I. Thesalonika 3
3
1ANYIN a wale, öhmun e ûnykûme, me so adre me hnʼ öhmun hnyi Athenai, waleji ke ca khanʼ öhmun hmetu he ka hok hnyok; 2me öhmun e kunö Timoteo liamekeiny mʼ öhmun, a athnyabainy Khong hnyi ûthumetu ae so anyin Keriso, me me he ka ohmâ me okahwʼ öbun hnyi anyibun labageju; 3me me ca he ka bwebwelâ ke at hnen je vec eling; anyin ae khanʼ öbun a gʼ adre kunʼ öhmun hobi kâu e. 4Anyin a tiga öhmun unyibun, öhmun e hohmun ka ha, ka habe, ate me he ka hu vec; ke a hwâdâ but e, ae khanʼ Öbun e. 5Can thibi e, ke ca khanö nya hmetu bi he ka hok hnyok, me oge ûkhûnöng he ka wâ anyibun labageju, wâ e nye cubic öbun hnen at ûcûbic, me ame he ka ûnyi baû but anyihmun huliwa. 6Ke walang ang ame o but kohmun Timoteo ûheny unyibun, me thumetu öhmun ge hofuc ae so ge anyibun labageju me anyibun ibetengiö, me hnobun hna ûnykûmi öhmun bala, me webun gan hmâ he ka ö ʼhmun, ke helâ öhmun köbun; 7anyin a wale, hnyat me lakeiny lö, öhmun e kahwa gabun hnyi anyihmun theduoc me vec hia, hnen anyibun labageju: 8anyin a öhmun e möt ut walang ang, öbun e ne tethmâ unyin Than. 9Ke ieû ole e khanʼ öhmun he ka ham ka Khong gabun, ûnyi hnyi ta je senyin hia thithö öhmun e senyin gabun hnyi hnyimakan Khong; 10öhmun e hic hwege hnyi lit me lany, mʼ öhmun e he ka wâ je hnyimaköbun, he ka obekhötâ ûnyi ae ca bekhöt bi hnyi anyibun labageju?
11E so ame he Khong a Kamöta me Tuhöta Iesu he ka kû dehmun gethen köbun: 12ke so Than ame he ka wiʼ öbun, mʼ öbun e he ka hûhûö me si but ibetengiö ke at ka ke at, me ka tavat hia thithö, ke helâe minya öhmun köbun; 13me me he ka otethmâ je hnyekubun ae ba hnyikongon hnyi hwakecin ae kap hnyi hnyimakan Khong a Kamöta, e ka o hmetu but Tuhöta Iesu, tha e me anyin wakap hia thithö.
maintained by the British and Foreign Bible Society