Kaabka 4
4
1Naawen yaa weeni Moosis ayen, 2<<Weeni Izirali demma waai a dan kan seba alege nye biem Naawen sinsaŋŋa po la,
3<<Kaabteerɔwa ate ba lueri wa la, a dan nye biem a ta kaasuŋ jam nuruma zuk, wa ta lalik kaai ale kan ta jomi la a jam nye biem tiirim kaabka a te Naawen wa wabaataŋa nyiŋ. 4Wa ta lalikka a jam tuka jigini nansuiŋku a te Naawen. Wa pai nisa a vi ka zukku abe wa ge tɔgri Naawen niŋ. 5Kaabteerɔwa ate ba lueri la yaa le pai lalikka ziimu gela a ta jo tuka jigini. 6Wa pai wa nandummu a su ziimu po a misi buyopɔi weleŋsa jigini garuk panni nɔi Naawen niŋ. 7Kaabteerɔwa yaa pai ziimu gela a nyo ŋan baai nyummu ale masa la dakanni nyiilaŋa zuk, ate di bo Tuka Viuku po la. Lalikka ziim buui ale tali la wa pai kpiiri juka kuŋkuŋku tɛŋ ale bo Tuka Viuku nɔi la. 8Wa yaa yeeri lalikka ale ka biem tiirim kpapalaŋa meena, kpapala ŋaai meena ale bo ka ponni po la. 9Wa yeeri yiimaŋa ale ŋa kpapalaŋa ale bo chiaka jigini la ale paŋni kauk ale moata yiimaŋa la. 10Ase kpapalaŋa de ate ba yeeri suiyɔgni tiirim lalikka po la, wa yaa ju ba juka kuŋkuŋku zuk ase juka tiirim la. 11Alege lalikka gbainni ale lammu ale zukku ale naŋsaŋa ale ponni ŋantaŋa ale puutaŋa, 12lalikka kabi tintila meena wa ta cheŋ peelim juijui ale nala la, juijui ate ba kpiiri juka tintuemu a basi la, a pai daata a vi tintuemu zuk a ju.
13<<Izirali demma meena a dan kan seba alege nye biem buui ate Naawen a kisi wa sinsaŋŋa po la, ba dan poom kan seba wanni nɔi po, alege ba kaasi kama. 14Ba be dan seba biemu ate ba nye la, ba ta lalikbili a jam ase biem tiirim la a te Naawen Tuka Viuk niŋ. 15Ba nisɔmma a yaa pai ba nisimaŋa a vi lalikka zukku alege a yaa tɔgri ka Naawen niŋ. 16Kaabteerɔwa ate Naawen a lueri la yaa pai ziimu a ta jo Tuka Viuku po. 17Wa yaa pai wa nandummu a su ziimu po a misi Naawen niŋ buyopɔi garuk panni niŋ. 18Wa pai ziimu gela a nyo dakanni nyiilaŋa zuk ate di bo Tuka Viuku po la, Naawen niŋ. Ziim buui ale tali la wa pai kpiiri nyo juka kuŋkuŋku tɛŋ Tuka Viuku nansuiŋku nɔi. 19Wa yeeri kpapalaŋa meena a ju juka kuŋkuŋku zuk. 20Wa nye lalikka dɛ ase wa le nye lalik kaai ate wa pai a te ase biem tiirim la, Suiku de po kaabteerɔwa ale nye biem duisi basika a te ba ate ba nya vɔŋteka. 21Abe wa yaa ta lalikka a nyini cheŋ peelim a ga ju ase wa le liŋ ju lalik kaai la. Izirali demma biem tiirimu ale nna.
22<<Ase niŋdeerɔ a dan kan potim seba ale nye biem buui ate Naawen wa Wenni kisa sinsaŋŋa po la, ku nyɔnɔwa a sum kaasi kama. 23Wa be dan miŋ wa biemu, wa ta buduk kuui ale kan ta jomi ase tiirim la a jam. 24Wa pai wa nisa a vi buuku zukku a tɔgri ku juijui ate ba a ju tiiritaŋa la Naawen niŋ. Bu ka biem tiirim. 25Kaabteerɔwa a pai nandub a su biem tiirimu ziimu po, abe wa pai a nyo juka kuŋkuŋku nyiilaŋa zuk, abe wa pai zi bunbula a kpiiri nyo kuŋkuŋku tɛŋ. 26Wa ju kpapalaŋa meena juka kuŋkuŋku zuk ase wa le ju suiyɔgni tiirimu diila. Suiku de po kaabteerɔwa ale nye biem duisi basika ate ku nyɔnɔwa nya vɔŋteka.
27<<Izirali nuru waai a dan kan potim seba ale nye biem buui ate Naawen kisi la wa sinsaŋŋa po, ku nyɔnɔwa diem nye ka biem. 28Wa yaa be dan miŋ wa biemu wa ta busari dii ale kan ta jomi ase tiirim la jam te Naawen wa biemu nyiŋ. 29Wa be pai nisa a vi biem tiirim buuku zukku abe wa tɔgri ku tiirimu juka jigini. 30Kaabteerɔwa a pai nandub a su ziimu po a pai nyo juka dakanni nyiilaŋa zuk abe wa pai ziim buui ale tali la a kpiiri nyo juka dakanni tɛŋ. 31Wa yeeri kpapalaŋa meena ase wa le nye suiyɔgni tiirimu diila kaabteerɔwa yaa pai ju juka kuŋkuŋku zuk ase nyum masik la a te Naawen. Suiku de po kaabteerɔwa ale nye biem duisi basika ate ku nyɔnɔwa nya vɔŋteka.
32<<Dan ka posuk ale wa biem tiirimu, wa ta pasari dii ale kan ta jomi la a jam. 33Wa pai nisa a vi ku zukku zuk abe wa yaa tɔgri ase biem tiirim la juijui ate ba ju tiiritaŋa la. 34Kaabteerɔwa yaa pai nandub a su biem tiirimu ziimu po a nyo juka dakanni nyiilaŋa zuk abe wa pai zi bunbula a kpiiri nyo juka kuŋkuŋku tɛŋ. 35Wa yeeri kpapalaŋa meena ase suiyɔgni tiirimu posuku kpapalaŋa la. Ate kaabteerɔwa yaa pai kpapalaŋa a vi lantaŋa zuk a ju a te Naawen. Suiku de po kaabteerɔwa ale nye biem duisi basika ate ku nyɔnɔwa a nya vɔŋteka.
Nke Ahọpụtara Ugbu A:
Kaabka 4: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation