Levitiko 7
7
1KE walang hnanyibuiny hudiny monu: wale ae ti kap. 2Adre me he ka hlingâ hudiny monu hnyi dok adre me labö hlingâ hnyin hudiny leû: ke adre me he ka dukâiâ dren igigilö hon taben hut. 3Ke e ame he ka hudo pipikhenyainy hia; wale obiny ae pipikhenya, me pipikhenya at ame lan tang tiny, 4me li wagien, me pipikhenyainy, cicö li jebalainon, me ûnyi ae lau ethö hon akiny, e ame he ka tha hom me li wagien: 5ke ame he at bihut ka le ta je ûnyi e hon taben hut, me me hut a an ge meic kö Iehova: haba ûnyi e me hudiny monu. 6Ame he obaga hia a hnyat bihut ka an e, adre me he ka an e hnyi dok ae kap; wale ûnyi ae ti kap. 7E ûcû thibi hudiny hulö me hudiny monu: khaca thibi hnanyibu hobi kâu li ûnyi e: haba at bihut ame bi hwaban möt kâu, me anyin bi e. 8Ke haba at bihut, at ame hudo hudiny leû anyin ke at, me anyin bi unen hut adre le waleji e ame hudo. 9Ke haba hudiny han hia adre thân, me ta je ûnyi hia adre ânyâ hnyi faraingpan me öt, me ame he ka an at ame hudo ûnyi eling. 10Ke haba ta je hudiny han hia adre ûthueniken me wakaco, ame ne mada, me wale anyin laku Arona hia, e ûcû ka ke at me ke at.
11Ke walang hnanyibuiny hudiny ole, adre me he ka hudo kö Iehova. 12Ame ne he ka hudo e hnân hudiny ole, me e ame he ka tha hudo me hudiny ole je ong areto adre ca levenâ bi adre ûthueniken me wakaco, me je ong areto ae halelöu adre ca levenâ bi adre khinö wakacoiny, me je ong areto adre ûthueniken me wakaco, a salawa ae so adre le. 13E ame he ka hudo hudiny hut tha e me ta je hudiny ole, me hnân ole, tha e me je ong areto adre ca levenâ bi. 14Ke haba khaca hut hnyi je hut hia, me ame he ka hudo hnân hut adre kap goranyai kö Iehova: ke haba at bihut at ame dukâiâ dren je hudiny ole, me, anyin bi e. 15Ke haba utiöiny hudiny ole hnân anyin ole, adre me he ka han hnyi bong adre hudo hnyin; e ame ca he ka ip kolon ke ne o but hnyomakatu. 16Ke ame ne khöbi, ame ne hudiny ibetengiö anyin hut, me adre me he ka han e hnyi bong adre hudo hnyin anyin hut: ke bong nyi adre me he ka an kolon: 17ke haba kolon utiöiny hut hnyi bong we, me adre me he ka le degecâ e ge meic. 18Ke adre me ne he ka an ke keihen utiöiny hudiny ole hnyi bong we, waleji e ame hudo, me adre me ca lie ka kap e, ke adre me ca he ka aû e ka at ame hudo: ûnyi ae ikiki, ke haba at ame he ka an, me ame he ka takoû e anyin hulö. 19Ke adre me ca he ka an utiöiny ame kâlâ ge ûnyi ae bo kong: adre me he ka le degecâ e ge meic. Haba utiö ame he tavat thibi ae bo so ka hnyi han: 20ke haba at ame han utiöiny hudiny ole wale a anyi Iehova, ke e at ae bo kong, me adre me he ka subâ degecâ at eling ûnyi hnyi iny hnyei. 21Ke haba at ame kâlâ ûnyi ae bo kong, ame ne bo konginy at, ame ne bo konginy meno, ame ne ke ûnyi bi ae ikiki ae bo kong, me han utiöiny hudiny ole, wale a anyi Iehova, me adre me he ka subâ degecâ at eling ûnyi hnyi iny hnyei.
22Ke Iehova ame ha kö Mose, ka habe, 23Ha thö ka lakon Isaraela, ka habe, Ca he öbun ka han pipikhenyainy kau, me mamoe, me got. 24Ke haba pipikhenyainy meno ame mok hwege, me pipikhenyainy meno adre oloû, me ûcû hobi kâu ke ta je huliwa: kʼ öbun e ca he bala ka an e. 25Ke haba at ame he ka han pipikhenyainy meno, adre bödra ka hudo hnân hut a an ge meic kö Iehova, me adre me he ka subâ degecâ at a han, ûnyi hnyi iny hnyei. 26Ca he öbun ka han dra hnyi je hnyababun hia, ame ne dren meno ame gâ, ame ne meno a vak can. 27Haba at ame han dra, me adre me he ka subâ degecâ e ûnyi hnyi iny hnyei.
28Ke Iehova ame ha kö Mose, ka habe. 29Ha thö ka lakon Isaraela, ka habe, Haba at ame hudo anyin hudiny ole kö Iehova, me e ame he ka hom anyin hut kö Iehova ûnyi hnyi anyin hudiny ole: 30e ame he ka hom ge li hnyamen je hut a an ge meic kö Iehova, a pipikhenyainy, me ûlainy, e ame he ka hom, me me hajijingâ ûlainy hnân hudiny hajijingâ hnyi hnyimakö Iehova. 31Ke ame he at bihut he ka le pipikhenyainy hon taben hut: ke haba ûlainy me ö Arona me lakon. 32Ke öbun e he ka ham ka at bihut jevan a metâ hnân hudiny kap goranyai ûnyi hnyi anyibun je hut ole. 33Haba ke noku Arona at ame hudo dren je hudiny ole, me pipikhenyainy, me anyin bi jevan a metâ hnân an. 34Anyin oge me kap ûnyi ge lakon Isaraela ûlainy hajijingâ me jevan hnân kap goranyai ûnyi hnyi anyidra je hut ole, me ham ûnyi e kö Arona at bihut me lakon me me hwajekhöûdrin nyiele balua ûnyi ge lakon Isaraela.
35Wale hwajekhon Arona, me hwajekhon lakon, ûnyi hnyi je hut a an ge meic ko Iehova, hwân hnyi bong e ame otilʼ ödrin ka hnyi hanymen bi hut kö Iehova; 36waleji Iehova ame hûna he ka ham ködrin ûnyi ge lakon Isaraela, hnyi bong e ame hû odrin. Wale ke hwajeköudrin nyiele balua hnyi anyidrin ta je dö. 37Wale hnanyibuiny hudiny leû, me hudiny ban, me hudiny hulö, me hudiny monu, me je hna otilâ, me je hudiny ole; 38waleji hnö Iehova hna hûna kö Mose hon bucen Sinai, hnyi bong e ame hûna ka lakon Isaraela he ka hudo anyidra je hut kö Iehova hnyi hnyebuba Sinai.
maintained by the British and Foreign Bible Society