Zabur 55
55
Cha dozhmenáni tawárá hayrán án
Pa sázger o washáwázáni sálárá. Gón simmi sázán. Dáuday shayri gwashtánk.
1Oo Hodá! Mani dwáyá beshkon o
watá cha mani zári o peryátán chér maday.
2Mani némagá delgósh kan o passaw day,
wati nálag o zangán paréshán án.
3Cha dozhmenáni tawár o
cha badkáráni kukkárán bétágat o hayrán án.
Chiá ke náhakká maná ranjénant o
gón hezhmé mani dozhmeniá kanant.
4Del mán sénagá azáb ent o
markay torson sará kaptag o
5bimm o dehshatá maná chér tarréntag.
6Gwashán: “Dréchá kapóti bálon per butén,
tánke bálon bekortén o árám begepténán,
7Haw! Dém pa durén jágahána shotán o
dasht o gyábánon wati hankéna kort. Ósht...
8Pa eshtápia shotán o jáhé chéra bután,
cha lurh o tuppánán dur.”
9 Hodáwandá! Áyáni zobáná anchosh betarrén
ke yakdomiá sarpad mabant,
chiá ke shahrá jang o chópa gendán.
10Róch o shap shahray chágerdá diwáláni sará tarragá ant o
shahr cha náensápi o petnahá porr ent,
11cha harábi o bérániá sarréch ent o
setam o repk, cha áiay bázárá dura nabit.
12É dozhmené naent ke maná shegána jant,
agan na, mana sagget,
badwáh naent ke gón pahré mani démá óshtátag,
agan na, cha áiá chéra bután.
13Ji, taw ay mani matth,
mani bráhondag o nazzikén dóst,
14ke márá wasshén hamráhié hastat
hamá wahdá ke gón mazanén mocchié Hodáay lógá gámena jat.
15Mark áyáni chakká bekapát o
zendahgórr bátant,
chiá ke badi áyáni lóg o deláni tahá ent.
16Bale man Hodáyá gwánka janán o
Hodáwand maná rakkénit.
17Bégáh o sabáh o némróchá
zanga janán o peryáta kanán o
á mani tawárá eshkont.
18Mani jesm o jáná cha hamá jangá ke démá dar átkag
pa dráhi o salámatia rakkénit,
bell toré bázéné mani démá óshtátag.
19Hodá ke cha azal wati bádsháhi tahtay sará neshtag,
eshkont o sharmendagesha kant. Ósht...
Chiá ke badala nabant o
Hodátorsiesh nést.
20Mani bráhondagá wati dast dóstáni helápá shahárt o
wati kawli prósht.
21Zobáni chó thélá charp at
bale deli jangig,
dapay habari cha rógená narmter,
bale kasshetagén zahm atant.
22Wati paréshánián pa Hodáyá bell,
ke á tai dárók ent,
á hechbar pahrézkárán kapagá naylit.
23Bale taw, oo Hodá,
badkárán johlterén kallá dawra dayay,
hónwár o prébkárén mardom
wati rócháni némá ham zendaga namánant,
bale man tai sará tawkala kanán.
Nke Ahọpụtara Ugbu A:
Zabur 55: HPKB
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2015-2022, Wycliffe Bible Translators, Inc. and the Balochi Bible Translation Team. All rights reserved.