II. Samuela 22
22
1KE Davita ame ha kö Iehova je hofuciny khumöng ang hnyi bong Iehova ame omelö e ûnyi hnyi hnyamen je iwahnaihmiony mē hia, me ûnyi hnyi hnyamö Saulo: 2haingen, ka habe,
Iehova kicik, me hnok hnabâ, me at a omeli nya, walönya ang;
3E Khongon kicik, oge me he ka labageju kâu;
E becik, me faoiny meno hnân omeli nya, me tabök tap ae görany, me hnok hna he ka kec kâu:
At ûhomeli nya lö, u je omeli nya ûnyi hnyi ûokonguny.
4Oge me he ka hongot kö Iehova, e ûcû he ka ogânâ:
Mʼ adre me he ka omeli nya ûnyi ge je iwahnaihmiony mönya.
5Anyin ame wadrö nya je waköiö adre me mekiny,
Ame oti nya je di anyin tavat ae kong.
6Ame wadrö nya je toiny hedis:
Oge hnok dö ge je tö adre me mekiny.
7Oge me hongot kö Iehovo hnyi anyik vec,
Eke, oge me hawâ Khanguk:
Ke e ame long hok hnyi umen uma,
Ke ame o but hwan anyik khöû ka hnyi li hnyikonyen
8Ke ame bwebwet me öbubuny hmeledrany,
A okokok dö je taben drany
Me bwebwet, anyin a e hmonyin.
9Ame ölö hai ûnyi hnyi li hnyingöiny,
Ke meic ame han ûnyi hnyi hnyimen:
A möt dö je walep kâu.
10E ame oto hwalö drany minya, me utut;
Ke e hu menekholom ae khot eû hmelen li can.
11Ke e ame laba hon kerubi, me gâ:
Eke, adre me wâ e hon li labenyin ang.
12Ke e ame ânyâ menekholom hnân je tungen igigilo e,
Kʼ ame ûkhöûnâ je köiö hnân je ûlâ ae haki ethö.
13Adre omelö je walepiny meic
Ûnyi ge hadröngöc hnyi hnyimakan.
14Iehova ame ânyâ hendreng ûnyi hnyi drany,
Ke ame fuc At ae ti Beönua.
15Ke e ame kunâ je fana me ovesei ödrin;
Me hucuce, mʼ ödrin e monumonu.
16Me manen dut je deny köiö ae gan,
Adre me omanenâ je taben hmeledrany,
Anyin a Iehova ame thawâ,
Ûnyi ge homenâiny li hnyingöiny.
17E ame ûkhûnöng ûheny dö, e ame hum nya;
E ame lili nya ûnyi hnyi hnyin je köiö ae se;
18E ame omeli nya ûnyi ge iwahnaihmiöny mönya ae hwege
Me tavat adre me hûkötiö nya; anyin a ödra hwege huk.
19Adre me o könya hnyi bonginy anyik vec:
Ke Iehova cik.
20E ame hum nya minya ka hnyi dok ae gan:
E ame omeli nya, anyin a e ame senyin könya.
21Iehova ame hia but bi hwaban könya hoton hwakecik ae wisa:
E ame bi hwaban könya hoton hâuen li hnyamok.
22Anyin oge me vheno je gethen de Iehova,
Ke oge me ca saû degecâ bi Khong me be monu but.
23Anyin a e bi hnyi hnyimakök anyin je hna owisa hia:
Ke oge me ca saû ge anyin je hnanyibu.
24Ke ba kongik kâu,
Ke oge me tuö nya, mʼ oge me ca hnyi monu.
25Anyin a wale Iehova ame hia but bi hwaban könya, hoton hwakecik ae wisa;
Hoton hwakecik ae wisa hnyi hnyimakan,
26U me he ka betenge ka at ame betenge bi,
U me he ka ti wisa ka at ae ti wisa;
27U me he ka hwakecin ae hau ka at ame hwakecin ae hau;
Ke u me he ka hwali ka at ame ânyâ hwakecien ae hwali.
28Ke u me he ka omelö tavat adre me oevcâ:
Ke u me he ka wâ tavat ae bi gan, mʼ u me he ka ohnyikânâi ödrin ju.
29Anyin a u, Iehova lö, anyik lamepa:
Ke ame he Iehova ka omelamâ anyik menekholom.
30Anyin a ûnyi gam oge me wadring hon deo vat:
Ûnyi ge Khonguk oge me gâ hanyâûâ hna up haginy.
31Haba Khong, e ti wisa deny gethen:
Adre cubec hofuc ho Iehova;
E becidrin hia tavat adre me labageju kâu.
32Anyin a ia Khong e ka ca Iehova?
Ke ia kic e ka ca Khongutin?
33Khong anyik hnabâ ae hwege:
Ke e ame su at ae ti wisa hnyi deny gethen.
34E ame ânyâ li can me me helâ me aila:
Me olabö nya hon anyik je dok ae görany.
35E ame nâ li hnyamok he ka vat;
Me me oto cafana bras ge li benyik.
36U je hia but ham könya becin ânyâm ûhomeli:
Ke ame oganö nya ge hwakecâm ae menyik.
37U je hia but ogânâ je hna okca hmelik,
Ke ame ca haûhaû li hnyeûcak.
38Oge hia but hnu hoton anyik je iwahnaihmiöny me ohiʼ ödrin;
Ke khaca oge me ca hmetuhmetu ke ne o but ame hiʼ ödrin hia but.
39Ke oge hia but ohiʼ ödrin, me dâoi ödrin, me me ca khanʼ ödrin bi tot:
Eke, ödrin e ta but hmelen li cak.
40Anyin a u je oweikö nya ge man hobi kâu vat:
U je hom ûhnyûkongu ödrin hmelik, tavat adre me tot könya.
41Ke u je wia hoton könya je iwahnaihmiöny mönya,
Mʼ oge me he ka ohiʼ ödra adre me hûkötiö nya.
42Adre me bwebwele, ke ba at he ka omelö;
Kö Iehova, ke e ame ca thu kodra.
43Me oge me kot omomonu ödra helâ me sesâiny kânâ,
Oge uti ödrin helâ me hmudrainy je gethen, me ulili ödra.
44Ke u je hia but omeli nya ûnyi hnyi je iwatretra anyin ik hnyei;
U je tuö nya mʼ inye ban ta je hnyei bi:
Ame he ka bi athnyabaik hnyei ae ca khanö nya.
45Ame he je atkanyua ka nom könya:
Ödra ka long gak, me adre me he ka ling nya.
46Ame he je atkanyua ka aû tot,
Me o hnyi öbubuny ûnyi hnyi hnyeutidra ae nedrong.
47E möt Iehova; ke so e hnahic ut kicik;
E so adre ogöranyâ Khongon kiciny melik:
48Wale Khong at ame bi hwaban hnân hobi könya,
Me hom ûhnyûkongoâ ta je hnyei hmelik,
49Me hum nya ûnyi ge je iwahnaihmiöny mönya:
Eke, u je ogöranyi nya hudrin adre me tot könya:
U je omeli nya ge at ame ûokongun.
50Anyin a wale oge me he ka ole köu Iehova hnyi wanben ta je hnyei,
Me khumöng me ogânâ iâm.
51E ame omelö gan hmâ hnân hobi kâu than a ûnyi gan:
Me omanenâ ibetengiö ka at e ame hû,
Kö Davita me je mâtrâniny nyiele balua.
maintained by the British and Foreign Bible Society