JOHAN 19
19
1Pecai Pilate au Jisu ze teu lü pecu dap gai. 2Roigwame hetuu hua pwa hegwang peurwa ge tei lu delü cide pwa pe peu gage kai gai; delü penui paigie ge pecu peu bah lu 3delü peda gwang rang di, “Judahme Gwangpei de peu ring ketiebe tei lo!” Nah penui cuh eh pecu kepoi. 4Pilate piage hegole maadibe da pet dai eh rang gai, “Ainie, peu nnui de I pecu mmau kera gede ngau lu melie kecu nnui de peu pie kera I aika pecu ngngwa pet beuzie.” 5Cine Jisu tetpet ti, hetuu peurwa pung nah kegie pai de bah eh. Pilate penui dage rang gai, “Ainie! Aika minabe!” dedi. 6Cingku kedihme dung nah kerecaki kekwame pecu ngau luge, penui sa di, “Pecu gwak di! Pecu gwak di!” Pilate penui dage rang gai, “Nnui pecu ngngwa lu, ciciu de, delü pecu gwak dilu. I pecu mmau kera kie ngau luma” dedi. 7Hemaabe pe sam keli dai gai, “Anui hezai ge bam nah cide kerang au pa tsaidi kerabe, kedanemene pa au Tinggwang Nabe lie rang kelane.” 8Pilate aide siu luge, pa au ngngi kidi. 9Pa hegwangki ga caili nlüt lü Jisu ze keteu di, “Nang daiga de gwang no?” Dede Jisu sam keli tadi. 10Pilate peda de rang di, “Nang ada de marang lakni? Nsung lulo, I ncu lungmpet lu kera nah gwak di kera de kenkieng bam.” 11Jisu keli gai, “Tinggwang ne ncu kepeu rünne nang a reu ga kenkieng bam. Cine n ba gage acu tuih gai kebeube de au mauki kecu mauge tei dida.” 12Pilate aide siu luge, pa Jisu ze lungmpet di kera lampui peeicu di. Dede maadibe sabaq eh keligwa, “Nang pecu lungmpet beu cai, cide pekieh nang au Hegwangpei zangbe meda! Keheibe de hegwangpei ge lie rang cai pa au Hegwangpei de renia la delu!” 13Pilate sam aidung de siu luge, pa Jisu ze hegole ngngwa gwanglü heni ge “Ntsuqang Bamswa” lie qu kela tutiak bahm gega bam lu. (Ibrime koa gade hezi cide “Gabbatha”) 14Cidau Kahkegwang dwa benai tingna tingding di laidi. Pilate mina dung dage rang gai, “Aika nnui gwangpei!” 15penui sabaq eh “Pecu teitset ti! Pecu teitset ti! Pecu gwak di!” dedi. Pilate penui da keteu, “Nnui acu peu nnui gwangpei de gwak di neu lani?” Cingku kedihme dung keli gai, “Anui kebam gwangpei ket rünne kecu de au Hegwangpei!” dedi. 16Pecai Pilate au Jisu ze gwak di lo eh penui ba gage kai beudi.
Jisu ze Gwak kedi
(Mat. 27:32-44; Mrk. 15:21-32; Luk. 23:26-43)
Cine penui Jisu ze ngngwa lu. 17Pa tetpet ti, pe cross pwa lü, nah “Heni ge Mipoira” lie kela ga gwang lu. (Ibri led gade cide de “Golgotha” lie qu la.) 18Cika ge penui pecu gwak di; nah penui mi keda hang na dede gwak di, tu ramcau ga, Jisu penai kak ga. 19Pilate mdukegai ge rau gai delü cide pwa cross reu gage kai lu. Pa rau kegai de “Nazarethme Jisu, Judahme Gwangpei.” 20Mina kekiee ge cide pei, kedanemene Jisu ze kegwak ni de namdibe gade dei kemakne. Mdu kegai de Ibri, Latin, nah Greek gade rau gai. 21Cingku kedibe Pilate dage rang, “‘Judahme Gwangpei’ de eh rau so, dede ‘Mina aipau de rang la, I Judahme Gwangpei’ de kecu rau lulo.” dedi. 22Pilate keli gai, “I sam rau gai kedi de rau nzeu dida” dedi. 23Roigwame Jisu ze gwak dige, penui pe paini dung keu lü zi mdai tei lu, zige roigwame ketket eh. Penui pe cuatie de keu lu, cide pe herui gede si mene dak kelu pai gele tei lu. 24#Lei. 22:18.Roigwame hang gege dade rang di, “Anui cide teihak di mego; anui cide cau bene ngau luzie bi dacak pie go,” dedi. Aide Kesanglaisiu teicang lu kerane tei di: “Penui kak gade penui a paini mzi luda nah a cuatie ziemne penui dacak lu.” Ainzwa eh roigwame tei di. 25Jisu cross tai ga sap mna kebam dung au pe pui, pe pui sinapui, Clopas nau Mary, nah Mary Magdalene. 26Jisu au pe pui nah pa hungkela ledeukelube cika kesap ngau lu; cine pa pe pui dage rang gai, “Pa au n napei lie.” 27Nah pa ledeukelube dage rang gai, “Pa au n pui delie.” Cipau nai gade ledeukelube pecu peu pe ki ga lungh kerane ngngwa lu.
Jisu Tsit
(Mat. 27:45-56; Mrk. 15:33-41; Luk. 23:44-49)
28 #
Lei. 69:21; 22:15. Cu au maleune teicang gwang kecu Jisu ci di; nah peu kesanglaisiu de teicang lu kerane, pa rang gai, “I hereu dida.” 29Hekwak ge cika bam, zauda le puih eh; cine pupteutsi ge zau gage mpung lu, hyssop tie reu gage kailü pe mui ga pwacuh kai. 30Jisu zau de sak lü rang di, “Cide cang da!” Pecai pa pe peu keumie eh tsaidi.
Jisu Hejak reuh kegai
31Pecai Judahme kenkieng dung penui de peu gwakpwa kebamme pi dung teicum di eh cross dung gade hepaau dung pwa nghungh kera kie lu. Penui cide kie di kedanemene cide Rataknai kecune, nah penui hepaau dung de peu Sabbath benai cross dung ga bam neu kemakne, kedanemene gwang kezeube Sabbath au keraide mci kecune. 32Cine roigwame mie Jisu de ngngwa gwakpwa kebam mina keraibe nah pecai kedabe pi dung de teicum di. 33Dede penui Jisu da gwang ge, penui Jisu au tsai kedi ngau lu, cine penui pe pi teicum tadi. 34Ciciu de, roigwame ge, pe ngei Jisu mbie gage reuh gai, ge dui nah hejai lwa zette pet ti. 35(Aide tei kedi kengaube cide ha rang gaida, ciciu eh nnui de peu nlum lu kerane.#19:35. Nlum lu; Laisiu kesa ga bam nlum jüja. Pa kerang de au kesang, nah pa kesangbe rang kebam pa ci bam.) 36#Tet. 12:46; Pum. 9:12; Lei. 34:20.Kesanglaisiu teicang lu kerane aide tei di: “Pe ra kette teicum dilak.” 37#Zek. 12:10; Keu. 1:7.Nah kesanglaisiu keda gede rang la, “Mina dung penui ne reu kegaibe de pie zie.”
Jisu ze Kekung
(Mat. 27:57-61; Mrk. 15:42-47; Luk. 23:50-56)
38Aipau cai, Joseph, Arimathea nam gade kegwangbe pa Jisu paau pwalu kebui Pilate dade keteu lu. (dede Joseph au nkim eh Jisu caisui kelame ge, pa Judahme kenkieng de hing kecune.) Pilate peda ge hepaau be pwalu kebui rang beu, cine Joseph mie cide pwatet ti. 39#Jhn. 3:1,2.Nicodemus, tingmui Jisu ze redau kera kemiebe de Joseph ze ngngwa mie, myrrh penai aloes rui ncüt kelu mosala kilogram camrei kenzwa ge teu eh. 40Cipau kena de Jisu paau pwalu delü langhcim pai gage mosala de si eh cide hezui lu Judahme Zai gade hepaau kung kera ketelei nzwa eh. 41Jisu ze teitset kelu ni ga hegurie ge bam, nah cika madau gede mige dede kung kemak herau keheci ge bam. 42Cipau nai de Sabbath dwa benai kecune nah herau be kemna ga kebam ne, penai Jisu paau cika ge kai di.
Chwazi Kounye ya:
JOHAN 19: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.