ܡܬܝ 18
18
ܟܵܪܘܿܙܘܼܬܵܐ ܒܘܼܬ ܡܲܟܲܦܬܵܐ ܕܓܵܢܵܐ
ܡܪܩܘܣ 9:33‐37؛ ܠܘܩܐ 9:46‐48
1ܒܗ̇ܝ ܥܕܵܢܵܐ ܐ݇ܬܹܐ ܠܗܘܿܢ ܬܲܠܡܝܼ̈ܕܹܐ ܠܟܸܣ ܝܼܫܘܿܥ ܘܒܘܼܩܸܪܗܘܿܢ ܡܸܢܹܗ، ”ܡܵܢܝܼ ܝܠܹܗ ܒܘܼܫ ܓܘܼܪܵܐ ܓܵܘ ܡܲܠܟܘܼܬܵܐ ܕܫܡܲܝܵܐ؟“ 2ܩܪܹܐ ܠܹܗ ܝܼܫܘܿܥ ܠܚܲܕ ܝܵܠܵܕ݇ܐ ܙܥܘܿܪܵܐ ܘܡܘܼܟܠܹܐ ܠܹܗ ܒܓܵܘܲܝܗܝ، 3ܘܐ݇ܡܝܼܪܹܗ، ”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܸܢ ܠܵܐ ܕܵܝܪܝܼܬܘܿܢ ܘܗܵܘܹܝܬܘܿܢ ܐܲܝܟ݂ ܝܵܠܹ̈ܕ݇ܐ ܙܥܘܿܪܹ̈ܐ، ܠܹܐ ܥܵܒ݂ܪܝܼܬܘܿܢ ܠܡܲܠܟܘܼܬܵܐ ܕܫܡܲܝܵܐ. 4”ܗܲܕܟ݂ܵܐ ܟܠ ܡ̇ܢ ܕܡܲܟܸܦ ܓܵܢܹܗ ܐܲܝܟ݂ ܕܐܵܗܵܐ ܝܵܠܵܕ݇ܐ ܙܥܘܿܪܵܐ، ܗ̇ܘ ܝܼܠܹܗ ܓܘܼܪܵܐ ܓܵܘ ܡܲܠܟܘܼܬܵܐ ܕܫܡܲܝܵܐ. 5”ܘܡ̇ܢ ܕܩܲܒܸܠ ܒܫܸܡܝܼ ܚܲܕ ܝܵܠܵܕ݇ܐ ܙܥܘܿܪܵܐ ܐܲܝܟ݂ ܕܐܵܗܵܐ، ܐܸܠܝܼ ܩܲܒܘܼܠܹܐ ܝܠܹܗ.
ܥܸܠܬܵܐ ܕܬܘܼܪ̈ܩܵܠܹܐ
ܡܪܩܘܣ 9:42‐48؛ ܠܘܩܐ 17:1‐2
6”ܘܡ̇ܢ ܕܗܵܘܹܐ ܬܘܼܪܩܵܠܵܐ ܠܚܲܕ ܡ̣ܢ ܐܲܢܹܐ ܕܟܹܐ ܗܲܡܸܢܝܼ ܒܝܼܝܼ، ܨܦܵܝܝܼ ܝܗ݇ܘܵܐ ܐܸܠܹܗ ܕܗܵܘܹܐ ܗ݇ܘܵܐ ܬܸܠܝܵܐ ܟܹܐܦܵܐ ܕܐܸܪܚܹܐ ܒܩܕܵܠܹܗ ܘܗܵܘܹܐ ܗ݇ܘܵܐ ܪܘܼܦܝܵܐ ܒܥܘܼܡܩܵܐ ܕܝܵܡܵܐ. 7”ܘܵܝ ܠܥܵܠܡܵܐ ܡ̣ܢ ܬܘܼܪ̈ܩܵܠܹܐ. ܐܵܢܲܢܩܵܝܬܵܐ ܝܠܵܗ̇ ܕܐܵܬܝܼ ܬܘܼܪ̈ܩܵܠܹܐ، ܐܝܼܢܵܐ ܘܵܝ ܠܗ̇ܘ ܐ݇ܢܵܫܵܐ ܕܗܵܘܹܐ ܥܸܠܬܵܐ ܕܬܘܼܪ̈ܩܵܠܹܐ. 8”ܒܘܼܬ ܐܵܗܵܐ، ܐܸܢ ܐܝܼܕܘܼܟ݂ ܝܲܢ ܐܲܩܠܘܼܟ݂ ܡܲܚܛܝܼܵܐ ܠܘܼܟ݂، ܦܪܘܿܡ ܠܵܗ̇ ܘܪܲܦܝܼ ܠܵܗ̇ ܡܸܢܘܼܟ݂، ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܐܸܠܘܼܟ݂ ܕܥܵܒ݂ܪܹܬ ܠܚܲܝܹ̈ܐ ܫܸܠܵܐ ܝܲܢ ܫܦܝܼܠܵܐ ܡ̣ܢ ܕܗܵܘܹܐ ܠܘܼܟ݂ ܬܲܪܬܹܝ ܐܝܼܕܵܬܹ̈ܐ ܝܲܢ ܬܲܪܬܹܝ ܐܲܩܠܵܬܹ̈ܐ ܘܦܵܝܫܹܬ ܕܸܪܝܵܐ ܒܢܘܼܪܵܐ ܕܠܥܵܠܲܡ. 9”ܘܐܸܢ ܥܲܝܢܘܼܟ݂ ܡܲܚܛܝܼܵܐ ܠܘܼܟ݂، ܚܪܘܿܛ ܠܵܗ̇ ܘܪܲܦܝܼ ܠܵܗ̇ ܡܸܢܘܼܟ݂، ܣܵܒܵܒ ܒܘܼܫ ܨܦܵܝܝܼ ܝܠܵܗ̇ ܐܸܠܘܼܟ݂ ܕܥܵܒ݂ܪܹܬ ܠܚܲܝܹ̈ܐ ܒܚܕܵܐ ܥܲܝܢܵܐ ܡ̣ܢ ܕܗܵܘܹܐ ܠܘܼܟ݂ ܬܲܪܬܹܝ ܥܲܝܢܹ̈ܐ ܘܦܵܝܫܹܬ ܕܸܪܝܵܐ ܓܵܘ ܓܹܗܲܢܵܐ ܕܢܘܼܪܵܐ.
ܥܸܪܒܵܐ ܛܠܝܼܩܵܐ
ܠܘܩܐ 15:3‐7
10”ܗܘܹܝܡܘܼܢ ܗܸܫܝܵܪ ܕܠܵܐ ܡܲܣܠܹܝܬܘܿܢ ܠܚܲܕ ܡ̣ܢ ܐܲܢܹܐ ܙܥܘܿܪܹ̈ܐ. ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܡܲܠܲܐܟܲܝ̈ܗܝ ܐܲܡܝܼܢܵܐܝܼܬ ܟܹܐ ܚܵܙܝܼ ܦܵܬܵܐ ܕܒܵܒܝܼ ܕܝܼܠܹܗ ܒܫܡܲܝܵܐ. 11”ܣܵܒܵܒ ܒܪܘܿܢܵܐ ܕܐ݇ܢܵܫܵܐ ܐ݇ܬܹܐ ܠܹܗ ܕܦܲܪܸܩ ܠܗ̇ܘ ܕܛܠܝܼܩܵܐ ܝܗ݇ܘܵܐ. 12”ܡܘܿܕܝܼ ܒܸܚܫܵܒ݂ܵܐ ܝܬܘܿܢ، ܐܸܢ ܐ݇ܢܵܫܵܐ ܗܵܘܹܐ ܠܹܗ ܐܸܡܵܐܐ ܥܸܪ̈ܒܹܐ، ܘܚܲܕ ܡܸܢܲܝܗܝ ܛܵܠܹܩ، ܠܹܐ ܫܵܒܹܩ ܬܸܫܥܝܼ ܘܬܸܫܥܵܐ ܥܲܠ ܛܘܼܪ̈ܵܢܹܐ ܘܐܵܙܹܠ ܛܵܥܹܐ ܠܗ̇ܘ ܕܛܠܝܼܩ ܠܹܗ؟ 13”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܝܼܡܲܢ ܕܚܵܙܹܐ ܠܹܗ ܒܸܬ ܚܵܕܹܐ ܒܗ̇ܘ ܥܸܪܒܵܐ ܒܘܼܫ ܙܵܘܕܵܐ ܡ̣ܢ ܬܸܫܥܝܼ ܘܬܸܫܥܵܐ ܕܠܵܐ ܛܠܝܼܩ ܠܗܘܿܢ. 14”ܗܲܕܟ݂ܵܐ، ܠܹܐ ܝܠܹܗ ܨܸܒ݂ܝܵܢܵܐ ܕܒܵܒܵܘܟ݂ܘܿܢ ܕܒܫܡܲܝܵܐ ܕܛܵܠܹܩ ܚܲܕ ܡ̣ܢ ܐܲܢܹܐ ܙܥܘܿܪܹ̈ܐ.
ܪܹܐܙܵܐ ܓܵܘ ܥܹܕܬܵܐ
ܠܘܩܐ 17:3
15”ܐܸܢ ܥܵܒܹܕ ܓܢܵܗܵܐ ܒܝܼܘܼܟ݂ ܐܲܚܘܿܢܘܼܟ݂، ܙܹܠ݇ ܘܡܲܕܸܥ ܐܸܠܹܗ ܓܢܵܗܹܗ ܒܹܝܠܘܼܟ݂ ܘܒܹܝܠܹܗ ܐܲܚܟ̰ܝܼ. ܐܸܢ ܫܵܡܹܥ ܐܸܠܘܼܟ݂، ܩܢܹܐ ܠܘܼܟ݂ ܐܲܚܘܿܢܘܼܟ݂. 16”ܐܝܼܢܵܐ ܐܸܢ ܠܵܐ ܫܵܡܹܥ ܐܸܠܘܼܟ݂، ܠܲܒܸܠ ܥܲܡܘܼܟ݂ ܚܲܕ ܝܲܢ ܬܪܹܝ ܐ݇ܚܹܪ̈݇ܢܹܐ، ܕܥܲܠ ܦܘܼܡܵܐ ܕܬܪܹܝ ܝܲܢ ܬܠܵܬܵܐ ܣܵܗܕܹ̈ܐ ܦܵܝܫܵܐ ܡܘܼܩܘܝܼܬܵܐ ܟܠ ܗܹܡܸܙܡܵܢ.#ܬܢܝܢ ܢܡܘܣܐ 19:15 17”ܘܐܸܢ ܠܵܐ ܫܵܡܹܥ ܐܘܼܦ ܐܸܠܲܝܗܝ، ܐ݇ܡܘܿܪ ܠܥܹܕܬܵܐ، ܘܐܸܢ ܠܵܐ ܫܵܡܹܥ ܠܥܹܕܬܵܐ، ܗܵܘܹܐ ܐܸܠܘܼܟ݂ ܐܲܝܟ݂ ܡܵܟ݂ܣܵܐ ܘܐܲܝܟ݂ ܚܲܢܦܵܐ.
18”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܟܠ ܡܸܢܕܝܼ ܕܐܵܣܪܝܼܬܘܿܢ ܒܐܲܪܥܵܐ ܒܸܬ ܗܵܘܹܐ ܐ݇ܣܝܼܪܵܐ ܒܫܡܲܝܵܐ، ܘܟܠ ܡܸܢܕܝܼ ܕܫܵܪܹܝܬܘܿܢ ܒܐܲܪܥܵܐ ܒܸܬ ܗܵܘܹܐ ܫܸܪܝܵܐ ܒܫܡܲܝܵܐ. 19”ܡܸܢܕܪܸܫ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܐܸܢ ܬܪܹܝ ܡܸܢܵܘܟ݂ܘܿܢ ܣܲܙܓܸܪܝܼ ܥܲܠ ܐܲܪܥܵܐ ܥܲܠ ܟܠ ܡܸܢܕܝܼ ܕܛܵܠܒܝܼ، ܒܸܬ ܗܵܘܹܐ ܐܸܠܲܝܗܝ ܡ̣ܢ ܠܟܸܣ ܒܵܒܝܼ ܕܒܫܡܲܝܵܐ. 20”ܣܵܒܵܒ ܐܲܝܟܵܐ ܕܬܪܹܝ ܝܲܢ ܬܠܵܬܵܐ ܓ̰ܡܝܼܥܹܐ ܝܢܵܐ ܒܫܸܡܝܼ، ܬܵܡܵܐ ܝܘܸܢ ܐܵܢܵܐ ܓܵܘܲܝܗܝ.“
ܫܒ݂ܵܩܬܵܐ ܕܓܢܵܗܵܐ
21ܐ݇ܬܹܐ ܠܹܗ ܫܸܡܥܘܿܢ ܟܹܐܦܵܐ ܠܟܸܣ ܝܼܫܘܿܥ ܘܒܘܼܩܸܪܹܗ، ”ܡܵܪܝܼ، ܟܡܵܐ ܓܵܗܹ̈ܐ ܚܵܛܹܐ ܐܸܠܝܼ ܐܲܚܘܿܢܝܼ ܘܦܲܚܠܸܢܹܗ، ܗܲܠ ܫܒܲܥ ܓܵܗܹ̈ܐ؟“ 22ܓ̰ܘܼܘܸܒ ܠܹܗ ܐܸܠܹܗ ܝܼܫܘܿܥ، ”ܠܹܐ ܝܘܸܢ ܒܹܐܡܵܪܵܐ ܐܸܠܘܼܟ݂ ܗܲܠ ܫܒܲܥ ܓܵܗܹ̈ܐ، ܐܝܼܢܵܐ ܗܲܠ ܫܲܒ݂ܥܝܼ ܓܵܗܹ̈ܐ ܫܒܲܥ. 23”ܗܲܕܟ݂ܵܐ ܟܹܐ ܕܵܡܝܵܐ ܡܲܠܟܘܼܬܵܐ ܕܫܡܲܝܵܐ ܠܚܲܕ ܡܲܠܟܵܐ ܕܒܥܹܐ ܠܹܗ ܕܫܵܩܹܠ ܚܸܫܒܘܼܢܵܐ ܡ̣ܢ ܪܹ̈ܓܵܘܵܬܹܗ. 24”ܘܟܲܕ ܫܘܼܪܹܐ ܠܹܗ ܠܸܫܩܵܠܵܐ ܚܸܫܒܘܼܢܵܐ، ܡܘܼܐܬܹܐ ܠܗܘܿܢ ܠܟܸܣ ܠܹܗ ܚܲܕ ܕܕܲܝܢܵܢܵܐ ܝܗ݇ܘܵܐ ܐܸܠܹܗ ܥܸܣܪܵܐ ܐܲܠܦܹ̈ܐ ܟܲܟܪܹ̈ܐ. 25”ܐܝܼܢܵܐ ܣܵܒܵܒ ܠܲܝܬ ܗ݇ܘܵܐ ܠܹܗ ܠܸܦܪܵܥܵܐ، ܦܩܝܼܕ ܠܹܗ ܡܵܪܹܗ ܕܦܵܐܹܫ ܙܘܼܒܢܵܐ، ܗ̇ܘ ܘܒܲܟ݂ܬܹܗ ܘܝܵܠܕ݇ܘܼ̈ܗܝ ܘܟܠ ܡܸܢܕܝܼ ܕܐܝܼܬ ܗ݇ܘܵܐ ܠܹܗ، ܘܦܵܪܹܥ ܗ݇ܘܵܐ. 26”ܐܝܼܢܵܐ ܪܹܓܵܐ ܢܦܝܼܠ ܠܹܗ ܥܲܠ ܒܘܼܪ̈ܟܵܟܘܼܗܝ ܘܦܘܼܪܦܸܠ ܠܹܗ ܒܝܼܹܗ ܘܐ݇ܡܝܼܪܹܗ، ’ܡܵܪܝܼ، ܚܡܘܿܠ ܥܲܠܝܼ، ܘܒܸܬ ܦܵܪܥܹܢܘܼܟ݂ ܟܠ ܡܸܢܕܝܼ.‘ 27”ܗ̇ܝܓܵܗ ܪܘܼܚܸܡ ܠܹܗ ܥܲܠܘܼܗܝ ܡܵܪܹܗ ܘܫܪܹܐ ܠܹܗ، ܘܦܘܼܚܸܠ ܠܹܗ ܐܸܠܹܗ ܕܲܝܢܹܗ. 28”ܐܝܼܢܵܐ ܗ̇ܘ ܪܹܓܵܐ ܦܠܝܼܛ ܠܹܗ ܘܚܙܹܐ ܠܹܗ ܚܲܕ ܚܲܒ݂ܪܹܗ ܒܪܹܓܘܼܬܵܐ ܐ݇ܚܹܪ݇ܢܵܐ ܕܕܲܝܢܵܢܵܐ ܝܗ݇ܘܵܐ ܐܸܠܹܗ ܐܸܡܵܐܐ ܕܝܼܢܵܪܹ̈ܐ، ܕܒ݂ܝܼܩ ܠܹܗ ܘܚܵܢܹܩ ܗ݇ܘܵܐ ܠܹܗ، ܘܐ݇ܡܝܼܪܹܗ ܐܸܠܹܗ، ’ܗܲܒ݂݇ܠ ܠܝܼ ܡܸܢܕܝܼ ܕܕܲܝܢܵܢܵܐ ܝܘܸܬ ܐܸܠܝܼ.‘ 29”ܘܢܦܝܼܠ ܠܹܗ ܗ̇ܘ ܚܲܒ݂ܪܹܗ ܒܪܹܓܘܼܬܵܐ ܩܵܕ݇ܡ ܐܲܩܠܵܬܹ̈ܗ ܘܦܘܼܪܦܸܠ ܠܹܗ ܒܝܼܹܗ، ܒܹܐܡܵܪܵܐ، ’ܡܲܪܝܸܟ݂ ܥܲܠܝܼ ܒܹܐܢܵܐ ܘܒܸܬ ܦܵܪܥܹܢܘܼܟ݂.‘ 30”ܐܝܼܢܵܐ ܗ̇ܘ ܠܵܐ ܒܣܝܼܡ ܠܵܗ̇ ܠܹܗ. ܐܸܠܵܐ ܐ݇ܙܝܼܠ ܠܹܗ ܘܕܪܹܐ ܠܹܗ ܐܸܠܹܗ ܓܵܘ ܒܹܝܬ ܐܲܣܝܼܪܹ̈ܐ ܗܲܠ ܕܦܵܪܹܥ ܗ݇ܘܵܐ ܠܕܲܝܢܹܗ. 31”ܟܲܕ ܚܙܹܐ ܠܗܘܿܢ ܚܲܒ݂ܪ̈ܵܘܵܬܲܝܗܝ ܒܪܹܓܘܼܬܵܐ ܡܸܢܕܝܼ ܕܗܘܹܐ ܠܹܗ، ܦܫܝܼܡ ܠܗܘܿܢ ܪܵܒܵܐ، ܘܐ݇ܬܹܐ ܠܗܘܿܢ ܘܡܘܼܚܒܸܪܗܘܿܢ ܠܡܵܪܲܝܗܝ ܟܠ ܡܸܢܕܝܼ ܕܗܘܹܐ ܠܹܗ. 32”ܗ̇ܝܓܵܗ ܡܵܪܹܗ ܩܪܹܐ ܠܹܗ ܐܸܠܹܗ ܘܐ݇ܡܝܼܪܹܗ، ’ܪܹܓܵܐ ܒܝܼܫܵܐ، ܟܠܹܗ ܗ̇ܘ ܕܲܝܢܵܐ ܦܘܼܚܸܠ ܠܝܼ ܐܸܠܘܼܟ݂ ܣܵܒܵܒ ܦܘܼܪܦܸܠ ܠܘܼܟ݂ ܒܝܼܝܼ، 33”’ܘܵܠܹܐ ܝܗ݇ܘܵܐ ܕܐܘܼܦ ܐܲܢ݇ܬ ܪܲܚܡܸܬ ܗ݇ܘܵܐ ܠܚܲܒ݂ܪܘܼܟ݂ ܒܪܹܓܘܼܬܵܐ ܐܲܝܟ݂ ܕܐܵܢܵܐ ܪܘܼܚܸܡ ܠܝܼ ܥܲܠܘܼܟ݂.‘ 34”ܟܪܝܼܒ ܠܹܗ ܡܵܪܹܗ، ܘܣܘܼܦܹܐ ܠܹܗ ܠܡܲܠܝܸܨܵܢܹ̈ܐ ܗܲܠ ܕܦܵܪܹܥ ܗ݇ܘܵܐ ܟܠ ܡܸܢܕܝܼ ܕܕܲܝܢܵܢܵܐ ܝܗ݇ܘܵܐ. 35”ܗܲܕܟ݂ܵܐ ܐܘܼܦ ܒܵܒܝܼ ܕܒܫܡܲܝܵܐ ܒܸܬ ܥܵܒܹܕ ܐܸܠܵܘܟ݂ܘܿܢ ܐܸܢ ܠܵܐ ܦܲܚܠܝܼܬܘܿܢ ܡ̣ܢ ܠܸܒܵܘܟ݂ܘܿܢ ܐ݇ܢܵܫܵܐ ܠܐܲܚܘܿܢܘܼܗܝ.“
Nke Ahọpụtara Ugbu A:
ܡܬܝ 18: ABTAB
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Aramaic Bible Translation Assyrian Bible © 2025 Aramaic Bible Translation