Josua 6
6
1(KE ame ti thelöng hwegiâ Jeriko can lakon Isaraela: e ba at ame didrut, ke ba at ame didrö.) 2Ke Iehova ame ha kö Josua, ka habe, Wâ bi, oge hia but ham ka hnyi hnyamâm Jeriko, me thaniny, me je taben tavat ae hwege. 3Ke öbun e he, tavat a hnyi vat hia, ka igigilö taun, me okhaca he igigilö taun. U me he ka ânyâ helâe hnyi je bong a siks. 4Ke ame he tavat bihut a seven ka hom tilâ je trutruiny jubeli hnyi hnyimakan tang: ke haba hnyi bong a seveniny, hamöbun he ka oseven he igigilö taun, ke ame he tavat bihut ka tûâ tilâ je trutru. 5Ke e ka beû but hna tûâ trutruiny jubeli, ke öbun ka long ut ifuciny trutru me ame he tavat ka kuku hwege: me ame he ka ū but haginy taun adre up veten, me me ve ölö thö tavat hia thithö hnyi hnyimaködra. 6Ke haba Josua nöku Nuna ame hawâ tavat bihut, me ha ködra, ka habe, Hom dö tangen ûhihinyköu, ke hamen hnyat bihut a seven ka hom tilâ je trutruiny jubeli a seven hnyi hnyimakan tang anyi Iehova. 7Ke e ame ha ka tavat, ka habe, He thʼ öbun me igigilö taun, ke bân hnyat adre hom omjehen vat, hnyi hnyimakan tang anyi Iehova. 8Ke a hia but Josua ha ka tavat, me ame he hnyat bihut a seven ke ödrin e hom tilâ je trutruiny jubeli a seven hnyi hnyimakö Iehova, me tûö trutru tot: kʼ ame he hotudrin tangen ûhihinyköu anyi Iehova. 9Ke ame bân tavat adre me hom omjehen vat hnyi hnyimakan hnyat bihut ödrin e tûâ je trutru, ke ame he hoton tang obiny bunyen, ke adre me tûö trutru tot. 10Ke Josua ame ha ka tavat, ka habe, Ca he öbun ka hongot, kʼ adre me ca he ka long ifucibun, ke so ame ca o ke ong hofuc ûnyi hnyi hnyimöbun, ke ne o but bong oge me he ka kunʼ öbun ka kuku: me waleling öbun e he ka kuku. 11Me e ame kunâ he ka igigilö taun ge tang anyi Iehova, kʼ adre me okhaca igigilö; me adre me hmetu ka hnyi hna hunuma, me mokut eling.
12Ke Josua ame vesâ hnyi hnyomakatu, ke hnyat bihut ödrin e hom tang anyi Iehova. 13Ke haba hnyat bihut a seven, me ödrin e hom tilâ je trutruiny jubeli a seven hnyi hnyimakan tang anyi Iehova, ödrin e he bala me tûö trutru tot, kʼ ame bân tavat adre hom omjehen vat; kʼ ame he hoton tang anyi Jehova obiny bunyen, me tûö trutru tot. 14Ke hnyi bong a loiny ödrin e okaca he igigilö taun, me hmetu ka hnyi hna hunuma: ke adre me ânyâ helâe hnyi je bong a siks. 15Ke haba hnyi bong a seveniny me adre me vesâ hnyi okubelit me he igigilö taun helâ me hwakecin ûhedra, ke ne o but oseveniny: ke haba hnyi bong thibi eling me adre me oseven he igigilö taun. 16Ke haba hnyi ûen a seveniny, kʼ ame tûö trutru hnyat bihut, me haba Josua ame ha ka hnyat bihut, ka habe, Kuku thö; anyin a hia but Iehova ham köbun taun. 17Kʼ adre me he ka ke ip taun, me ta je ûnyi hia eû hnyin hobi kö Iehova: ke Rahaba thiju momo hnyi gethen a gʼ ame he ka möt, e me hnyat hia thithö unyin hnyi uma, anyin a e ame ikhâlâ li metâ otin e kunâ. 18Ke öbun e he ka tuʼ öbun bi ge ta je omjeû ae kap; wâ öbun nye hia but ke ip, me hom ûnyi adre ke ip; me ham hnaûhango ka lap anyin, at Isaraela hia, me okongoâ e. 19Ke haba je sileva hia me gol, me je kaia bras me fao, adre me okabâ kö Iehova: adre me he ka oâ ka hnyi tang omjehe Iehova. 20Ke ame kuku tavat, me adre tûâ je trutru: ke ame long hnen tavat ifucin trutru, me ame kuku hwege tavat goranyai, me ame ū but hna up veto, me ame ve ölö thö tavat ka hnyi taun cici ödrin, me ödrin e hûgûnâ taun. 21Me ödrin e ti ohia ta je ûnyi hia hnyi taun, je baga me momo, me wanakat, me hingat, me bolok, me mamoe, me asina, ge hele vat. 22Ke Josua ame ha ka li at ödre ecmâkâ hnyei, ka habe, He thʼ öbu ka hnyi uma umen momo hnyi gethen, me hom but momo mödrin hia thithö a tha ödrin mē, helâ me hnöbu hna khemanyin kâu. 23Me ame didro li hidröu li at ecmak, me hum Rahaba kâû, me kamen me hinyen, me je liamekeiny mē, mödrin hia a tha ödrin mē, ke ödru me hom kâû anyin lap hia; me hnʼ ödrin ka hnyi hoton hna hunuma anyin at Isaraela. 24Ke ödrin e thong taun ge meic, me ta je ûnyi hia eû hnyin: ke haba sileva me gol, me bras, me fao, ödrin e ip hnyi tang omjeû hnyi uma umö Iehova. 25Ke Josua ame omeli Rahaba momo hnyi gethen, me lap anyin kamen, mödrin hia a tha ödrin mē; ke e ame laba hnyi Isaraela ke ne o but hnyi bong ang; anyin a e ame ikhâlâ li metâ waleji Josua ame kunâ he ka ecmâkâ Jeriko. 26Ke haba Josua ame ha hwegiâ ködra hnyi ûen eling, ka habe, Hnaûhango hnyi hnyimakö Iehova at ame he ka tot me op hmeto taun eang Jeriko: e ame he ka bi taben e ge imekeiny nokon a atö, me otilâ je homagouleny ge imekeiny nokon a wakeiat hmönyin. 27Ke tha Iehova me Josua, me ame lung hnyi hnyei hia.
maintained by the British and Foreign Bible Society