Kaabka 13
13
1Naawen a weeni Moosis ale Aaron ayen, 2<<Nuru waai nyiŋ gbaŋ a dan ta birima yaase koosuk a baga a chim nyiŋ a baŋ tuem buui ale a chɔgsi, ba ta wa jam kaabteerɔwa Aaron yaase wa nidoabilisaŋa waai ale chim kaabteerɔ la jigi. 3Kaabteerɔwa a kpesi a nya noruku ale bo nyiŋka la, ate zuisaŋa ale bo noruku po la dan peenti ate noruku a limisa a gaam nyiŋ gbaŋka, ka tue buui ale a chɔgsi la. Kaabteerɔwa a dan kpesi nya wa be mooli weeni ayen wa daŋ kama. 4Alege nyiŋ gbaŋka kauk kula dan peenti alege an limisa alege ate zuisaŋa an peenti ya, kaabteerɔwa a gaari wa ate wa bo wa tɔga a paari daa ŋayopɔi. 5Daa ŋayopɔiwa danni kaabteerɔwa a ŋman kpesi nya. Wa dan nya ale noruku an tagri ya ku be an che ya, wa ŋman basi ate wa bo wa tɔga a paari daa ŋayopɔi. 6Daa ŋayopɔiwa danni kaabteerɔwa a ŋman kpesi nya wa. Noruku a dan cheŋ ale an che ya, kaabteerɔwa a mooli weeni ayen wa nala kama, ka birima kama ale bo wa nyiŋ ka. Nuruwa yaa sugri wa gattaŋa ate wa nala. 7Alege birimaŋa a dan tagli wa nyiŋka wa le pai wadek a sak kaabteerɔwa ate wa mooli weeni ayen wa nala la ŋaaŋnyiŋ, wa ŋman cheŋ kaabteerɔwa jigi. 8Kaabteerɔwa a kpesi nya wa ate birimaŋa a dan tagli nyiŋka, wa mooli weeni ayen wa daŋ kama. Ka tue buui ale a chɔgsi.
9<<Waai a dan ta nyiŋ gbaŋ tue buui ale a chɔgsi, ba ta wa jam kaabteerɔwa jigi. 10Kaabteerɔwa kpesi nya wa, wa nyiŋ ka dan ji a nye peeluk ate zuisaŋa a tagri peenti ale ta noruk, 11ka tue buui ale bie. Kaabteerɔwa a mooli a weeni ayen wa daŋ kama. Wa kan gaari wa, dii nyiŋla wa poom daŋ kama.
12<<Tuemu a dan tagli nyiŋ gbaŋka meena, ate kaabteerɔwa deri baga a nya ate bu lik waai ale ta la zaani wa zuk a siŋ paari wa naŋsa, 13kaabteerɔwa nya wa ate tuemu dan lik nyiŋka meena wa mooli weeni ayen wa nala. Diila bu meena ale tagri peenti la, wa nala kama. 14Alege diipo noruku nɔnni a dan lagri, wa daŋ kama. 15Kaabteerɔwa a dan nya noruku wa mooli weeni ayen wa daŋ kama. Noruku daŋ kama, wa ta ka tue buui ale a chɔgsi. 16Noruku a dan tagri a peenti, ku a fɛ ayen wa cheŋ kaabteerɔwa jigi. 17Kaabteerɔwa a kpesi nya ate niraŋa a dan tagri peenti, kaabteerɔwa a mooli a weeni waai ale ta tuemu la ayen wa nala ate wa nala.
18<<Nuru waai a dan ta nirik wa nyiŋ ate ka nueri, 19ate juijui ate nirika a nye la a ji ale peenti yaase ku mɔna, wa pai wadek a sak kaabteerɔwa. 20Kaabteerɔwa a kpesi a nya wa, ate ku dan limisa a gaam nyiŋka ate zuisaŋa a tagri peenti, kaabteerɔwa a mooli weeni ayen wa daŋ kama. Ka tue buui ale a chɔgsi ale piilim nirika jigini a che. 21Alege kaabteerɔwa a dan kpesi nya ale zuisaŋa an peenti ya ate noruku an limisa a gaam nyiŋka alege luenti, kaabteerɔwa a gaari wa daa ŋayopɔi. 22Ku be da a che nyiŋka, kaabteerɔwa mooli a weeni ayen, wa daŋ kama. Ka tue buui ale a chɔgsi. 23Alege ku jigini a dan kan tagri ya alege an che ya, ka nirika lauŋ. Kaabteerɔwa a mooli a weeni ayen wa nala.
24<<Ase tuiluk a dan foti waai ate wa nyiŋ gbaŋka a nye mɔnuŋ yaase ku peenti, 25kaabteerɔwa a kpesi nya ku jigini ate dula zuisaŋa a dan peenti ate ku limisa a gaam nyiŋka, ka tue buui ale a chɔgsi la ale boro. Kaabteerɔwa a mooli a weeni ayen wa daŋ kama. Bu ka tue buui ale a chɔgsi. 26Alege kaabteerɔwa a dan kpesi nya wa ate ku jigini zuisaŋa an peenti ya, ate ku an limisa alege luenti kaabteerɔwa gaari wa ate ku paari dan ŋayopɔi. 27Daa ŋayopɔiwa danni kaabteerɔwa ŋman kpesi nya wa ate bu daa tagli nyiŋka, kaabteerɔwa mooli weeni ayen wa daŋ kama. Ka tue buui ale a chɔgsi. 28Alege ku jigini a dan kan tagri ya alege an tagli nyiŋka alege luenti, ka fotika nyiini, kaabteerɔwa mooli weeni ayen wa nala kama. Ka fotika lauŋ nyiini.
29<<Nidoa yaase nipok a dan ta noruk wa zukku po yaase wa teeŋkuruku nyiŋ, 30kaabteerɔwa a kpesi nya noruku, ate ku dan siŋ gaam nyiŋka ate zuisaŋa a nye ŋoolisa, kaabteerɔwa mooli weeni ayen wa daŋ kama. Ka zuk yaase teeŋkuruk tue buui ale a zak ale a chɔgsi. 31Alege kaabteerɔwa a dan kpesi nya noruku ate ku an siŋ gaam nyiŋka ate zui sobsa karo kaabteerɔwa gaari wa, wa tɔga a paari daa ŋayopɔi. 32Daa ŋayopɔiwa danni kaabteerɔwa ŋman kpesi nya noruku ate ku dan kan che ya ate zuisaŋa an nye ŋoolisa ate ku kan nye ase ku siŋ gaam nyiŋka la, 33ba poin wa zukku, ka noruku ale bo juijui la nyiini, abe kaabteerɔwa gaari wa daa ŋayopɔi ŋmana. 34Daa ŋayopɔiwa danni kaabteerɔwa ŋman nya noruku ate ku dan kan che ya alege an siŋ gaam nyiŋka, kaabteerɔwa a mooli ayen wa nala. Ku a fɛ ate wa sugri wa gattaŋa ate wa nala. 35Alege noruku a dan che a tagli nyiŋka kaabteerɔwa ale mooli weeni ayen wa nala la ŋaaŋnyiŋ, 36kaabteerɔwa a kpesi a nya wa ate noruku a dan che kaabteerɔwa a kan yaksi ayen wa nya zui ŋoolisa ku nyɔnɔwa daŋ kama. 37Alege wa buusa boka po ku dan kan tagri ya ate zui sobsa a nyini du, noruku a nueri kama. Wa nala. Kaabteerɔwa a mooli a weeni ayen wa nala kama.
38<<Ase nidoa yaase nipok nyiŋgbaŋ a dan lagsi peela wa nyiŋka, 39kaabteerɔwa kpesi a nya ba ate kab tila a dan kan potim peenti ya, ka tue buui ale bo nyiŋka a ka wari ya. Kula nyɔnɔwa a nala kama.
40<<Nuru zuk a dan kpa ate wa ka zuisa, wa nala kama. 41Be dan ka wa diri ale kpai ate zuisa karo, wa nala kama. 42Wa be dan ta noruk mɔnuŋ wa zuk kpaauŋku po yaase wa dinni, ka tue buui ale a chɔgsi a bo wa zukku po yaase wa dinni nyiŋ. 43Kaabteerɔwa a kpesi nya wa ate noruku ale ji a bo wa zukku po yaase wa dinni nyiŋla a chim noruk mɔnuŋ ale a chɔgsi la, 44nuru wa a ta ka tuem, wa daŋ kama. Kaabteerɔwa a mooli a weeni ayen wa daŋ kama dii nyiŋla noruku ale bo wa zukku po la.
45<<Nuru waai ale ta tue buui ale a chɔgsi la a cheeri wa gattaŋa, wa kan lak wa zuisaŋa a basi abe wa lik wadek a tali wa nimbieŋa a yaa kaari a weeni ayen, <Mi daŋ kama! Mi daŋ kama!> 46Wa le toalim ta tuemu de la, wa daŋ kama. Ku a fɛ ate wa bo wadek wa nyiini. Wa ga bo kauk kuui ate nuruma karo la.
47<<Ase ba dan pai piisa kɔbta yaase garuk miisa a yɔk gatta ate ti kɔli a taŋ, 48garuk tii ate ba yɔk la yaase jabuui ate ba pai gbana a nye la, 49kɔlika ale bo gattaŋa po la yaase gbanaŋa po la, yaase jabuui ate ba yɔk la a dan nye ase gunungoona la, yaase mɔnuŋ la a tagli ŋantaŋa pai a sak kaabteerɔwa. 50Kaabteerɔwa a kpesi a nya kɔlika abe wa gaari ŋan bala ate ku paari daa ŋayopɔi. 51Daa ŋayopɔiwa danni wa kpesi a nya ate kɔlika a dan tagli gattaŋa yaase garuk tii ate ba yɔk la yaase gbana yaase ba nin poom pai a tom diiya ka kɔli ka ale a kaasi ŋanta. Dila nyiŋla ba daŋ kama. 52Ku a fɛ ate wa ju gattaŋa yaase garuk tii ate ba yɔk la, yaase kɔbta gatta, yaase tii ale a nyaksi, yaase gbana dii nyiŋla kɔlika a daŋ ba kama.
53<<Alege kaabteerɔwa a dan kpesi nya ate kɔlika an tagli gattaŋa yaase tii ale yɔk la, yaase gbana, 54wa weeni ate ba sugri ŋan baai ale daŋ la. Abe wa yaa gaari ba ate ku paari daa ŋayopɔi. 55Ŋan baai ale daŋ la sugrika ŋaaŋnyiŋ, kaabteerɔwa a kpesi a ŋman nya, ate kɔlika a dan kan tagri ya, alege ku dan poom kan tagli ba, ba daŋ kama. Ju ba ale bolim ase kɔlika a nin poom bo kauk yeoŋ yaase kauk kunkula. 56Kaabteerɔwa abe dan kpesi nya ale kɔlika a nyini sugrika ŋaaŋnyiŋ wa cheeri garukku yaase gbainni, yaase kauk kuui ale kɔli la a basi. 57Alege kɔlika a dan ŋman jam gattaŋa nyiŋ, yaase tii ate ba yɔk la, yaase gbainni kɔlika a tagli kama wa ju ale bolim. 58Gat tii yaase tii ate ba yɔk yaase gbana ate ba sugri ate ti kɔlika a nyini la ba ŋman sugri ate ti nala.>>
59Sinsaŋŋa ale nna a magsi kɔbta gatta yaase tii ate ba yɔk la yaase gbana a nin kɔli. Abe kaabteerɔwa a mooli a weeni ayen ti nala yaase ti daŋ.
Nke Ahọpụtara Ugbu A:
Kaabka 13: BWU
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2023, Ghana Institute of Linguistics, Literacy and Bible Translation