II. Man Ûlabainy Je Than. 2
2
1KE haba Solomona ame ûnykûme he ka op uma hobi kâu iö Iehova, me ke uma hnân dokhon dokhu. 2Ke Solomona ame aû tavat a ödrin sevente thauzan tavat sukhöûnâ, ke eite thauzan tavat si utö hnyi je bucen, ke theri thauzan ke siks haded tavat tuʼ ödrin. 3Ke haba Solomona ame ukhûnöng kö Hirama thaniny Turo, he ka ha, ka habe, U me he ka ânyâ könya, helâ me hnâm hna ânyâ kö cica Davita, me hmâ kân je arasi hnân op umen uma hnân laba hnyin. 4Wâ bi, inya oge me op uma hobi kâu iö Iehova Khonguk, he ka okabâ kâu, me he ka leû utö ae bo so hnyi hnyimakan, me hnân hobi kâu bala thibut areto hnân omanenâ me je hudiny leû hnyi je hnyomakatu me sahac, hnyi je sabath, me je tehi ae teb ûnyi, me je bijeû adre thu anyi Iehova Khonguhmun. Wale hna otilâ ka at Isaraela nyiele balua. 5Ke e gan hmâ uma oge me op, anyin ae beönua Iehova Khonguhmun hon ta je khong. 6Ke ie at ae khana he ka op uma hobi kâu, anyin ae ca ûcû kâu drany me draniny ta je drany? ke iny ia, me inye he ka op uma hobi kâu, ke so bi he ka leû utö ae bo so thibi hnyi hnyimakan? 7Walang ang kunâ thö könya at ae metâ he ka huliwan gol me sileva, me bras, me fao, me udrudrâ hlit, me dra vec, me udrudrâ, me at ae khana he ka khavi hnalimen, he ka tha e me tavat ae metâ eang unyik hnyi Juda me Jerusalema, waleji a penapena ga cica Davita. 8Kunâ minya ju könya je ûö arasi, me kop, me alemuga, ûheny Lebanona; ke wâ bi ame he ka tha he lathnyabaik me lathnyabaem, 9wale he ka penapena hobi könya je utö ae se: anyin ae ti gan hmâ uma oge me he ka op. 10Ke wâ bi, oge me he ka ham ka lathnyabaem a hnyat si utö je tulut hwit adre kokot a twente thauzan, ke twente thauzan je tulut bali, ke twente thauzan je bath waina, ke twente thauzan je bath wakaco. 11Me haba Hirama than Turo ame thu hnyi tusi a kunâ kö Solomona, ka habe, Anyin a Iehova ame betenge ge lakeiny, me ame otilö u he ka tuhödrin. 12Haingö Hirama minya, ka habe, E so adre me ole kö Iehova. Khongu Isaraela, at a op drany me hmele drany, at a ham nokon ae metâ kö Davita than, at wâhmakhmeto, me wâ ûnykûme, me me op uma hobi kö Iehova, me uma hobi kâu dokhon dokhu. 13Ke walang ang oge me kunâ ke at a aten cica Hirama, at ae metâ, me wâhmakhmeto, 14nokon momo Dana, ke at Turo kamen, at ae khana he ka huliwan gol, me sileva, me bras, me fao, me veto, me utö, me udrudrâ hlit, me udrudrâ, me lino ae ûhnyûkong nân, me dra vec; me he ka khavi hnalimen, me ûnykûme wia ta je ûnyi adre me hna kâu: me ame he ka tha e me lakem ae metâ, me hnyat ae metâ lakei Davita than a kamâm. 15Ke walang ang tuhok lö, e so u ma kunâ jem ka lathnyabaem hwit, me hale, me wakaco, me waina, waleji u je ha: 16ke ohmun e he ka si utö hnyi Lebanona hoton wem: kʼ ohmun e he ka mâtâ eû hnyi köiö Jopa ai köu bi; ke u me he ka hom Jerusalema ai. 17Ke Solomona ame aû ta je atkanyua hia hnyi hnyei Isaraela, hwaban hna öû ödrin ga Davita a kamen; kʼ adre ō ödrin a wan haded ke fifte theri thauzan siks haded tavat. 18Ke ame otilâ sevente thauzan gadrin he ka sukhöûnö ûnyi, ke eite thauzan he ka si utö hnyi je bucen, ke theri thauzan ke siks haded he ka muso tavat huliwa.
maintained by the British and Foreign Bible Society