JOHAN 2
2
Cana ga Meunui
1Lang nane cai Galilee ga Cana nam ga meunui ge bam. Jisu pui cika bam, 2Jisu nah pa ledeukelume dede meunui gage qu gai pwabam. 3Zau kai beu cang dige, Jisu pui peda ge rang di, “Penui zau bangh nzeu meda.”
4Jisu keli gai, “Daipai tei zie bi kecu nang ada ge rang kerabe ma. A ting au gwang mereu.”
5Pecai Jisu pui kilame dage rang beu, “Pa nnui dage rang kebeu leune tei lu.”
6Renet zai gade mahui nci kecu Judahme riet dungge bam la, nah aide ziemne ntsu duibung herok cika bam, ket ga litre 100 bam lu kebui bung dung. 7Jisu kilame dage rang gai, “Aipau bung dung de duile tei puih lu.” Penui cidung de pemung ga kecang tei puih lu, 8delü pa penui dage rang gai, “Cu dui kesa twak lü taktyei ngyi ga kerengeibe de cide pwa beu lo.” Penui dui pwa pecu peu, 9cide cu zau mmi di, nah pa cide nsi lu. Pa zau aide daiga de gwang bi ci ma (dede, dui twakpwa kela kilame au cide ci bam); cine pa lakciube de qulu 10delü peda ge rang gai, “Mina leune zau keyibe kai beu rai la, nah hegiame sak set kelu caine, pa zauda kai beula. Dede nang au cu kecang de zau yitube kai eh bamreu!”
11Jisu miswa kega raitube aide Galilee Cana gade tei gai; pa cika de pe kendu pwalia gai, nah pa ledeukelume pecu nlum lu.
12 #
Mat. 4:13. Aipau cai, Jisu nah pe pui, siname, nah ledeukelume Capernaum ga mie eh cika tingbazie kiee kemak ge bam di.#Mat. 4:13.
Jisu Kerecaki ga Kemie
(Mat. 21:12-13; Mrk. 11:15-17; Luk. 19:45-46)
13 #
Mat. 4:13. Cidau kahkegwang Ngyi ting mna di, cine Jisu Jerusalem ga miedi.#Tet. 12:1-27. 14Cika kerecaki gade pa mina dung ketum, meurün, nah ruipuine dung, zwa kebam ngau lu, nah rangkang kehiakme penui kaira ga ntum bam kecu de. 15Cine pa heria le pwa kedap ria tei lü Kerecaki gade makaune pelane de gwa mpet ti, meurün nah ketum dung kenana; pa rangkang kehiakme kaira dung de teukau di nah penui rangkang goi dung tei zangra di; 16nah pa ruipuine zwa kebam dung dage aja kai gai, “Cidung de aika de keu mpet tilu! A pei ki le pwa liitak ni ketei de mtak dilu!” 17Pa ledeukelume kesanglaisiu rang kela de nsung lu, “I n ki de gage a lung kekai, O Tinggwang, a lung ga mi nzwa heu eh bam lie.”#Lei. 69:9.
18Judahme muiteume sam ge keteu eh samli peu gai, “Nang aide tei kera n kenkieng bam lie kecu anui de liah gai kera miswa kega bata daipai tei lubui no?”
19Jisu keli gai, “Kerecaki aide tei kau di, nah lang cumne gage I cide tei dai luzie.”#Mat. 26:61; 27:40; Mrk. 14:58; 15:29.
20Penui pecu keteu, “Nang lang cumne gage cide tei dai lubui lie ni? Kerecaki aide tei kecu mmi 46 teu di!” 21Dede kerecaki ha Jisu rang kebam de au pe pum. 22Cine Jisu ze ketsai gade teucuh luge, pa ledeukelume pa aide kerang de nsung lu, nah penui kesanglaisiu de nah Jisu kerang de nlum lu.
Jisu Mina zai Keci
23Jisu kahkegwang Ngyi tingdau Jerusalem ga bam ge, mina kekiee ge penui pa tei kegai miswa kega bata dung ngau eh pecu nlum lu. 24Dede Jisu au penui de nlum ma, kedanemene pa penui pelane de kecine. 25Peda ge migede penui ha rang mede yi, kedanemene pa penui mlung ga daipai labi ci kebam ne.
Chwazi Kounye ya:
JOHAN 2: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.