Hosea 13
13
1AME fuc Eferaima, me ame öbubuny ehe; ke e ame ka ogânâ e hnyi Isaraela: ke e ame hulo but ga Baala, me ame mokcu. 2Ke walang ang adre me kong tot, kʼ adre me ânyâ je idola hobi kodra adre me okoiâ ge anyidra sileva, a je idola hoton anyidra metâ, huliwa anyin at tretrao hia: kʼ adre me ha ge je ûnyi e, ka habe, E so ame he tavat adre me he ka hudo hut ka drem je nokon kau. 3Anyin a wale adre me he ka helâ me ûlâ hnyi hnyomakatu, ke helâ me dân hau ae logot hia, ke helâ me unen hwit ame oû ang dö ûnyi hnyi hna huje hwit, ke helâ me hai ûnyi hnyi deny hai. 4Ke inya Iehova Khongom ûnyi hnyi hnyei Aigupito; kʼ ame ca he ka khanö u ke khong ke hake inya thibi, ke ba at ûhomeli ke hake inya ke. 5E khanö nya u ehac hnyi hnyebuba, hnyi hnyei ae hwahwacit. 6Adre me ka sekudra hoton ö ʼdra jeû; e sekudra thö me ame bi gan je hnyekudra: anyin a wale adre me hnying nya. 7Anyin a wale iny ûcû me liona kodra, oge me he ka tue eû hnyi gethen helâ me lepad: 8ke oge me he ka ûkhanö mödra helâ me bea adre me hûgûnâ lakon, ke oge me he ka kia thamuâ tangen oûnykûmidra: ke oge me he ka ön ödra eling helâ me liona; ame he ka oloû kiʼ ödra hnen menoiny hnyot. 9Isaraela lö, walang hna hangö u, a gʼ ame ve u mönya, at hadruo u. 10Ewa tuhâm, me me omeli u hnyi ânyâm ta je taun hia thithö? ke ânyâm tavat owisa köu, waleji u je ha, ka habe, Ham könya than me je taben? 11Oge hia but ham köu than hnyi anyik hmonyin, ke hûgûnâ e hmetu hnyi anyik wathethot. 12Adre hia but lan hulo anyin Eferaima; adre hia but hitangen anyin monu. 13Ame he ka o kâu vec, helâ me momo ame he ka hnokoâ: e nokon ae ba metâ; anyin e ca so e ame bec he ka kolu. 14Oge me he ka hûgûnʼ ödra ûnyi hnyi maniny erkemok; oge me he ka omeli ödra ûnyi ge mok: Mok lö, ewa ânyâm je ûokonguny? Erkemok lö, ewa hnâm hna ûhangö? adre me he ka ikhâlâ ietra ge li emakök. 15Eja ke ne a ne se hia but e unyin je liamekeiny, ame he bi ka o ang hwei wale ang anyi Iehova unyi hnyi hnyebuba, me me hwahwacit anyin pupua, me hme belen an: e ame he ka soh tang omjeû hia ae hmanenang. 16Ame he Samaria ka hijen anyin bi hulo; anyin e ame hia but ûkhin fuc me Khongon: adre me he ka ta ge hele vat; adre me he ka sa lakudra je mendring, me kave omomo a je erkin.
maintained by the British and Foreign Bible Society