Kaabka 2
2
1<<Nuru waai a dan ta ŋandiinta tiirim a jam wa te Naawen, wa ta zom buui ale nala a jam. Wa kpiiri kpaam a nyoro abe wa pai ŋan baai ate ba dan ju ba, ba nyummu masa la a nyoro. 2A yaa ta cheŋ Aaron nidoabilisaŋa kaabteerɔma jigi. Ate bala wanyi ale nye zom naliŋka ale kpaam ale ŋan baai nyummu ale masa la meena nisa nɔi a ju ase teerika juka la kuŋkuŋku zuk. Ka meena juka tiirim buui nyum ale masa a te Naawen. 3Ŋandiin tii ale a tali la ka Aaron ale wa bisaŋa nyiini ale a dɛ. Bu ka tiirim buui ale ŋmasi ta tuilum tiiritaŋa meena po a te Naawen.
4<<Fi dan ta ŋandiinta tii ale se la tiirim a jam ayen fi te Naawen, zommu a magsi bu nala kama. Nye maasa ŋaai ale kan ta dabinta abe kpaam a dam du yaase boroborok kuui ale kan ta dabinta abe kpaam sa ku. 5Fi dan a labri tiirim ŋandiinta taasi tanlaŋ po zom naliŋ, buui ale kan ta dabinta ate kpaam a gum du. 6Gariŋ abe fi kpiiri kpaam a nyo du. Ka tiirim ŋandiinta. 7Ase fi tiirim ŋandiintaŋa a daa ti dik kutuk binbili po, be nye ale zom naliŋ ale kpaam. 8Ta fi ŋandiinta tiirimu ate fi pai ŋantaŋa de a dik la a jam Naawen niŋ. Pai te kaabteerɔwa ate wa ta cheŋ juka kuŋkuŋku ate ba a ju ŋantaŋa la jigini. 9Kaabteerɔwa yaa le nye zommu a ju jaamu zuk ale bolim a te mu ate ku sak ayen Nyɔnɔwa ale soa. Ku ka tiirim buui nyum ale masa a te Naawen. 10Ŋandiin tii ale a tali la ka Aaron ale wa bisaŋa nyiini ale a dɛ. Bu ka tiirim buui ale ŋmasi ta tuilum tiiritaŋa meena po a te Naawen.
11<<Ŋandiin tii meena ate ni ta cheena ayen ni te Naawen la, ni kan nyo dabinta du, dii nyiŋla ku kan magsi ayen ni nyo dabinta ale siita du a ju ale bolim a te Naawen. 12Ni baga ta ba jam a te Naawen ase kpari ŋandiin tii ate ni liŋ a te wa la, alege ni kan pai ju kuŋkuŋku zuk ase nyum masik ŋanta la. 13Ni pai yesa a nyo ni ŋandiinta tiirimu po, dii nyiŋla yesa a sak kama ayen Naawen ale nye nɔiyeŋ ale ni a beni. Ni kan basi yesaŋa diila ni a nye ka nɔiyeŋ ale Wen. Dila la ni pai yesa a nyo tiirimu po.
14<<Ni le dɛ niŋ a pai kpari ŋan baai a te Naawen, ni sɛ ba yaa gariŋ. 15Ni pai kpaam ale ŋan baai nyum ale masa la a nyo du. Ka ŋandiinta tiirim. 16Kaabteerɔwa yaa nye ŋan baai ale gariŋ la gela ale kpaamu gela ale ŋan baai nyum ale masa la meena a ju ale bolim a te Naawen. Ku a sak kama ayen mi ale soa.
Nke Ahọpụtara Ugbu A:
Kaabka 2: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation