JOHAN 10
10
Meurün kekwabe Samgwa
1Jisu rang gai, “I nnui dage kesangbe rang la: mina meurün hau de peu kirieki gade nlüt kemakbe, dede lampui kedalam de nrahkah kelabe, au kerega nah sütketyeibe lie. 2Kirieki gade kelütbe au meurün kekwabe lie. 3Kirieki kekwabe pe ziemne kirieki nkei beula; meurün pe koa siu la pa pe meurün zi rang eh penui zi qu kegai dau, 4pa penui de sau eh mpet kelu dau, pa penui dwa ga raimie la, nah meurün dung pecai suila, penui pe koa ci kecune. 5Penui mi kedame caisui dilak, meliene penui mina cii kenzwabe dade pak dizie, kedanemene penui pe koa ci kemakne.” 6Jisu penui de samgwa aide ranglia, dede pa cide pekieh dai lie bam bi penui ci luma.
Jisu au Meurün kekwa keyibe.
7Cine Jisu rang dai gai, “I nnui dage kesangbe rang la: I au meurün ziemne kirieki lie. 8A dwa kegwang kedame pelane au keregame nah sütketyeime, dede meurün dung penui koa kingnei ma. 9I au kirieki lie. A dade kelütme de keli luzie; pa nlüt nah mpet eh tsehei ngau luzie. 10Keregabe au rega, teitset, nah nkap kera rünne ziemne gwang la. Nnui de peu kering ngau lu kerane I gwang lie kering cide puihting kecu. 11I au meurün kekwa keyibe, meurün dung ziemne tsaibeu neu kelabe. 12Hezieh liiteu kelabe, meurün kekwabe kemakbe, henoi ge kegwang ngau luge, pa meurün de püt ti eh pak dila; cine henoi ne meurün de herak lula nah penui de tei zang dila. 13Liiteu kelabe pak dila pa au liiteu kelage kecu rünne nah meurün ziemne lungpang bam lama. 14-15#Mat. 11:27; Luk. 10:22.I meurün kekwa keyibe lie. Peibe acu ci nah I Peibe de ci kebam ne, cinzwa eh I a meurün de ci nah penui acu ci la. Nah I penui ziemne tsaibeu neu la. 16Meurün hau aika bam kemak a meurün keda la reu. I penui dede ngngwa gwang lu maisia; penui a koa kingnei zie, nah penui meurün kekwa ket eh ngngwa hau ge dizie.#10:16. penui ket tizie; Laisiu kesa ga bam cika bam zie. 17Peibe acu hung la kedanemene I a pum kai beu neu eh kelane, ciciu eh I cide ngau dai lu kerane. 18Migede ada de a keringria keugi di gailak. I akatei a sui eh cide peu gaila. I peu gai kera mjeu bam, nah I cide keuteu dai kera mjeu de bam. Aide a Pei acu tei lulo aja kai beu.” 19Sam aidung de ziemne mina dung kak ga pangpup kedi ge pet dai di. 20Mina kekiee ge rang ladi, “Pa herakesiabe ge bam! Pa au miee dida! Nnui daitei pe koa kingnei lano?” 21Dede kedame dung rang ladi, “Herakesiabe ngngwa kelame ge ainzwa rang gailak! Dainzwa eh herakesiabe ge mikcietme de mangau kelu peu lu laino?”
Jisu ze Mlai kedi
22Cidau tingka ting, nah Jerusalem ga Kerecaki tei kemci Ngyi mnei bam. 23Jisu au Kerecaki ga Solomon kigu ga tet la, 24cidau mina dung pecu togwa lü keteu di, “Daitei nang anui de peu ci nci lu mene bam laino? Kesangsiakbe anui dage ranglia lo: nang Messiah deni?” 25Jisu keli gai, “I nnui dage ranglia dida, dede nnui acu nlum luma. I a Pei kenkieng teu eh tei kelabe dung ne a keloi gade marang lada; 26dede nnui nlum lak, nnui a meurün kemakne. 27A meurün a koa kingnei la; I penui de ci nah penui a caisui la. 28I penui de kelungta kering peu la, nah penui madaude tsai lak. Migede penui de a ba gade süt gailak. 29A pei acu kepeu de au maleune swade dihki,#10:29. A Pei acu kepeu de au dihki; Laisiu kesa ga bam A Pei, acu cidung de kepeube au, dihki. nah migede a Pei ne pie kela gade süt teu di gailak. 30Peibe anai au ket.” 31Pecai mina dung pecu saam kerane ntsu keu dai lu. 32Jisu penui dage rang gai, “I nnui dwa gade heta keyi kekiee ge, a Pei ne tei lo acu kepeu de, tei gai dida; aidung gade dai de ziemne nnui acu ntsu le saam neu lano?” 33#Lev. 24:16.Penui keli gai, “Nang heta keyi tei kegai keheibe ziemne ncu ntsu saam neu lama, dede nang Tinggwang ze rang kemsia ziemne! Nang au mina so sima, dede nang nkatei ncu pwa Tinggwang tei lala!” 34#Lei. 82:6.Jisu keli gai, “nnui zai gage rau nzeu Tinggwang ne rang ‘Nnui au tinggwang dung.’ 35Kesanglaisiu ga rang kegai de au kelungta kesang lie kecu anui ci bam; nah Tinggwang mina cidung dede tinggwang dung lie qu, pe sam pwapeu kegai mina dung de. 36Acu au Peibe ne kedet lu delü kideu gage lang gai. Dainzwa, cine nnui I au Tinggwang Na lie rang kegai I Tinggwang ze rang msia lalie rang lu laino? 37Cine acu nlum so, a Pei acu peu tei neu kelabe I teila melie cai. 38Dede I cidung de tei lalie cai, nnui acu nlum la melie de, nnui camtu gade a bata dung nlum kerabe, ciciu eh nnui pelane ziemne piage gage Peibe a lung ga kebam nah I Peibe lung ga kebam ci lu kerane.”
39Penui piage Jisu ze tuih lu kera teicu, dede pa penui ba gade nzüt tetti.
40 #
Jhn. 1:28. Pecai Jisu au Johan duipum tei bam kela Jordan reuki nah lule gim caili gwang dai lu, nah pa cika bam di. 41Mina kekiee ge peda gwang. Penui rang di, “Johan au miswa kega bata dung tei ma, dede nang mina aipau de ha rang kegai leune au kesang.” 42Nah cika mina kekiee ge pecu nlum lu.
Chwazi Kounye ya:
JOHAN 10: ZemeNB
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© 2018, The Bible Society of India
All rights reserved.