Isaia 41
41
1TA je bomene lö, laba hnyibû ju hnyi hnyimakök; ke ame he ta je hnyei ka ohâtâ tang hwegeiödra: he but jem ödra, mʼ adre me fuc dö: ate me he ka ûkhacaköu me ûhnei. 2Ia oâ ke at ûheny jimeio, waleji e ame hawâ ka hnyi li can hnyi hwakecin ae wisa? e ame hna je hnyei kâu, me otilâ he ka musi hon ta je than; e ame hnʼ ödra ka hnyi anyin hele vat helâ me sesâ, me ka anyin cafana helâ me je thatûnyin hwit ame tûâ ang. 3E ame hnu hotudra, me he so; waleji hnyi gethen e ame tiga ca vheno ge li can. 4Ia mâdrâ me ânyâ e, ame hawâ je dö ûnyi hnyi can? Inya Iehova at a bân me biliny, inya thibi e. 5Haba je bomene adre me wâ me ot; haba je can hmeledrany adre me öbubuny: adre me hakekenyâ, me o. 6Adre me ûhadruoköu ödra ke at me ke at; ke adre me ve ha ka je liamekeiny mödra, ka habe, Hwege ju. 7Ke haba at tretrau ûto ame sihwegiâ at leû fao, ke haba at ame okhabalavâ ge hama ame sihwegiâ at ame kot taben huliwa a fao, me ha, ka habe, E so, hna leû veto hnân hûjâ: me e ame ohmâ e ge je fao me me ca bwebwet.
8Ke haba u Isaraela lö a athnyabaik, ke Jekob at oge me ûca, mâtrâni Aberahama a hanok; 9a u at oge me kât ûnyi hnyi je can hmeledrany, ke hawâ ûnyi hnyi je ke keihen e, ke ha köu, ka habe, U thibi, athnyabaik oge ûco u ke ca hna degeci u; 10awe, ca ot bi, anyin a tha inya möu; ca hlohlo bi, anyin a inya Khongom: oge me he ka ohwegiö u; eke, oge me he ka hadruo u; eke, oge me he ka ci u ge hnyamök a metök ae wisa. 11Wâ bi, adre me i he ka hmehma me hlohlo ödra hia thithö adre me hmönyidra köu: ke haba tavat adre me ivino möu me adre me he ka helâ me ba kʼ adre me he ka hia but. 12U me he ka elom ödra, ke u me ca he ka ō ʼdra, wale tavat adre me ivino möu; kʼ ame he ka helâ me ba me ûnyi baû bi tavat adre me vat möu. 13Anyin a inya Iehova Khongom oge me he ka kat benyâm a metâm, me ba köu, ka habe, Ca ot; oge me he bi nya ka hadruo u. 14Ca ot bi u Jekob a waahnyöng, ke öbun tavat Isaraela; haingö Iehova, ka habe, Oge me he ka hadruo u; ke haba at ûhomeli u, me Kabi Isaraela. 15Wâ bi, oge me he ka wiö u hnân huje hwit ae so hwan a teb ûnyi ke hu nyon: mʼ u me he ka kokot je bucen me me ûhnyûkong ju, ke u me he ka wia je hut me me helâ me unen hwit. 16U me he ka ulic ödra, kʼ ame he ang ka tûâ degeci ödra, kʼ ame he hou ka ovesei ödra: ke u me he ka senyini Iehova, ke u me he ka hobâ Kabi Isaraela. 17Tavat adre me vec, ke ta je theduoc, me adre me heleû köiö, me ba, ke atgec dö ta je bohmödra ge beic; ke oge me he bi nya Iehova ka thu kodra, oge me ca he bi nya Khongu Isaraela ka hna degeci ödra. 18Oge me he ka oâ je wagewe hon je bucen ae ba leûnen, ke je hna pupua köiö hnyi je hnyigöulen je bucen: oge me he ka wia hnyebuba me me köiö, ke hnyei ae hwahwacit me me je an ame pupua. 19Oge me he ka tä ta je arasi hnyi hnyebuba, ke je ohum, ke adasi, ke ûö hnân wakaco; oge me he ka tha ip hnyi hnyei baga kop, ke tidera, ke tasura: 20mʼ adre me he ka wâ me khanʼ ödra, me ûnykûme, me tha wâ ûnykûme a ga ânyâ hnen benyi Iehova, ke a op e hnen Kabi Isaraela.
21Ho jem hnobun hna ivino, ame ha Iehova; omanenâ thö hobun ta je hofuc ae hwege, ame ha Tuhö Jekob. 22E so adre me he ka omanenâ, me thumetu öta ge ta je ûnyi ame he ka kû: ha thʼ öbun ge bongon ta je ûnyi kâû adrem, mʼ ate me ûnykûme me wâ obiny ta je ûnyi e; ke ame ne he ka omanenâ köta ta je ûnyi ame he ka o. 23Ûthumetu thö ge ta je ûnyi ame he ka kû hnyi obiny, me me khanʼ öhmun a öbun ta je khong: eke, ânyâ thö so, ame ne kong, mʼ öhmun e he ka hlohlo, me tha wâ bi e. 24Wâ bi, öbun ti ba, ke ti ba onyen anyibun huliwa: e ikiki at ame ûcʼ öbun.
25O ge hia but oâ ke at ûheny hnyi hwadro, ke e ame he jem; ke ûheny hnyi hna o hnen seûno, oge me oâ ke at ame hawâ iök: e ame he ka je than helâ me hna dâ dröu, ke helâ me at ame op kaia ame ututo kânâ ae kece. 26Ie at ame haimemenâ e ûnyi hnyi can, me me khanʼ öta thö? me kâû adrem mʼ ate me he ka ha ka habe, E at ae wisa? eke, e ba at a haimemenâ, eke, e ba at ame omanenâ, eke, e ba at a long hobun je hofuc. 27Oge ma bok ka ha kö Ziona, ka habe, Wâ bi, wâ bi ödra; ke oge me he ka ham kö Jerusalema at ame he ka hom ûthumetu ae so. 28Ke oge me wâ, ke ba at, ke ba at ha bongon unyidra, ke oge me hnei ödra, ke ba at ae khana thu ge ke hofuc. 29Wâ bi, ödra hia, e ûnyi baû me ba onyen anyidra je huliwa: ang thibi, me monu but anyidra ta je hnatheat adre okoiâ.
maintained by the British and Foreign Bible Society