Rom 2
2
1 #
Mat 7.1; Luk 6.37. Koutou teeai ki hua ni hua poro tenaa tama he tama takahara. Ki mee koutou e hua ni hua peenaa, koutou raa ka pito tuku naa takahara ki koutou hoko koutou, e mee i koutou hoki ni tama e mee naa tiputipu hakarria. 2Taatou e illoa poro te Tama Hamataku e tonu i tevaa aia e hakatonu naa tama koai e mee naa tiputipu hakarria peenei. 3Koia koutou ni tama koi. Ai koutou e hua hakariaria peehea i naraa tama i koutou roo ni tama e mee naa takahara peenaa? Koutou e mannatu poro te Tama Hamataku raa ka tee nani te hakatonu ina koutou? 4Te Tama Hamataku e aroha i koutou ka anaana hakaraaoi i koutou. Koia koutou e mee pai ni tama e teeai ki hiahia i naa tiputipu tana laoi naa. Koutou e illoa poro te Tama Hamataku e manava aroha i koutou ma e ruu i koutou ki tiake naa tiputipu hakarria koutou. 5Koia koutou koi tauhi i naa tiputipu hakarria autou naa. Koutou tee nani roo i te huri naa manava autou. Koutou e hakatipu purima naa takahara ka takkoto i koutou. Anaa te Tama Hamataku raa ka hakkite atu tana hat'roto i tana vaa e haka tonutonu naa tama katoo. 6Te Tama Hamataku raa ka too ake naa tuhana naa tama katoo tautari i heaa laatou ni mee i te kerekere nei. 7E mee naraa tama e mee naa tiputipu taurreka i naa vaa katoo, e rruu i te Tama Hamataku ki hiahia i laatou, ma e rruu ki tauhi te ora e taakoto i naa vaa katoo. Te Tama Hamataku raa ka kavake te ora e taakoto i naa vaa katoo. 8Koia naraa tama e mannatu i laatou roo hoko laatou ka ten'taa ki hakarrono i te hamaauri, laatou koi rruu ki tautari i naa tiputipu hakarria. Te Tama Hamataku raa ka tuku atu ana hat'roto i laatou. 9Naa haeko naa raa ka too ake ki naa tama katoo e mee naa mee e hakarria, kaamata i naa Jiu no hakaoti i naa tama naraa henua. 10Koia te Tama Hamataku raa ka hakanau ka too ake ana haiao ma tana laaoi ki naa tama e mee naa tiputipu taurreka, kaamata i naa Jiu no hakaoti i naa tama naraa henua. 11E mee te Tama Hamataku e teeai ki hirihiri koai aia e ruu. Aia e haka tonutonu naa tama katoo i te haarena hokotahi.
12Naa tama i naraa henua koai ni teeai ki illoa i naa Loo Moses, kime laatou ni mee ni takahara, laatou raa ka mmate i naa takahara laatou. Koia naa Jiu koai ni ttipu ake ma naa Loo Moses, kime laatou ni mee ni takahara, te Tama Hamataku raa ka haka tonutonu laatou tautari i naa Loo Moses. 13E mee te ora te tama e teeai ki tonu i naa kanomata te Tama Hamataku kime te tama naa e hakarono koi i naa Loo Moses. Aia ki tautari hoki ki naa hua naa Loo naa ki tonu i naa kanomata te Tama Hamataku. 14Naa tama naraa henua e teeai ki illoa i naa Loo Moses, koia tevaa laatou e ppena naa mee laatou e mannatu poro e ttonu ka hano tonu ma naa Loo Moses, naa mannatu laatou naa ku takkoto pai ni Loo ki laatou, kiaa roo laatou ni teeai ki ttipu ake ma naa Loo Moses. 15Naa tiputipu laatou e hakkite ake poro naa hua naa Loo e taakoto i loto naa manava laatou. Naa mannatu laatou e hakailoa ake hoki poro te mee nei e tonu, e mee laatou e illoa hoko laatou i te mee e tonu ma te mee e hara. 16Naa mee nei raa ka hhae i te laa te Tama Hamataku e haka tonutonu ai naa tama. I te laa naa, Jisas Krais raa ka hakkite ake ki laatou purima naa mee laatou e huu i loto naa manava laatou. Anei ko te Rono Taurekareka te Tama Hamataku anau e hua ake.
Naa Jiu ma naa Loo Moses
17Ai koutou? Koutou e mee poro koutou naa Jiu e tautari ki naa Loo, anaa koutou hoki e haka hii vaanana poro koutou ni tama te Tama Hamataku. 18Koutou e illoa heaa aia e ruu; koutou e illoa heaa e tonu e mee i koutou ni hikuru ina naa Loo. 19Koutou e illoa roo poro koutou ni tama e hattaki naa tama kanomata ppuni, ma he laiti naa tama e nnoho i te poouri. 20Anaa koutou e mannatu poro koutou e nani te hakailoa naa tama e teeai ki illoa i naa mee ma e hikuru ina naa tamarriki i naa tiputipu te Tama Hamataku. E mee koutou e hai poro koutou e illoa poro naa Loo te Tama Hamataku e kavatu te iloa katoo e hamaauri. 21Koutou e hikuru naraa tama, ai koutou roo tee hikuru ai koutou hoko koutou?! Koutou e hikuru naraa tama ki teeai ki kairaurau, ai koutou roo e kairaurau ai koutou hoko koutou?! 22Koutou e hua poro e teeai ki tonu ki haihuri ma naa aavana naraa tama, ai koutou e nnoho tonu ma naa aavana autou?! Koutou e ten'taa i naa aitu kairrehi, ai koutou e huuhuu ai naa mee i naa hare tapu naa aitu naa?! 23Koutou e haka hii vaanana poro koutou e illoa i naa Loo, koia koutou teeai ki hakanau i te Tama Hamataku i koutou e teeai ki tautari i naa Loo naa! 24Te Peepaa e tapu e hua poroo, “Naa tama naraa henua e hua hakarria i te inoa te Tama Hamataku e mee i naa tiputtipu koutou naa Jiu e teeai ki ttonu.”
25E tonu i koutou e hhere kime koutou e tautari hamaauri i naa Loo Moses. Ai koia kime koutou e teeai ki tautari i naa Loo naa, koutou e mee koi pai naa tama e teeai ki hhere. 26Ai kime naa tama naraa henua e teeai ki hhere koia e tautari i naa Loo, koutou e mannatu poro te Tama Hamataku tee nani te hua poro laatou ni tama roo aana? 27Hamaauri roo naa tama naraa henua e teeai ki hhere koia e tautari i naa Loo raa ka hua takahara i koutou naa Jiu koai e hhere ka tauhi naa Loo te Tama Hamataku koia e teeai ki tautari i naa Loo naa.
28Te tama e teeai he Jiu hamaauri e mee i naa matua aana ni Jiu ma e mee i te ia ni hhere. 29Teeai, te Jiu hamaauri ko te tama e tonu tana ora ma te Tama Hamataku. Anaa te tama e hhere hamaauri e teeai ko te tama e tautari ki naa Loo; koia te tama e huri hia tana manava te Aitu te Tama Hamataku. Te tama e huri hia tana manava e ruu i te Tama Hamataku ki hakanau i te ia, koia teeai ko naa tama te kerekere nei.
© 2025 Wycliffe Bible Translators, Inc.