Salmos 26

1Bchi'a chia', Xran, lawe' da nuna' da xrlátaje.

Bxren lazra' Lue', Xrana' Dios, ne quebe be̱n chupa lazra'.

2Gunná' xanne' lázrdawa', Xran, ne bxue ca da nuna'.

Gunná' xanne' da xu'u lu xichaj lázrdawa'

3lawe' da dxeque be'eda' dxexache lazru' neda',

ne dxuna' ca naca da li chiu'.

4Quebe ne guna' tu zren benne' ca' dxelune̱' da xrlátaje cúzreze,

ne quebe ne guna' tuze benne' ca' dxululé'e cuine̱' xrlátaje.

5Dxecuídeda' da dxelún benne' ca' dxelune̱' da cale̱la

naga dxelezrague̱',

ne quebe ne chu'a tu zren benne' ca' dxuluzúe̱' Dios chalá'ala.

6Dxelé'enu' quebe bi zria nabaga',

na' waca biga' lu cugu chiu', Xran,

7chee̱ cuezre xa'a, xapa' Lue': “Xcalenu'”,

ne chee̱ guzenda' bénneache ca naca da zren ca' da nunu'.

8Xran, nazrí'ida' lizru' naga zu',

ne lataj lá'azxa naga zua da xabáa chiu'.

9Quebe guzría xi'u neda' tu zren nen benne' dul-la ca',

ne quebe gutiu' neda' tu zren nen benne' ca' dxelútie̱' benneáche,

10benne' ca' dxelune̱' da cale̱la,

ne tu dxulunézrujzqueze̱' dumí chee̱ xelelé̱' lu da zaj nune̱'.

11Neda' tu gúnzqueza' da naca li lazre'.

Bselá neda', ne bexache lazre' neda'.

12Tu núnzqueza' da xrlátaje, na' güe lá'anaqueza'

Xránadxu Dios

lau benne' ca' zaj nazrague̱' chee̱'.

Chwazi Kounye ya:

Salmos 26: zat

Pati Souliye

Pataje

Konpare

Kopye

Vèsè popilè nan Bib la ki soti nan
Salmos 26