Ta je Vejec 14
14
1TA je momo ae metâ adre me ve ânyâwia ta je hnyabadra:
Ke haba momo ae monu ame thang degecâ hnen li hnyamen bi.
2Haba at ame he hnyi anyin wisa me e ame outö Iehova;
Ke haba at ae hwali deny gethen, me ame hûkötiâ e.
3E hnyi hnyimen at ae monu osöiny bigan:
Kʼ ame he je hnyimen tavat ae metâ ka tuʼ ödra bi.
4A ne ba bolok, me kalaöt taben han:
Ke se hia jeû hwaban ihwegien bolok.
5Ame ca he at ohnatho ae hnathu ka thoi bi;
Kʼ ame he ka ha thoi hnen at ohnatho ae ca wisa bi.
6Ame heleû metâ hnen at ame ûhiö, kʼ ame ca wâ bi:
Ke hâhâ he ka wâhmakhmeto hnen at ame wâ ûnykûme.
7U je ne he hnyi hnyimakan at ae monu,
Me u me ca he ka wâ unyin bi li esongot ae wâ ûnykûme.
8Haba metâ anyin at e so, me wale he ka wâ ûnykûme deny gethen:
Ke haba hwen monu anyin tavat ae monu, me wale tang iyawo.
9Ame hlumâ hulo hnen tavat ae monu:
Ke e unyin tavat ae wisa ibetengiö.
10E khana hnyok anyin bi vec;
Kʼ ame ca he atkanyua ka hnyi hanen anyin senyin.
11Adre me be ka hagutâ uma umen tavat ae kong:
Kʼ ame he ka hwege uma mano umen tavat ae wisa.
12E hu gethen ae wisa hnyi hnyimakan at,
Ke haba obiny e, me gethen deny mok.
13Ame hmak hnyok hnyi ûen adre me hluma;
Ke haba obiny senyin, me hloûhloû.
14Ame he at ame saû hnyekon ka sekon ge deny ta je gethen:
Kʼ ame he at ae so ka sekon a ka ûnyi gan bi.
15Haba at ae ba hnyekon me ame kap ta je hofuc hia:
Ke haba at wâ wia me ame wâ ûnykûme deny gethen.
16Ame ot at ae metâ, me kec ge hulo:
Ke haba at ae monu ame bi gan, me ka geju kâu bi.
17Haba at ame ie hmonyin, me ame he ka ânyâ monu.
Ke adre me hûkotiâ at bihihwakecin ae kong.
18Haba hwajekhon tavat ae ba hnyekudra, me monu:
Ke haba tavat wâ wia me adre obicâ ge wâhmakhmeto.
19Tavat ae kong adre me iyâû ka tavat ae so;
Ke tavat ae monu adre me iyâû hnyi je homagouleny at ae wisa.
20Ame hmiân at ae theduoc hnen hanen:
Ke se hia tavat adre me betenge ge at ae tren omjeû.
21At ae kong at ame hmiân hanen:
Ke hnahic at ame betenge ge at ae ba ta ûnyi.
22Hawa, e ca monu tavat adre me vak hulo?
Ke ame he ka hu betenge me hnathu ge tavat adre me vak so.
23E hu troban hnyi ta je huliwa hia:
Ke haba ifucin li esongot me ame hake ûötheduoci.
24Haba tang omjehen tavat ae wisa, me anyidra korona:
Ke haba hwen monu anyin tavat ae monu, me ka hwen monu bi.
25Haba at ohnathoâ hnathu me ame omelo tavat:
Ke haba at ame ha thoi ame okûâ iyawo.
26E hnyi ot kö Iehova labageju ae hwege:
Kʼ ame he lakon ka hu dok hnân luba-duöng hnyin.
27Haba ot kö Iehova, me wale pupuainy möt,
Mʼ adre me kec ge je hnewe hnân mekiny.
28Haba hmanenanginy than, me tavat ae se hia:
Ke e ka wakhalet thibi, hnân e okongoâ than.
29Haba at ae bec he ka hmonyin, me gan hmâ wâhmakhmeto:
Ke haba at ame ie hmonyin, me ame ogânâ hwen monu.
30Haba hnyekon ae wisa me wale melen unyin:
Ke haba ciâ me wale bobot ka ta je jö.
31Haba at ame ovecâ at ae theduoc me ame haikongoâ At a op e:
He haba at ame betenge ge at ae theduoc, me ame ogânâ e.
32Adre hagutâ hnyikânâi at ae kong hnyi anyin monu:
Ke haba at ae wisa, me hu gejon hnyi anyin mok.
33Ame laba metâ hnyi hnyekon at ame wâ ûnykûme:
Kʼ ame manen ta je ûnyi eû hnyi hnyekon tavat ae monu.
34Haba at ame ogöranyâ hnyei, me hwakecin ae wisa:
Ke ame haikongoâ tavat hnen hwakecin bi ae kong.
35Ame betenge than ge athnyaba ame huliwa metâ
Kʼ ame he ka hmonyin ka at ame ohmehma.
maintained by the British and Foreign Bible Society