Levitiko 9
9
1KE haba hnyi bong a eitiny, Mose ame hao Arona, me lakon, me wahingatiny at Isaraela; 2ke haingen kö Arona, ka habe, Hom dö ke nak bolok hnân hudiny hulö, me mamoe baga ae ba hnyikongon, hnân hudiny leû, me hudo li meno e hnyi hnyimakö Iehova. 3Ke u ma he ka ha ka lakon Isaraela, ka habe, Hom dʼ öbun got baga me me hudiny hulö; me nokon kau, me nokon mamoe a khaca hunainy ae ba hnyikongon, me me hudiny leû; 4me bolok, me mamoe baga hnân hudiny ole, he ka hudo hnyi hnyimakö Iehova; me hudiny jeu adre me ûthueniken me wakaco, anyin a haba hnyi bong ang Iehova ame manen köbun. 5Ke odrin e hom ûnyi a ha Mose ka hnyi uma ûkhacaköu: ke haba ûkhacaköu hia adre me hakekeny, me ûtililen hnyi hnyimakö Iehova. 6Ke haingö Mose, ka habe, Walang ûnyi a hûna Iehova köbun he ka ânyâ, kʼ ame he ka manen köbun hmanenangi Iehova. 7Ke haingö Mose kö Arona, ka habe, He thö ka hnyi taben hut, me hudo thö hudiny ânyâm hulö, me ânyâm hut adre le, me bi hwaban ânyâm möt, me melen tavat: ke hudo hut anyin tavat, me bi hwaban anyidra möt, helâ me hna hûna hnö Iehova. 8Me haba Arona ame he ka hnyi taben hut, me hlingâ nokon kau hnân hudiny hulö, wale hobi kâu e bi. 9Ke laku Arona odrin e hom dren kâu: ke e ame hneû banyen hnyi dra, me kina hnyi je baitoiny taben hut, me hingâlâ dra hmelen taben hut: 10ke haba pipikhenya, me li wagien, me ûnyi ae lau ûnyi hnyi hon akiny, a hudiny hulö, e ame le hon taben hut; helâ me hna hûna hnö Iehova kö Mose. 11Ke e ame le utiöiny me unen ge meic hoton hnyaba. 12Ke e ame hlingâ hudiny leû, ke haba laku Arona odrin e ham kâu dren, me e ame dukâiâ igigilö hon taben hut. 13Ke odrin e ham kâu hudiny leû, wale je ec keihen, me ban: me e ame le hon taben hut. 14Ke e ame hneû tang tiny, me je can, me le hon hudiny leû hon taben hut. 15Ke e ame hudo hudiny tavat, me hom got baga a hudiny hulö anyin tavat, me adre me hlingâ, me hudo e hnân hudiny hulö helâ me a bân. 16Ke e ame hom hudiny leû, me hudo hoton hnanyibu. 17Ke e ame hom hudiny han, me okhaca aoc ge hnyamen, me le hon taben hut, ka ke hut bi hudiny han hnyi hnyomakatu. 18Ke e ame hlingâ bolok me mamoe baga hnân hudiny ole hobi kâu tavat: ke laku Arona odrin e ham kâu dren, me e ame dukâiâ e igigilö hon taben hut, 19me pipikhenyainy bolok, me mamoe baga, me obiny, me hlanyin tang tiny, me li wagien, me ûnyi ae lau ethö hon akiny: 20ke odrin e ip pipikhenya hon ûlainy, ke e ame le pipikhenya hon taben hut: 21ke haba ûlainy me jevan a metâ, me Arona ame hajijingâ hnân hudiny hajijing hnyi hnyimakö Iehova, helâ me hna hûna hnö Mose. 22Ke haba Arona ame hai li hnyamen hon tavat, me hahnahici ödra; me e ame utut ûheny hnyi hna hudo hudiny hulö, me hudiny leû, me je hudiny ole. 23Ke Mose me Arona ödru me tha didro ka hnyi uma ûkhacaköu, me dit hmetu but, me hahnahicâ tavat: me ame manen ka tavat hia hmanenangi Iehova. 24Ke ame he but meic ûheny ûnyi Iehova me le avâ hudiny leû, me pipikhenya hon taben hut; ke a wâ but e ge tavat hia, me adre me hongot, me ta ju hnyikânâi.
maintained by the British and Foreign Bible Society