Mattá 22
22
Bádsháhay chokkay árós
(Luká 14:15–24)
1Issáyá padá gón mardomán pa darwar o mesál habar kort o gwashti: 2“Ásmáni bádsháhi, hamá bádsháhay paymá ent ke pa wati chokkay árósá mehmánié korti. 3Áiá wati golám lóthetagén mehmánáni randá ráh dátant, bale mehmánáni delá naat ke byáyant. 4Gorhá áiá dega lahtén golám ráh dát o hokmi dát ke gón hamá lóthetagén mardomán begwashét: ‘Man warag tayár kortagant, káiger#22:4 Káiger, bezán mazanén narén gók. o pábondi#22:4 Pábondi, bezán hamá pas o gók ke pa helár kanagá lógay dapá dáranti. gwask#22:4 Gwask, bezán góló, gókay chokk. koshtag o har chizz tayár ent. Árósay mehmániá byáét.’ 5Bale mehmánán hecch parwáh nadásht o shotant, yakké wati dhagáray némagá o yakké dém pa wati sawdágeriá. 6Á degarán áiay golám gept o béezzat kort o koshtant. 7Bádsháh sakk zahr gept o wati sepáhigi ráh dátant. Áyán hónig koshtant o áyáni shahr sótk.
8Nun bádsháhá gón wati golámán gwasht: ‘Árósay mehmáni tayár ent, bale hamá ke lóthag butagatant, áyagay láhek naatant. 9Paméshká berawét, ráh o rahsarán harkasá ke gendét, áyán mehmániá byárét.’ 10Bádsháhay golám shotant o sharr o gandag, harkasesh ke dist, sajjahénesh yakjáh kort o áwortant o árósay diwánjáh cha mehmáná porr but.
11Wahdé bádsháh mehmánáni cháragá átk, yakk anchén mardé disti ke diwáni pósháki gwará naat. 12Bádsháhá cha áiá jost kort: ‘Sangat! Bé diwáni pósháká, taw chón tóká potertagay?’ Áiá hecch passaw dát nakort. 13Gorhá bádsháhá gón wati hezmatkárán gwasht: ‘Eshiay dast o pádán bebandét o dhanná taháriá dawri bedayét.’ Ódá gréwag o peryát o zária bit. 14Chéá ke lóthetagén báz ant, bale gechén kortagén kamm ant.”
Máliátay bárawá
(Markás 12:13–17; Luká 20:20–26)
15Hamé wahdá Parisi shotant o shawresh kort ke Issáyá cha áiay jenday habarán mána gisshénén o dámá dawra dayén. 16Wati lahtén shágerdesh Hirudiáni#22:16 Hirudi, bezán Hirudis bádsháhay dózwáh. hamráhiá áiay kerrá rawán dát ke begwashant: “Oo ostád! Má zánén ke taw tachk o rástén mardomé ay o Hodáay ráhay sójá pa rástia dayay o hechkasay némagá nageray, chéá ke sajjahénán yakk hesábá cháray. 17Márá begwash, tai hayálá Rumay bádsháh Kaysará#22:17 Kaysar Rumay bádsháháni lakab butag, hecch bádsháhay jenday nám nabutag. Rumay har bádsháh Kaysar gwashag butag. song o máliát dayag rawá ent yá na?” 18Issáyá áyáni badén niyat zánt o gwashti: “Oo doru o dopóstén mardomán! Maná chéá chakkásagá ét? 19Cha hamá zarrán yakké maná pésh bedárét ke pa máliátá dayantesh.” Áyán yakk dináré áwort. 20Issáyá jost kort: “É nám o naksh kaig ant?” 21Gwashtesh: “Kaysaray.” Nun Issáyá darráént: “Gorhá Kaysaraygá Kaysará bedayét o Hodáaygá Hodáyá.” 22É habaráni eshkonagá á hayrán butant o Issáesh esht o shotant.
Áherat o sáng o sur
(Markás 12:18–27; Luká 20:27–40)
23Hamá róchá, lahtén Saduki Issáay kerrá átk. Sadukia namannant ke mordag padá zendaga bant. Jostesh kort: 24“Oo ostád! Mussáyá gwashtag: ‘Agan kasé bé awládá bemerit, gorhá báyad ent áiay brát gón áiay janózámá sur bekant tánke pa wati brátá chokk o awládé pédá bekant.’#22:24 Mussáay Wáz 25:5 o rand. 25May kerrá hapt brát hastat. Awali brátá sur kort, bé awládá mort o wati jani pa á dega brátá esht. 26Padá gón domi o sayomi tán haptomiá anchosh but. 27Sajjahénán o rand á janén ham mort. 28Nun áheratay róchá é janén cha haptén brátán kojám yakkayga bit? Chéá ke sajjahén brátáni jan butag.”
29Issáyá passaw dát: “Shomá rad wártag, chéá ke na cha Pákén Ketábán chizzé sarkecha warét#22:29 Sarkech warag, bezán sarpad bayag, póh bayag. o na Hodáay wák o zórá sarpada bét. 30Áheratay róchá mardom na sura kanant o na sur dayaga bant, ásmáni préshtagáni dhawlá bant. 31Záná, shomá mordagáni zendag bayagay bárawá hamá habar nawántag ke Hodáyá shomárá gwashtag: 32‘Man án, Ebráhémay Hodá o Esákay Hodá o Ákubay Hodá’?#22:32 Darraw 3:6. Bezán á, mordagáni Hodá naent, zendagénáni Hodá ent.” 33Mardom cha Issáay tálimáni eshkonagá hayrán o habakkah butant.
Masterén parmán
(Markás 12:28–34; Luká 10:25–28)
34Wahdé Parisi sahig butant ke Issáyá chón Sadukiáni dap bastag, gorhá yakjáh but o átkant. 35Cha áyán yakké, Sharyatay kázié at. Áiá pa Issáay chakkásagá jost kort: 36“Oo ostád! Sharyatay masterén parmán kojám ent?” 37Issáyá passaw dát:
“Wati Hodáwandén Hodáyá cha delay johlánkiá o gón sajjahén ján o sáh o gón sajjahén pahm o pegrá dóst bedár.#22:37 Mussáay Wáz 6:4 o rand. 38Masterén o awali parmán hamesh ent. 39Domi parmán ham, hameshiay dhawlá ent: Wati hamsáhegá wati jenday paymá dóst bedár.#22:39 Láwián 19:18. 40Hamé doén parmán, Mussáay sajjahén Sharyat o nabiáni parmánáni bonyád ant.”
Masih kai chokk ent?
(Markás 12:35–37; Luká 20:41–44)
41Hamé wahdá ke Parisi yakjáh but o átkant, Issáyá cha áyán jost kort: 42“Masihay bárawá shomá ché gwashét? Á kai chokk ent?” Áyán passaw dát: “Dáud bádsháhay chokk ent.” 43Gwashti: “Gorhá chéá Dáud cha Pákén Ruhay elhámá Masihá wati Hodáwanda zánt, wahdé gwashit:
44 Hodáwandá gón mani Hodáwandá gwasht:
‘Mani rástén kashá tán hamá wahdá benend
ke man tai dozhmenán tai pádáni chérá dawra dayán.’ # 22:44 Asligén Yunáni nebeshtánka gwashit: “tai pádáni chéray tahtoké bekanán”. # 22:44 Zabur 110:1.
45Nun agan Dáud Masihá wati Hodáwanda gwashit, gorhá Masih chón áiay chokk buta kant?” 46Hechkasá áiay habaráni passaw dát nakort o cha á róchá o rand kassá del nakort ke cha áiá dega josté bekant.
Nke Ahọpụtara Ugbu A:
Mattá 22: HPKB
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2015-2022, Wycliffe Bible Translators, Inc. and the Balochi Bible Translation Team. All rights reserved.