka hnyi ûokonguny.
21Haba at ame hnokoâ at ae monu, me e hmak kâu:
Ke ba senyin ge kamen at ae monu.
22Haba hnyok ae hâhâ, me wale bubuny ae so:
Ke haba hnyok ame hloûhloû me ame ohwahwacitâ je jö.
23Haba at ae kong, me ame oc ut bwihlang ûnyi hnyi ûlainy,
Hnân ohwalö deny hna owisa.
24E bi metâ hnyi hnyimakan at ame wâhmakhmeto:
Ke e bi li emakan at ae monu hnyi je can hmeledrany.
25Haba nokon ae monu, me ame ovecâ kamen,
Ke ûnyi ae hiny ka momo a hnokoâ e.
26E ca so he ka bi hwaban ka at ae wisa,
Ke kot je than bi can anyidrin wisa.
27Haba at ame takoû hwan ta je hofuc, me ame wâhmakhmeto:
Ke haba at ae menyik hnyekon, me at ame wâ ûnykûme.
28Ame ne laba hnyibu at ae monu, me adre me ba me metâ bi:
Kʼ ame ne obuhlumo li esongodiny, me adre me ûnykûme me at ame wâ wia.
maintained by the British and Foreign Bible Society