लेवी 18
18
लसपसपाखें अशुद्ध जुइगु
1परमप्रभुं मोशायात धयादिल, 2“इस्राएलीतय्त धा, ‘जि परमप्रभु छिमि परमेश्वर खः। 3छिपिं न्हापा च्वंच्वनागु मिश्र देशयापिं मनूतय्सं याइगु थें ज्या याये मते अले आः यंकेत्यनागु देश कनानयापिं मनूतय्सं याइगु थें ज्या नं याये मते इमिगु विधि नं मानय् याये मते। 4जि परमप्रभु छिमि परमेश्वर खः। छिमिसं जिगु नियम व विधित पालन यानाः वकथं न्ह्यज्याहुँ। 5छिमिसं जिगु थ्व विधि व नियम मानय् यायेमाः छाय्धाःसा व मानय् याःपिं मनूत उकिं हे म्वानाच्वनी। जि परमप्रभु खः।#नहे ९:२९; इज १८:९; २०:११-१३; लूक १०:२८; रोम १०:५; गला ३:१२
6“‘छिपिं सुनानं थः स्याःपिं थःथितित नापं लसपस याये मते जि परमप्रभु खः।
7“‘छं छिमि मां नाप लसपस यानाः थः बौयात लज्या चाय्के मज्यू। छाय्धाःसा व छिमि थः हे मां खः।
8“‘छं थः बौया कलाः चिरिमांनाप लसपस याये मते। अथे यानाः छं थः बौयात लज्या चाय्के मज्यू।#लेवी २०:११; व्य २२:३०; २७:२०
9“‘छं थः हे मांबौपाखें बूम्ह तताकेहेँ अले थः मां वा बौया न्ह्यसु म्ह्याय्नापं लसपस याये मज्यू। व थःगु हे छेँ बूम्ह जुइमा वा पिने बुयाः तःधीम्ह जूसां अथे याये मते।#लेवी २०:१७; व्य २७:२२
10“‘छं थः काय्पाखें वा म्ह्याय्पाखें बूम्ह मिसामचानाप लसपस याये मते थथे यानाः छं थःत लज्या चाय्की।
11“‘छं थः चिरिमांपाखें बूम्ह म्ह्याय् नाप लसपस याये मते व छिमि केहेँ खः।
12“‘छं थः निनि नाप लसपस याये मते व छिमि बौया स्याःपिं खः।#लेवी २०:१९-२०
13“‘छं थः मांया तःकेहेँपिं नाप लसपस याये मते इपिं छिमि मांया स्याःलाःपिं खः।
14“‘छं थः तःधिमां व मामा नापं लसपस याये मते। थः बौया दाजुकिजायात लज्या चाय्के मज्यू। व छिमि हे तःमां व मामा खः।
15“‘छं थः भौनाप लसपस याये मते व छिमि काय्या कलाः खः।#लेवी २०:१२
16“‘छं थः तताःजु वा किजा भौनाप लसपस यानाः थः दाजुकिजायात लज्या चाय्के मते।#लेवी २०:२१
17“‘सुयां कलाः व वया म्ह्याय् निम्ह नापं छं लसपस याये मते अले वया काय् वा म्ह्याय् पाखेंया छय् म्ह्याय्मचा नापं नं लसपस याये मते इपिं थःथवय् हिया स्वापु दुपिं खः। अथे यायेगु लज्या चायापुगु ज्या खः।#लेवी २०:१४; व्य २७:२३
18“‘छं थः कलाः मसीतले वया तताः वा केहेँयात लिथु हयाः लसपस याये मते।
19“‘सुं मिसाया थीमत्यः जुयाः अशुद्ध जुइबलय् छं व नाप लसपस याये मते।#लेवी २०:१८
20“‘छं मेपिनि कलाःनापं लसपस याये मते छं अथे यानाः थःत अशुद्ध याये मज्यू।#लेवी २०:१०
21“‘थः काय्म्ह्याय् मोलेक द्यःया निंतिं मिइ छानाः थः परमेश्वरया नां अशुद्ध याये मते। जि हे परमप्रभु खः।#लेवी २०:१-५
22“‘छं मिस्तनापं थें मिजंतनाप लसपस याये मते। व घचाइपुगु ज्या खः।#लेवी २०:१३
23“‘छुं नं जातिया पशुप्राणी नाप लसपस यानाः छं थःत अशुद्ध याये मते, मिसा नं पशुप्राणी नापं द्येने मज्यू। थ्व घचाइपुसे च्वंगु ज्या खः।#प्रस २२:१९; लेवी २०:१५-१६; व्य २७:२१
24“‘थुकथंया ज्यापाखें छिमिसं थःत अशुद्ध याये मज्यू, छाय्धाःसा थ्व फुक्कं ज्याया हुनिं जिं पितिना छ्वयेत्यनापिं फुक्क जातित अशुद्ध जुइ धुंकूगु दु। 25इमिगु देश नं अशुद्ध जुइ धुंकूगु दु। अथे जुयाः जिं इमिगु पापया सजाँय इमित हे बिया, अले व देशं थः मनूतय्त ल्ह्वयाः पितिनाछ्वल। 26अथे जूगुलिं छिमिसं जिगु नियम व विधियात मानय् यायेमाः अले इस्राएलीत जूसां वा इपिं नापं च्वनाच्वंपिं परदेशीत जूसां सुनानं थज्याःगु घचाइपुगु ज्या याये मते। 27छाय्धाःसा व देशया न्हापायापिं मनूतय्सं थज्याःगु हे फुक्क घचाइपुगु ज्या यानाः देश अशुद्ध जूगु खः। 28छिमिसं नं अथे हे अशुद्ध यात धाःसा छिमित नं व देशं न्हापायापिं जातियात ल्ह्वयाः पितिनाछ्वःगु थें छिमित नं ल्ह्वयाः पितिनाछ्वइ।
29“‘थज्याःगु घचाइपुगु ज्या सुनानं यात धाःसा वयात थः मनूतपाखें पितिना छ्वयेमाः। 30थुकथं छिमिसं जिगु उजंयात मानय् यानाः च्वँ। न्हापायापिन्सं याइगु घचाइपुगु ज्या यानाः थःत अशुद्ध याये मज्यू। जि छिमि परमप्रभु परमेश्वर खः।’”
Nke Ahọpụtara Ugbu A:
लेवी 18: NEW
Mee ka ọ bụrụ isi
Mapịa
Lee anya n'etiti ihe abụọ
Kesaa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 Nepal Bible Society, Newa Christian
Literature Center and Wycliffe Bible Translators, Inc.