ܡܬܝ 28
28
ܩܝܵܡܬܵܐ ܕܝܼܫܘܿܥܡ̣ܢ ܓܵܘ ܡܝܼܬܹ̈ܐ
ܡܪܩܘܣ 16:1‐8؛ ܠܘܩܐ 24:1‐12؛ ܝܘܚܢܢ 20:1‐10
1ܒܦܪܵܩܬܵܐ ܕܫܲܒܬܵܐ ܘܒܙܪܵܩܵܐ ܕܚܲܕܒܫܲܒܵܐ، ܐ݇ܬܹܐ ܠܗܘܿܢ ܡܲܪܝܲܡ ܡܲܓ݂ܕܠܵܝܬܵܐ ܘܡܲܪܝܲܡ ܐ݇ܚܹܪ݇ܬܵܐ ܕܚܵܙܝܼ ܠܩܲܒ݂ܪܵܐ. 2ܘܗܵܐ ܪܵܘܕܵܢܵܐ ܓܘܼܪܵܐ ܗܘܹܐ ܠܹܗ، ܣܵܒܵܒ ܡܲܠܲܐܟ݂ܵܐ ܕܡܵܪܝܵܐ ܨܠܹܐ ܠܹܗ ܡ̣ܢ ܫܡܲܝܵܐ، ܘܡܘܼܚܕܸܪܹܗ ܠܟܹܐܦܵܐ ܡ̣ܢ ܬܲܪܥܵܐ، ܘܝ݇ܬܝܼܒ݂ ܠܹܗ ܥܲܠܘܼܗܝ. 3ܦܵܬܹܗ ܐܲܝܟ݂ ܒܸܪܩܵܐ ܝܗ݇ܘܵܐ، ܘܠܒ݂ܝܼܫܬܹܗ ܚܘܵܪܬܵܐ ܐܲܝܟ݂ ܬܲܠܓܵܐ. 4ܪܓܝܼܕ ܠܗܘܿܢ ܢܵܛܘܿܪܹ̈ܐ ܡ̣ܢ ܙܕܘܼܥܬܲܝܗܝ ܡܸܢܹܗ، ܘܗܘܹܐ ܠܗܘܿܢ ܐܲܝܟ݂ ܡܝܼܬܹ̈ܐ. 5ܐܝܼܢܵܐ ܗܘܼܡܙܸܡ ܠܹܗ ܡܲܠܲܐܟ݂ܵܐ ܘܐ݇ܡܝܼܪܹܗ ܠܒܲܟ݂ܬܵܬܹ̈ܐ، ”ܐܲܚܬܘܿܢ ܠܵܐ ܙܵܕܥܝܼܬܘܿܢ، ܣܵܒܵܒ ܒܝܼܕܵܥܵܐ ܝܘܸܢ ܕܒܸܛܥܵܝܵܐ ܝܬܘܿܢ ܠܝܼܫܘܿܥ ܕܦܝܼܫ ܠܹܗ ܡܸܚܝܵܐ ܠܙܩܝܼܦܵܐ. 6”ܠܹܐ ܝܠܹܗ ܠܐܲܟ݂ܵܐ، ܩܝܼܡ ܠܹܗ ܕܵܐܟ݂ܝܼ ܕܐ݇ܡܝܼܪܵܐ ܝܗ݇ܘܵܐ. ܬܹܝܡܘܼܢ ܘܚܙܹܝܡܘܼܢ ܠܕܘܼܟܵܐ ܕܓܵܘܘܼܗ̇ ܡܘܼܬܒ݂ܵܐ ܝܗ݇ܘܵܐ ܡܵܪܲܢ. 7”ܙܹܠ݇ܡܘܼܢ ܒܓ̰ܲܠܕܘܼܬܵܐ ܘܐ݇ܡܘܿܪܘܼܢ ܠܬܲܠܡܝܼܕܘܼ̈ܗܝ ܕܩܝܼܡ ܠܹܗ ܡ̣ܢ ܓܵܘ ܡܝܼܬܹ̈ܐ، ܘܒܸܬ ܐܵܙܹܠ ܡ̣ܢ ܩܵܕ݇ܡ ܕܝܼܵܘܟ݂ܘܿܢ ܠܓܠܝܼܠܵܐ، ܬܵܡܵܐ ܒܸܬ ܚܵܙܹܝܬܘܿܢ ܠܹܗ. ܗܵܐ ܐ݇ܡܝܼܪܝܼ ܐܸܠܵܘܟ݂ܘܿܢ.“
8ܘܕܝܼܪܗܘܿܢ ܐܵܢܝܼ ܒܲܟ݂ܬܵܬܹ̈ܐ ܒܡܲܠܝܲܙܬܵܐ ܡ̣ܢ ܩܲܒ݂ܪܵܐ، ܒܙܕܘܼܥܬܵܐ ܘܒܚܲܕܘܼܬܵܐ ܓܘܼܪܬܵܐ، ܘܪܚܝܼܛ ܠܗܘܿܢ ܘܡܘܼܕܸܥ ܠܗܘܿܢ ܠܬܲܠܡܝܼ̈ܕܹܐ. 9ܘܗܵܐ ܝܼܫܘܿܥ ܬܦܝܼܩ ܠܹܗ ܒܝܼܲܝܗܝ ܘܐ݇ܡܝܼܪܹܗ ܐܸܠܲܝܗܝ، ”ܫܠܵܡܵܐ ܐܸܠܵܘܟ݂ܘܿܢ.“ ܘܐܵܢܝܼ ܐ݇ܬܹܐ ܠܗܘܿܢ ܘܕܒ݂ܝܼܩ ܠܗܘܿܢ ܐܲܩܠܵܬܹ̈ܗ ܘܣܓ݂ܝܼܕ ܠܗܘܿܢ ܐܸܠܹܗ. 10ܗ̇ܝܓܵܗ ܐ݇ܡܝܼܪܹܗ ܐܸܠܲܝܗܝ ܝܼܫܘܿܥ، ”ܠܵܐ ܙܵܕܥܝܼܬܘܿܢ، ܙܹܠ݇ܡܘܼܢ ܘܐ݇ܡܘܿܪܘܼܢ ܠܐܲܚܘܿܢܘܵܬܝܼ̈ ܕܐܵܙܠ݇ܝܼ ܠܓܠܝܼܠܵܐ ܘܬܵܡܵܐ ܒܸܬ ܚܵܙܝܼ ܠܝܼ.“
11ܘܟܲܕ ܐܵܢܝܼ ܒܹܐܙܵܠܵܐ ܝܗ݇ܘܵܘ، ܐ݇ܬܹܐ ܠܗܘܿܢ ܐ݇ܢܵܫܹ̈ܐ ܡ̣ܢ ܐܵܢܝܼ ܢܵܛܘܿܪܹ̈ܐ ܠܡܕܝܼܢ݇ܬܵܐ ܘܡܘܼܚܒܸܪܗܘܿܢ ܠܓܘܼܪ̈ܵܢܹܐ ܕܟܵܗܢܹ̈ܐ ܟܠ ܡܸܢܕܝܼ ܕܗܘܹܐ ܠܹܗ، 12ܓ̰ܡܝܼܥ ܠܗܘܿܢ ܓܘܼܪ̈ܵܢܹܐ ܕܟܵܗܢܹ̈ܐ ܥܲܡ ܚܘܵܪ̈ܕܸܩܢܹܐ، ܘܣܘܼܙܓܸܪܗܘܿܢ، ܘܝܘܼܗ݇ܒܸܠ ܠܗܘܿܢ ܙܘܼܙܹ̈ܐ ܪܵܒܵܐ ܠܢܵܛܘܿܪܹ̈ܐ، 13ܘܐ݇ܡܝܼܪܗܘܿܢ ܐܸܠܲܝܗܝ، ”ܐ݇ܡܘܿܪܘܼܢ، ’ܬܲܠܡܝܼܕܘܼ̈ܗܝ ܐ݇ܬܹܐ ܠܗܘܿܢ ܒܠܲܝܠܹܐ ܘܓܢܝܼܒ݂ ܠܗܘܿܢ ܐܸܠܹܗ ܟܲܕ ܐܲܚܢܲܢ ܕܡܝܼܟܹܐ.‘ 14”ܘܐܸܢ ܦܵܝܫܵܐ ܫܡܝܼܥܬܵܐ ܐܵܗܵܐ ܩܵܕ݇ܡ ܫܲܠܝܼܛܵܐ، ܐܲܚܢܲܢ ܒܸܬ ܡܲܫܠܲܚ ܠܹܗ، ܘܥܲܠܵܘܟ݂ܘܿܢ ܠܹܐ ܐܵܬܹܐ ܡܸܢܕܝܼ ܣܸܪܝܵܐ.“ 15ܐܵܢܝܼ ܫܩܝܼܠ ܠܗܘܿܢ ܙܘܼܙܹ̈ܐ ܘܥܒ݂ܝܼܕ ܠܗܘܿܢ ܕܵܐܟ݂ܝܼ ܕܦܝܼܫ ܠܗܘܿܢ ܡܘܼܠܦܹܐ. ܘܦܠܝܼܛ ܠܵܗ̇ ܐܵܗܵܐ ܗܹܡܸܙܡܵܢ ܓܵܘ ܝܗܘܼܕܵܝܹ̈ܐ ܗܲܠ ܐܵܗܵܐ ܝܵܘܡܵܐ.
ܝܼܫܘܿܥ ܓܵܘ ܓܠܝܼܠܵܐ
ܡܪܩܘܣ 16:14‐18؛ ܠܘܩܐ 24:36‐49؛ ܝܘܚܢܢ 20:19‐23؛ ܣܘܥܪ̈ܢܐ 1:6‐8
16ܗ̇ܝܓܵܗ ܐ݇ܙܝܼܠ ܠܗܘܿܢ ܚܲܕܸܥܣܲܪ ܬܲܠܡܝܼ̈ܕܹܐ ܠܓܠܝܼܠܵܐ، ܠܛܘܼܪܵܐ ܐܲܝܟܵܐ ܕܐ݇ܡܝܼܪܵܐ ܝܗ݇ܘܵܐ ܝܼܫܘܿܥ ܕܐܵܙܠ݇ܝܼ. 17ܘܐܝܼܡܲܢ ܕܩܲܡ ܚܵܙܝܼ ܠܹܗ، ܣܓ݂ܝܼܕ ܠܗܘܿܢ ܐܸܠܹܗ. ܐܝܼܢܵܐ ܚܲܕ݇ܟܡܵܐ ܡܸܢܲܝܗܝ ܢܦܝܼܠ ܠܗܘܿܢ ܓܵܘ ܫܸܟܘܼܬܵܐ. 18ܐ݇ܬܹܐ ܠܹܗ ܝܼܫܘܿܥ ܘܗܘܼܡܙܸܡ ܠܹܗ ܥܲܡܲܝܗܝ ܘܐ݇ܡܝܼܪܹܗ ܐܸܠܲܝܗܝ، ”ܦܝܼܫ ܠܹܗ ܝܘܼܗ݇ܒ݂ܵܐ ܐܸܠܝܼ ܟܠ ܫܘܼܠܛܵܢܵܐ ܒܫܡܲܝܵܐ ܘܒܐܲܪܥܵܐ. 19”ܒܘܼܬ ܐܵܗܵܐ، ܙܹܠ݇ܡܘܼܢ ܘܬܲܠܡܸܕܘܼܢ ܠܟܠܲܝܗܝ ܐܸܡܘܵܬܹ̈ܐ، ܘܡܲܥܡܸܕܘܼܢ ܠܗܘܿܢ ܒܫܸܡܵܐ ܕܒܵܒܵܐ ܘܒܪܘܿܢܵܐ ܘܪܘܼܚܵܐ ܕܩܘܼܕܫܵܐ. 20”ܘܡܲܠܦܘܼܢ ܠܗܘܿܢ ܕܢܵܛܪܝܼ ܟܠ ܡܸܢܕܝܼ ܕܦܩܝܼܕ ܠܝܼ ܐܸܠܵܘܟ݂ܘܿܢ، ܘܗܵܐ، ܐܵܢܵܐ ܥܲܡܵܘܟ݂ܘܿܢ ܝܼܘܸܢ ܟܠܲܝܗܝ ܝܵܘܡܵܢܹ̈ܐ، ܗܲܠ ܫܘܼܠܵܡܵܐ ܕܙܲܒ݂ܢܵܐ.“ ܐܵܡܹܝܢ.
Nke Ahọpụtara Ugbu A:
ܡܬܝ 28: ABTAB
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Aramaic Bible Translation Assyrian Bible © 2025 Aramaic Bible Translation