Isaia 28
28
1EKÖLÖ ge koronainy bigan anyin tavat adre me monu ge grâg hnyi hnyei Eferaima, me vongon ame meleca ge hmainy ae hmanenang, wale hnyi ban hnyigöulen bucen ae pipikhenya anyin tavat adre me ngâ ge waina. 2Wâ bi, e unyin Than at ae hwege me hnyok baga; helâ me hna ta hnen we ae wahma, me hou ame okongoâ, helâ me je köiö ame di hwege me bahihingölö, adre me he ka sa hwegiâ hnyikânâi. 3Adre me he ka ututo ge ta je hnyeûca koronainy biganiny tavat adre me monu ge grâg hnyi Eferaima: 4ke haba vongon ame meleca ge hmainy ae hmanenang, wale hnyi ban hnyigöulen bucen ae pipikhenya, ame he ka helâ me wan meta a bân ke tiga ca honivakeny; e ka wâ e hnen ke at, ke tiga e bi hnyi hnyamen e ame ie han e. 5Ke hnyi bong eling ame he Iehova tuhan sabaoth ka tot hnân korona ae hmanenang, me hnabinybak ae mec, hobi kâu je kolon lakeiny: 6me hnân hanuiny hna owisa ka at ame laba hnyi tap owisa, me hnân tang hwege kodra adre me ohmetuhmeto vat ûnyi hnyi homagöule. 7Ke a hia but minya tavat ang he hwali ge waina, me he monu ge grâg; ame he hwali at bi hut me perofeta ge grâg, ame utʼ ödra ge waina, ke adre me he monu ge grâg; adre me haû hnyi hnödra hna wâ, me ta tot hnyi hna owisa. 8Anyin a unöngötö je laulau hia ge, hna hmita me ikiki, e ba dok ae kalaöt. 9E ame he ka nö ia ge metâi ke ame he ka owâhmakhmeto ia ge uthumetu? tavat adre hnebaio, me hom ûnyi hnyi li basin? 10Anyin a e bi hna ûnö, me ke hna ûnö; hna ûnö, me ke hna ûnö; ke tulut, me ke tulut, tulut me ke tulut; hnyiban ang ae ûhnyûkong, me hnyiban e ae ûhnyûkong. 11Ohe, ke e ame he ka ha ka tavat ang a deny tavat adre ha hofuc hwen kanyua, me hwen ke hnyei bi: 12walegi e ame ha kodra, ka habe, Walang hna menâ, omenâ ju at ae sēnyin; ke walang hnahic: ke so bi ödra höcö bi long. 13Anyin a wale ama e bi kodra hofuc ho Iehova, a hna ûnö, me ke hna ûnö, hna ûnö, me ke hna ûnö; tulut me ke tulut, tulut me ke tulut; hnyiban ang ae ûhnyûkong, me hnyiban e ae ûhnyûkong; mʼ adre me he ka he me ta hnyimen goranyai, me hmetru, me hnok, me ca.
14Anyin a wale long ju hofuc ho Iehova, öbun tavat hlumö at, tavat öbun e muso tavat eang a e hnyi Jerusalema: 15Anyin a öbun e ha, ka habe, Öhmun e hia but ûhihinyköu me mok, ke öhmun e tha hien me hedis; e ka o thö okongon ae: bahihingölö, ame ca he ka o kohmun; anyin a öhmun e hia but wia thoi me hnân anyihmun hnabâ, ke öhmun e hia but ikhölö hmelen iyawo: 16anyin a wale ame ha Than Iehova, ka habe, Wâ bi, inya oge me ip hnyi Ziona veto hnân taben, a veto adre cubec, vetoiny ban kopiny ae gan hwaban hnân taben ae hmâ: kʼ ame ca he ka he mweimwei at ame labageju kâu. 17Ke oge me he ka ânyâ hna owisa hnân tulut, ke hwakecin ae wisa hnân tulut ûhni; kʼ ame he we wahma ka aba degecâ hna-bâiny thoi, kʼ ame he ka bahihingölö ta je köiö ka hnyi dok adre me lubaduöng hnyin. 18Ke ame he ka ûnyi baû hnobun hna ûhihinyköu me mok, kʼ ame ca he ka tethmâ hnobun hna tha hien me hedis; ke e ka o thö okongon ae bahihingölö, me adre me he ka utiti öbun. 19Hnyi je ûen e ame he ka o, me ame he ka hum öbun; anyin a e ame he ka o hnyi je hnyomakatu, me lany me lit: ke e thibi ot he ka wâhmakhmeto ûthumetu. 20Anyin ae okhulit hna mokut, me me ca khana bi at he ka hlöhlöu hnyin; ke ûhnyûkong aven kubö, me ca ûcû bi e ka tube e. 21Anyin ame he Iehova ka todrö helâji me hnyi bucen Farez, kʼ ame he ka hmonyin helâji me hnyi hnyigöulen Gibeona; me me ânyâ anyin huliwa, wale anyin huliwa ae ke bongon bi, me oâ hnen hna ânyâ, wale hnen hna ânyâ ae ke bongon bi. 22Ke walang ang ca he öbun ka hlumö at, wâ adre nye ohmâ je hna cʼ öbun: anyin a oge hia but long ûnyi ge Than, Iehova tuhan sabaoth, a gʼ ame ip hmâ he ka ohia hnyi hmeledrany hia.
23Tevehlöng ju öbun, ke long ifucik: tevehlöng ju, ke long hofuc oge me he ka ha. 24Hawa, ame he at trohnen ka labö trohnen me me cekön? hawa e ame he bala ka wia me omomono kânân kânâ? 25E ka thaohonâ e, hawa, ame ca he bi ka khûkhûâ je kesaka, ke jijingâ but je komina, me tä gaga hwit me bali hnyi; hnen, ke kesem hnyi baten e î 26Anyin a Khongon ame ometâ e hoton wisa, me nâ e. 27Anyin adre me ca uja kesaka ge ûnyi ae so homakan, kʼ adre me ca wia waengeniny kat hon komina; ke adre me kokot kesaka ge uci, kʼ adre kokot komina ge ong uto. 28Adre me omomono hwit; anyin a e ame ca he bala ka kokot: ke ame ne jijingâ e hnen waengeniny kat me haleny je hors, me e ame ca omomono e. 29Ame o minya ûnyi ga Iehova tuhan sabaoth, at ae khana bongon hnân lâiâ, ke e gan hmâ anyin metâ.
maintained by the British and Foreign Bible Society